ਚਾਕੂ ਮਾਰ ਕੇ ਨਗਦੀ ਖੋਹੀ; ਤਿੰਨ ਜਣੇ ਕਾਬੂ

ਪੱਤਰ ਪ੍ਰੇਰਕ
ਪੰਚਕੂਲਾ, 15 ਨਵੰਬਰ
ਪੰਚਕੂਲਾ ਦੇ ਸੈਕਟਰ-5/9 ਕੱਟ ਨੇੜੇ ਬੀਤੀ ਰਾਤ 12 ਵਜੇ ਤਿੰਨ ਨਾਬਾਲਗਾਂ ਸਣੇ ਚਾਰ ਵਿਅਕਤੀਆਂ ਨੇ ਸਾਈਕਲ ’ਤੇ ਘਰ ਜਾ ਰਹੇ ਇੱਕ ਵਿਅਕਤੀ ਨੂੰ ਚਾਕੂ ਮਾਰ ਕੇ ਉਸ ਕੋਲੋਂ ਵੀਹ ਹਜ਼ਾਰ ਰੁਪਏ ਲੁੱਟ ਲਏ। ਲੁਟੇਰਿਆਂ ਨੇ ਉਸ ’ਤੇ ਚਾਕੂ ਨਾਲ ਤਿੰਨ ਵਾਰ ਕੀਤੇ। ਰੌਲਾ ਪੈਣ ’ਤੇ ਰਾਹਗੀਰਾਂ ਨੇ ਤਿੰਨਾਂ ਨੂੰ ਫੜ ਲਿਆ। ਪਲੀਸ ਨੇ ਨਾਬਾਲਗਾਂ ਨੂੰ ਬਾਲ ਘਰ ਭੇਜ ਦਿੱਤਾ ਹੈ। ਜਾਣਕਾਰੀ ਮੁਤਾਬਕ ਰਾਮ ਪ੍ਰਵੇਸ਼ ਮਹਿਤੋ ਮਨੀਮਾਜਰਾ ਸਥਿਤ ਦੁਕਾਨ ’ਤੇ ਕੰਮ ਕਰਦਾ ਹੈ। ਦੇਰ ਰਾਤ ਕੰਮ ਤੋਂ ਮਹੇਸ਼ਪੁਰ ਸਥਿਤ ਆਪਣੇ ਘਰ ਜਾ ਰਿਹਾ ਸੀ। ਉਹ ਜਿਵੇਂ ਹੀ ਰਾਤ 12 ਵਜੇ ਸੈਕਟਰ-5/9 ਕੱਟ ਨੇੜੇ ਪਹੁੰਚਿਆ ਤਾਂ ਪਿੱਛੇ ਤੋਂ ਚਾਰ ਜਣੇ ਮੋਟਰਸਾਈਕਲ ’ਤੇ ਆਏ। ਉਨ੍ਹਾਂ ਨੇ ਉਸ ਦਾ ਰਾਹ ਰੋਕ ਲਿਆ। ਇਸ ਤੋਂ ਬਾਅਦ ਇਕ ਨਾਬਾਲਗ ਨੇ ਉਸ ਦੇ ਖੱਬੇ ਮੋਢੇ ਹੇਠ ਵਾਰ ਕੀਤਾ ਅਤੇ ਉਸ ਕੋਲੋਂ ਸਾਰੇ ਪੈਸੇ ਖੋਹ ਲਏ।