ਅਮਰੀਕਾ ਤੇ ਸਾਊਦੀ ਅਰਬ ਵੱਲੋਂ ਸੂਡਾਨ ’ਚ ਗੋਲੀਬੰਦੀ ਦੀ ਅਪੀਲ

ਕਾਹਿਰਾ, 4 ਜੂਨ

ਸਾਊਦੀ ਅਰਬ ਤੇ ਅਮਰੀਕਾ ਨੇ ਸੂਡਾਨ ਦੀਆਂ ਟਕਰਾਅ ਵਾਲੀਆਂ ਧਿਰਾਂ ਨੂੰ ਬੇਨਤੀ ਕੀਤੀ ਹੈ ਕਿ ਉਹ ਨਵੇਂ ਸਿਰਿਓਂ ਗੋਲੀਬੰਦੀ ਦਾ ਸਮਝੌਤਾ ਕਰਨ ਤੇ ਇਸ ਨੂੰ ਅਸਰਦਾਰ ਢੰਗ ਨਾਲ ਲਾਗੂ ਕਰਨ। ਜ਼ਿਕਰਯੋਗ ਹੈ ਕਿ ਅਫ਼ਰੀਕੀ ਮੁਲਕ ਵਿਚ ਲੜਾਈ ਨਵੇਂ ਸਿਰਿਓਂ ਸ਼ੁਰੂ ਹੋ ਗਈ ਹੈ। ਇਸ ਤੋਂ ਪਹਿਲਾਂ ਅਪਰੈਲ ਮਹੀਨੇ ਫ਼ੌਜ ਤੇ ਨੀਮ ਫ਼ੌਜੀ ਬਲਾਂ ਵਿਚਾਲੇ ਟਕਰਾਅ ਹੋਇਆ ਸੀ। ਹਫ਼ਤਿਆਂ ਤੋਂ ਸਾਊਦੀ ਅਰਬ ਤੇ ਅਮਰੀਕਾ ਦੋਵਾਂ ਧਿਰਾਂ ਦਰਮਿਆਨ ਵਿਚੋਲਗੀ ਕਰ ਕੇ ਸਹਿਮਤੀ ਬਣਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਮਈ ਮਹੀਨੇ ਦੇ ਅਖ਼ੀਰ ‘ਚ ਗੋਲੀਬੰਦੀ ਸਮਝੌਤੇ ਨੂੰ ਆਰਜ਼ੀ ਤੌਰ ‘ਤੇ ਸਿਰੇ ਚੜ੍ਹਾਉਣ ਵਿਚ ਦੋਵਾਂ ਮੁਲਕਾਂ ਨੇ ਮਦਦ ਕੀਤੀ ਸੀ। ਇਸ ਤੋਂ ਬਾਅਦ ਗੜਬੜੀ ਦੇ ਸ਼ਿਕਾਰ ਮੁਲਕ ਵਿਚ ਅਤਿ ਲੋੜੀਂਦੀ ਮਨੁੱਖੀ ਮਦਦ ਪਹੁੰਚਾਈ ਗਈ ਸੀ। ਹਾਲਾਂਕਿ ਇਨ੍ਹਾਂ ਯਤਨਾ ਨੂੰ ਉਸ ਵੇਲੇ ਧੱਕਾ ਲੱਗਾ ਜਦ ਬੁੱਧਵਾਰ ਸੈਨਾ ਨੇ ਕਿਹਾ ਕਿ ਉਹ ਹੁਣ ਗੋਲੀਬੰਦੀ ਲਈ ਹੋ ਰਹੀ ਵਾਰਤਾ ਵਿਚ ਹਿੱਸਾ ਨਹੀਂ ਲੈਣਗੇ। -ਏਪੀ