ਕਰਾਂਦਲਜੇ ਖਿਲਾਫ਼ 48 ਘੰਟਿਆਂ ’ਚ ਕਾਰਵਾਈ ਰਿਪੋਰਟ ਮੰਗੀ
ਨਵੀਂ ਦਿੱਲੀ: ਚੋਣ ਕਮਿਸ਼ਨ ਨੇ ਡੀਐੱਮਕੇ ਵੱਲੋਂ ਕੇਂਦਰੀ ਮੰਤਰੀ ਤੇ ਭਾਜਪਾ ਆਗੂ ਸ਼ੋਭਾ ਕਰਾਂਦਲਜੇ ਖਿਲਾਫ਼ ਕਥਿਤ ਆਦਰਸ਼ ਚੋਣ ਜ਼ਾਬਤੇ ਦੀ ਉਲੰਘਣਾ ਨੂੰ ਲੈ ਕੇ ਦਿੱਤੀ ਸ਼ਿਕਾਇਤ ’ਤੇ ਕਰਨਾਟਕ ਦੇ ਮੁੱਖ ਚੋਣ ਅਧਿਕਾਰੀ ਨੂੰ ਫੌਰੀ ਤੇ ਢੁੱਕਵੀਂ ਕਾਰਵਾਈ ਕਰਨ ਲਈ ਕਿਹਾ ਹੈ। ਕਮਿਸ਼ਨ ਨੇ 48 ਘੰਟਿਆਂ ਵਿਚ ਕਾਰਵਾਈ ਰਿਪੋਰਟ ਮੰਗੀ ਹੈ। ਕਰਾਂਦਲਜੇ ਨੇ ਦਾਅਵਾ ਕੀਤਾ ਸੀ ਕਿ ਬੰਗਲੂਰੂ ਦੇ ਰਾਮੇਸ਼ਵਰਮ ਕੈਫੇ ਵਿਚ ਪਹਿਲੀ ਮਾਰਚ ਨੂੰ ਹੋਏ ਆਈਈਡੀ ਧਮਾਕੇ ਲਈ ਤਾਮਿਲਨਾਡੂ ਨਾਲ ਸਬੰਧਤ ਵਿਅਕਤੀ ਦਾ ਹੱਥ ਸੀ। ਡੀਐੱਮਕੇ ਨੇ ਇਸ ਦਾਅਵੇ ਲਈ ਕਰਾਂਦਲਜੇ ਖਿਲਾਫ਼ ਕਾਰਵਾਈ ਦੀ ਮੰਗ ਕੀਤੀ ਸੀ। ਕਰਾਂਦਲਜੇ ਨੇ ਮੰਗਲਵਾਰ ਨੂੰ ਰੋਸ ਪ੍ਰਦਰਸ਼ਨ ਦੌਰਾਨ ਕਿਹਾ ਸੀ ਕਿ ‘ਤਾਮਿਲ ਨਾਡੂ ਵਿਚ ਅਮਨ ਤੇ ਕਾਨੂੰਨ ਦੀ ਸਥਿਤੀ ਵਿਗੜਦੀ ਜਾ ਰਹੀ ਹੈ। ਤਾਮਿਲ ਨਾਡੂ ਤੋਂ ਆਉਣ ਵਾਲੇ ਲੋਕ ਇਥੇ ਬੰਬ ਪਲਾਂਟ ਕਰ ਰਹੇ ਹਨ, ਦਿੱਲੀ ਦੇ ਲੋਕ ‘ਪਾਕਿਸਤਾਨ ਜ਼ਿੰਦਾਬਾਦ’ ਦੇ ਨਾਅਰੇ ਲਾ ਰਹੇ ਹਨ ਤੇ ਕੇਰਲਾ ਤੋਂ ਆਉਂਦੇ ਲੋਕ ਤੇਜ਼ਾਬੀ ਹਮਲਿਆਂ ਵਿਚ ਸ਼ਾਮਲ ਹਨ।’’ ਕਰਾਂਦਲਜੇ ਨੇ ਹਾਲਾਂਕਿ ਆਪਣੀਆਂ ਇਨ੍ਹਾਂ ਟਿੱਪਣੀਆਂ ਲਈ ਮਗਰੋਂ ਮੁਆਫ਼ੀ ਮੰਗੀ ਸੀ। -ਪੀਟੀਆਈ