ਸਾਬਕਾ ਸੈਨਿਕ ਕੌਮ ਦੇ ਨਿਰਮਾਣ ’ਚ ਯੋਗਦਾਨ ਪਾ ਸਕਦੇ ਨੇ: ਦਿਵੇਦੀ

ਪੁਣੇੇ, 14 ਜਨਵਰੀ
ਫ਼ੌਜ ਮੁਖੀ ਜਨਰਲ ਉਪੇਂਦਰ ਦਿਵੇਦੀ ਨੇ ਕਿਹਾ ਹੈ ਕਿ ਸਾਬਕਾ ਫ਼ੌਜੀਆਂ ਦੇ ਅਨੁਭਵ ਤੇ ਵਚਨਬੱਧਤਾ ਦੀ ਵਰਤੋਂ ਕੌਮ ਦੇ ਨਿਰਮਾਣ ’ਚ ਕੀਤੀ ਜਾ ਸਕਦੀ ਹੈ। ਇੱਥੇ ਨੌਵੇਂ ਸਾਬਕਾ ਸੈਨਿਕ ਦਿਵਸ ਮੌਕੇ ਸਾਬਕਾ ਫ਼ੌਜੀਆਂ ਨੂੰ ਸੰਬੋਧਨ ਕਰਦਿਆਂ ਉਨ੍ਹਾਂ ਕਿਹਾ ਕਿ ਇਸ ਦਿਨ ਦਾ ਖ਼ਾਸ ਮਹੱਤਵ ਹੈ ਕਿਉਂਕਿ ਇਹ ਉਨ੍ਹਾਂ ਬਹਾਦਰ ਫ਼ੌਜੀਆਂ ਦਾ ਸਨਮਾਨ ਕਰਨ ਦਾ ਦਿਹਾੜਾ ਹੈ, ਜਿਨ੍ਹਾਂ ਮੁਲਕ ਦੀ ਸੇਵਾ ਲਈ ਆਪਣੀਆਂ ਜਾਨਾਂ ਵਾਰ ਦਿੱਤੀਆਂ। ਜੇ ਅਸੀਂ ਸਮੂਹਿਕ ਤੌਰ ’ਤੇ ਆਪਣੀ ਸਮਰੱਥਾ ਦੀ ਗੱਲ ਕਰੀਏ ਤਾਂ 24 ਲੱਖ ਸਾਬਕਾ ਸੈਨਿਕਾਂ, ਸੱਤ ਲੱਖ ਵੀਰ ਨਾਰੀਆਂ, 28 ਲੱਖ ਆਸ਼ਰਿਤਾਂ ਤੇ 28 ਲੱਖ ਪਰਿਵਾਰਕ ਮੈਂਬਰਾਂ ਸਮੇਤ ਇਹ 1.25 ਕਰੋੜ ਬਣਦੀ ਹੈ। ਇੰਨੇ ਵੱਡੇ ਮਨੁੱਖੀ ਸਰੋਤ ’ਚ ਕੌਮ ਦੇ ਨਿਰਮਾਣ ਦੇ ਯਤਨਾਂ ’ਤੇ ਮਹੱਤਵਪੂਰਨ ਪ੍ਰਭਾਵ ਪਾਉਣ ਦੀ ਸਮਰੱਥਾ ਹੈ। ਇਸੇ ਸੰਦਰਭ ’ਚ ਭਾਰਤੀ ਫ਼ੌਜ, ਸੂਬਾ ਸਰਕਾਰਾਂ ਨਾਲ ਮਿਲ ਕੇ ਕੰਮ ਕਰ ਰਹੀ ਹੈ। -ਪੀਟੀਆਈ

ਟਰੇਨਿੰਗ ਲੈਬਾਰਟਰੀ ਦਾ ਉਦਘਾਟਨ

ਪੁਣੇ:

ਫ਼ੌਜ ਮੁਖੀ ਜਨਰਲ ਉਪੇਂਦਰ ਦਿਵੇਦੀ ਨੇ ਮਸਨੂਈ ਅੰਗ ਕੇਂਦਰ (ਆਰਟੀਫੀਸ਼ੀਅਲ ਲਿੰਬ ਸੈਂਟਰ) ਵਿੱਚ ਇੱਕ ਨਵੀਂ ਟਰੇਨਿੰਗ ਲੈਬਾਰਟਰੀ ਦਾ ਉਦਘਾਟਨ ਕੀਤਾ। ਇਹ ਲੈਬਾਰਟਰੀ ਸਰੀਰ ਦੇ ਉਪਰਲੇ ਭਾਗਾਂ ਤੋਂ ਅਪਾਹਜ ਹੋ ਚੁੱਕੇ ਫ਼ੌਜੀਆਂ ਦੇ ਪੁਨਰਵਾਸ ਲਈ ਇਸ ਕੇਂਦਰ ਵੱਲੋਂ ਕੀਤੇ ਜਾ ਰਹੇ ਕੰਮਾਂ ’ਚ ਅਹਿਮ ਭੂਮਿਕਾ ਨਿਭਾਵੇਗੀ। ਇਸ ਦੌਰਾਨ ਜਨਰਲ ਦਿਵੇਦੀ ਨੂੰ ਸੈਂਟਰ ਦੀ ਕੰਪਿਊਟਰ ਏਡਿਡ ਡਿਜ਼ਾਈਨਿੰਗ ਤੇ ਮੈਨਿਊਫੈਕਚਰਿੰਗ ਵਰਕਸ਼ਾਪਾਂ ਬਾਰੇ ਜਾਣਕਾਰੀ ਦਿੱਤੀ ਗਈ। -ਪੀਟੀਆਈ