ਮੈਡੀਕਲ ਸਟੋਰ ਸੰਚਾਲਕ ਦੀ ਕਾਰ ਵਿੱਚੋਂ ਅਵਿਲ ਦੇ ਟੀਕੇ ਬਰਾਮਦ

ਪੱਤਰ ਪ੍ਰੇਰਕ
ਫਰੀਦਾਬਾਦ, 18 ਜੁਲਾਈ
ਡਿਪਟੀ ਕਮਿਸ਼ਨਰ ਪੁਲੀਸ ਸੈਂਟਰਲ ਜਸਲੀਨ ਕੌਰ ਦੇ ਦਿਸ਼ਾ-ਨਿਰਦੇਸ਼ਾਂ ’ਤੇ ਕਾਰਵਾਈ ਕਰਦੇ ਹੋਏ ਥਾਣਾ ਖੇੜੀ ਪੁਲ ਪੁਲੀਸ ਨੇ ਡਰੱਗਜ਼ ਇੰਸਪੈਕਟਰ ਨਾਲ ਮਿਲ ਕੇ ਇਕ ਮੈਡੀਕਲ ਸਟੋਰ ਸੰਚਾਲਕ ਦੀ ਗੱਡੀ ਵਿੱਚੋਂ ਅਵਿਲ ਦੇ 72 ਟੀਕੇ ਬਰਾਮਦ ਕੀਤੇ ਹਨ। ਪੁਲੀਸ ਬੁਲਾਰੇ ਨੇ ਦੱਸਿਆ ਕਿ ਮਹਿੰਦਰ ਵਾਸੀ ਸੈਕਟਰ-16 ਫਰੀਦਾਬਾਦ ਨੇ ਹਨੂੰਮਾਨ ਨਗਰ ਭਾਰਤ ਕਲੋਨੀ ਵਿੱਚ ਸ਼ਰਮਾ ਮੈਡੀਕਲ ਸਟੋਰ ਦੇ ਨਾਂ ’ਤੇ ਮੈਡੀਕਲ ਸਟੋਰ ਖੋਲ੍ਹਿਆ ਹੋਇਆ ਹੈ। ਖੇੜੀ ਪੁਲ ਥਾਣਾ ਪੁਲੀਸ ਨੂੰ ਗੁਪਤ ਸੂਚਨਾ ਮਿਲੀ ਸੀ ਕਿ ਇਕ ਮੈਡੀਕਲ ਸਟੋਰ ’ਤੇ ਨਸ਼ੇ ਦੇ ਟੀਕੇ ਵੇਚੇ ਜਾ ਰਹੇ ਹਨ। ਸੂਚਨਾ ’ਤੇ ਕਾਰਵਾਈ ਕਰਦੇ ਹੋਏ ਥਾਣਾ ਸਦਰ ਦੀ ਟੀਮ ਨੇ ਡਰੱਗ ਇੰਸਪੈਕਟਰ ਪੂਜਾ ਚੌਧਰੀ ਨੂੰ ਮੌਕੇ ‘ਤੇ ਬੁਲਾਇਆ। ਇਸ ਕਾਰਵਾਈ ਦੌਰਾਨ ਮਹਿੰਦਰ ਦੀ ਗੱਡੀ ਵਿੱਚੋਂ ਅਵਿਲ ਦੇ 72 ਟੀਕੇ ਬਰਾਮਦ ਹੋਏ। ਮੈਡੀਕਲ ਸਟੋਰ ਸੰਚਾਲਕ ਬਰਾਮਦ ਕੀਤੇ ਟੀਕਿਆਂ ਦੀ ਖਰੀਦ-ਵੇਚ ਸਬੰਧੀ ਦਸਤਾਵੇਜ਼ ਪੇਸ਼ ਨਹੀਂ ਕਰ ਸਕਿਆ। ਇਸ ਦੌਰਾਨ ਅਵਿਲ ਦੇ 72 ਟੀਕੇ ਬਰਾਮਦ ਕਰਕੇ ਡਰੱਗ ਵਿਭਾਗ ਨੇ ਜ਼ਬਤ ਕਰ ਲਏ ਹਨ। ਜ਼ਿਕਰਯੋਗ ਹੈ ਕਿ ਅੱਜ ਕੱਲ੍ਹ ਨਸ਼ੇ ਦੇ ਆਦੀ ਲੋਕ ਨਸ਼ਾ ਕਰਨ ਲਈ ਅਵਿਲ ਇੰਜੈਕਸ਼ਨ ਦੀ ਵਰਤੋਂ ਕਰਦੇ ਹਨ।