ਬਰਤਾਨੀਆ: ਰੇਲ ਗੱਡੀ ’ਚ ਮੁਟਿਆਰ ਨਾਲ ਛੇੜਖਾਨੀ ਕਰਨ ਵਾਲੇ ਮੱਖਣ ਸਿੰਘ ਨੂੰ ਕੈਦ

ਲੰਡਨ, 16 ਅਕਤੂਬਰ
ਬਰਤਾਨੀਆ ’ਚ ਭਾਰਤੀ ਮੂਲ ਦੇ 39 ਸਾਲਾ ਵਿਅਕਤੀ ਨੂੰ 2021 'ਚ ਰੇਲਗੱਡੀ 'ਚ ਮੁਟਿਆਰ ਨਾਲ ਛੇੜਖਾਨੀ ਕਰਨ ਦਾ ਦੋਸ਼ ਕਬੂਲ ਕਰਨ ਤੋਂ ਬਾਅਦ 16 ਹਫ਼ਤਿਆਂ ਲਈ ਜੇਲ੍ਹ ਭੇਜ ਦਿੱਤਾ ਹੈ ਤੇ 7 ਸਾਲ ਲਈ ਉਸ ’ਤੇ ਨਿਗਰਾਨੀ ਰੱਖਣ ਦਾ ਹੁਕਮ ਦਿੱਤਾ ਹੈ। ਵੈਸਟ ਮਿਡਲੈਂਡਜ਼ ਕਾਊਂਟੀ ਦੇ ਸੈਂਡਵੇਲ ਤੋਂ ਮੱਖਣ ਸਿੰਘ ਨੂੰ ਵਾਰਵਿਕ ਕਰਾਊਨ ਅਦਾਲਤ ਨੇ ਪੀੜਤ ਨੂੰ 128 ਪੌਂਡ ਦਾ ਸਰਚਾਰਜ ਅਦਾ ਕਰਨ ਦਾ ਹੁਕਮ ਦਿੱਤਾ ਹੈ। ਅਦਾਲਤ ਨੇ ਸੁਣਿਆ ਕਿ 20 ਸਾਲ ਮੁਟਿਆਰ ਸਤੰਬਰ 2021 ਨੂੰ ਬਰਮਿੰਘਮ ਮੂਰ ਸਟਰੀਟ ਤੋਂ ਲੰਡਨ ਮੈਰੀਲੇਬੋਨ ਜਾ ਰਹੀ ਰੇਲਗੱਡੀ ਵਿੱਚ ਸੀ, ਜਦੋਂ ਮੱਖਣ ਸਿੰਘ ਨੇ ਉਸ ਨੂੰ ਦੇਖਣਾ ਸ਼ੁਰੂ ਕੀਤਾ। ਬਾਅਦ ਵਿੱਚ ਉਹ ਪੀੜਤਾ ਦੇ ਕੋਲ ਸੀਟ ਉੱਤੇ ਬੈਠ ਗਿਆ, ਉਸ ਨਾਲ ਕਥਿਤ ਛੇੜਖਾਨੀ ਸ਼ੁਰੂ ਕੀਤੀ। ਮੁਟਿਆਰ ਨੇ ਮੁਲਜ਼ਮ ਦੀਆਂ ਹਰਕਤਾ ਰਿਕਾਰਡ ਕਰ ਲਈਆਂ ਤੇ ਪੁਲੀਸ ਨੂੰ ਭੇਜ ਕੇ ਉਸ ਨੂੰ ਗ੍ਰਿਫ਼ਤਾਰ ਕਰਵਾ ਦਿੱਤਾ।