ਅੱਗ ਲੱਗਣ ਕਾਰਨ ਜ਼ਖਮੀ ਹੋਏ ਪਤੀ-ਪਤਨੀ ਦੀ ਮੌਤ

ਪੱਤਰ ਪ੍ਰੇਰਕ
ਬਠਿੰਡਾ, 20 ਅਗਸਤ
ਬੀਤੀ 12 ਅਗਸਤ ਦੀ ਰਾਤ ਨੂੰ ਐੱਨਐੱਫਐੱਲ ਟਾਊਨਸ਼ਿਪ ਨੇੜੇ ਮੰਦਰ ਕਲੋਨੀ ਵਿੱਚ ਇਕ ਘਰ ’ਤੇ ਗੈਸ ਚੁੱਲ੍ਹੇ ਦੇ ਉੱਪਰ ਰੱਖੀ ਮਿੱਟੀ ਦੇ ਤੇਲ ਦੀ ਬੋਤਲ ਡਿੱਗਣ ਕਾਰਨ ਰਸੋਈ ਵਿੱਚ ਕੰਮ ਕਰ ਰਹੀ ਔਰਤ ਨੂੰ ਅੱਗ ਲੱਗ ਗਈ ਸੀ। ਉਸ ਨੂੰ ਬਚਾਉਣ ਦੇ ਚੱਕਰ ਵਿੱਚ ਔਰਤ ਦਾ ਪਤੀ ਵੀ ਅੱਗ ਦੀ ਲਪੇਟ ਵਿੱਚ ਆ ਗਿਆ ਸੀ। ਜਿਨ੍ਹਾਂ ਦੀ ਅੱਜ ਮੌਤ ਹੋ ਗਈ। ਜ਼ਿਕਰਯੋਗ ਹੈ ਕਿ 12 ਅਗਸਤ ਦੀ ਰਾਤ ਨੂੰ ਸਮਾਜ ਸੇਵੀ ਸੰਸਥਾ ਨੌਜਵਾਨ ਵੈਲਫ਼ੇਅਰ ਦੇ ਵਰਕਰਾਂ ਨੇ ਅੱਗ ਨਾਲ ਝੁਲਸ ਚੁੱਕੇ ਜੋੜੇ ਨੂੰ ਬਠਿੰਡਾ ਸਿਵਲ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਸੀ। ਡਾਕਟਰਾਂ ਦੀ ਟੀਮ ਨੇ ਉਨ੍ਹਾਂ ਦੀ ਨਾਜ਼ੁਕ ਹਾਲਤ ਦੇਖਦੇ ਹੋਏ ਮੈਡੀਕਲ ਕਾਲਜ ਫਰੀਦਕੋਟ ਰੈਫਰ ਕਰ ਦਿੱਤਾ। ਐਤਵਾਰ ਸ਼ਾਮ ਨੂੰ ਦੋਵੇਂ ਪਤੀ ਪਤਨੀ ਦੀ ਮੌਤ ਹੋ ਗਈ। ਮ੍ਰਿਤਕਾਂ ਦੀ ਪਛਾਣ ਰੀਟਾ ਰਾਣੀ (36) ਪਤਨੀ ਸੁੰਦਰ ਅਤੇ ਸੁੰਦਰ (38) ਪੁੱਤਰ ਸੰਤਰਾਮ ਵਜੋਂ ਹੋਈ ਹੈ।