ਅਣਕਿਆਸੇ ਚੋਣ ਨਤੀਜਿਆਂ ਮਗਰੋਂ ਸ਼ੇਅਰ ਬਾਜ਼ਾਰ ਮੂਧੇ ਮੂੰਹ
ਮੁੰਬਈ, 4 ਜੂਨ
ਲੋਕ ਸਭਾ ਚੋਣਾਂ ਦੇ ਅਣਕਿਆਸੇ ਨਤੀਜਿਆਂ ਤੇ ਰੁਝਾਨਾਂ ਵਿਚ ਸੱਤਾਧਾਰੀ ਭਾਜਪਾ ਨੂੰ ਸਪਸ਼ਟ ਬਹੁਮਤ ਨਾ ਮਿਲਣ ਦੇ ਇਸ਼ਾਰੇ ਮਗਰੋਂ ਅੱਜ ਸ਼ੇਅਰ ਬਾਜ਼ਾਰ ਮੂਧੇ ਮੂੰਹ ਡਿੱਗ ਪਿਆ। ਬੰਬੇ ਸਟਾਕ ਐਕਸਚੇਂਜ ਦਾ 30 ਸ਼ੇਅਰਾਂ ਵਾਲਾ ਸੈਂਸੈਕਸ ਤੇ ਐੱਨਐੱਸਈ ਦਾ ਨਿਫਟੀ ਕਰੀਬ 6 ਫੀਸਦ ਤੱਕ ਡਿੱਗ ਗਏ। ਸ਼ੇਅਰ ਮਾਰਕੀਟ ਦੇ ਡਿੱਗਣ ਨਾਲ ਨਿਵੇਸ਼ਕਾਂ ਦੇ 31 ਲੱਖ ਕਰੋੜ ਰੁਪਏ ਮਿੱਟੀ ਹੋ ਗਏ। ਪਿਛਲੇ ਚਾਰ ਸਾਲਾਂ ਵਿਚ ਇਕੋ ਦਿਨ ’ਚ ਇਹ ਹੁਣ ਤੱਕ ਦੀ ਸਭ ਤੋਂ ਵੱਡੀ ਗਿਰਾਵਟ ਹੈ। ਇਸ ਤੋਂ ਪਹਿਲਾਂ ਸੋਮਵਾਰ ਨੂੰ ਤਿੰਨ ਫੀਸਦ ਤੋਂ ਵੱਧ ਦੀ ਤੇਜ਼ੀ ਮਗਰੋਂ ਅੱਜ ਸੈਂਸੈਕਸ 4,389.73 ਨੁਕਤੇ ਜਾਂ 5.74 ਫੀਸਦ ਦੇ ਨਿਘਾਰ ਨਾਲ ਦੋ ਮਹੀਨਿਆਂ ਦੇ ਹੇਠਲੇ ਪੱਧਰ 72,079.05 ’ਤੇ ਬੰਦ ਹੋਇਆ। ਉਂਜ ਦਿਨ ਦੇ ਕਾਰੋਬਾਰ ਦੌਰਾਨ ਸੈਂਸੈਕਸ ਇਕ ਵਾਰ 6,234.35 ਨੁਕਤੇ ਜਾਂ 8.15 ਫੀਸਦ ਡਿੱਗ ਕੇ ਲਗਪਗ ਪੰਜ ਮਹੀਨਿਆਂ ਦੇ ਹੇਠਲੇ ਪੱਧਰ 70,234.43 ਉੱਤੇ ਵੀ ਗਿਆ। ਉਧਰ ਨੈਸ਼ਨਲ ਸਟਾਕ ਐਕਸਚੇਂਜ ਦਾ ਨਿਫਟੀ 1,982.45 ਨੁਕਤੇ ਜਾਂ 8.52 ਫੀਸਦ ਡਿੱਗ ਕੇ 21,281.45 ਨੁਕਤਿਆਂ ’ਤੇ ਪਹੁੰਚ ਗਿਆ। ਮਗਰੋਂ ਇਹ 1,379.40 ਨੁਕਤਿਆਂ ਜਾਂ 5.93 ਫੀਸਦ ਦੇ ਵੱਡੇ ਨੁਕਸਾਨ ਨਾਲ 21,884.50 ਨੁਕਤਿਆਂ ’ਤੇ ਬੰਦ ਹੋਇਆ। -ਪੀਟੀਆਈ