ਜੌਹਰੀ ਦੀ ਦੁਕਾਨ ’ਚ ਛੋਟਾ ਗੈਸ ਸਿਲੰਡਰ ਫਟਿਆ

ਪੱਤਰ ਪ੍ਰੇਰਕ
ਸਮਰਾਲਾ, 16 ਨਵੰਬਰ
ਗੁਰੂ ਨਾਨਕ ਰੋਡ ਸਥਿਤ ਪ੍ਰਦੀਪ ਜਿਊਲਰਜ਼ ਦੀ ਦੁਕਾਨ ਵਿੱਚ ਅੱਜ ਇੱਕ ਛੋਟਾ ਗੈਸ ਸਿਲੰਡਰ ਫਟਣ ਨਾਲ ਧਮਾਕਾ ਹੋਇਆ। ਧਮਾਕਾ ਇੰਨਾ ਜ਼ੋਰਦਾਰ ਸੀ ਕਿ ਆਲੇ-ਦੁਆਲੇ ਦੇ ਦੁਕਾਨਦਾਰਾਂ ‘ਚ ਵੀ ਦਹਿਸ਼ਤ ਫੈਲ ਗਈ ਤੇ ਇੱਕ ਦਮ ਸਾਰੇ ਆਪਣੀਆਂ ਦੁਕਾਨਾਂ ’ਚੋਂ ਬਾਹਰ ਆ ਗਏ। ਹਾਦਸੇ ’ਚ ਭਾਵੇਂ ਕਿਸੇ ਤਰ੍ਹਾਂ ਦਾ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ ਹੈ ਪਰ ਧਮਾਕੇ ਨਾਲ ਦੁਕਾਨ ਦੀ ਸਾਰੀ ਫਿਟਿੰਗ ਤੇ ਸ਼ੀਸ਼ੇ ਟੁੱਟ ਗਏ ਹਨ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਸ਼ਾਮ ਕਰੀਬ ਸਵਾ 6 ਵਜੇ ਦੁਕਾਨ ਦੇ ਮਾਲਕ ਦਾ ਬੇਟਾ ਗੁਰਸੇਵਕ ਸਿੰਘ ਦੁਕਾਨ ਵਿੱਚ ਮੌਜੂਦ ਸੀ ਤੇ ਗਹਿਣਿਆਂ ਦੀ ਮੁਰੰਮਤ ਦਾ ਕੰਮ ਕਰ ਰਿਹਾ ਸੀ। ਜਿਵੇਂ ਹੀ ਉਸ ਨੇ ਗੈਸ ਸਿਲੰਡਰ ਚਲਾਇਆ ਅਚਾਨਕ ਧਮਾਕਾ ਹੋ ਗਿਆ। ਗੁਰਸੇਵਕ ਤੁਰੰਤ ਦੌੜ ਕੇ ਦੁਕਾਨ ਤੋਂ ਬਾਹਰ ਆ ਗਿਆ। ਧਮਾਕੇ ਕਾਰਨ ਦੁਕਾਨ ਦੀ ਸਾਰੀ ਸ਼ੀਸ਼ੇ ਦੀ ਫਿਟਿੰਗ, ਸੀਲਿੰਗ ਛੱਤ ਤੇ ਬਾਹਰਲਾ ਸ਼ੀਸ਼ੇ ਦਾ ਦਰਵਾਜ਼ਾ ਨੁਕਸਾਨਿਆ ਗਿਆ। ਦੁਕਾਨ ਮਾਲਕ ਪ੍ਰਦੀਪ ਸਿੰਘ ਨੇ ਦੱਸਿਆ ਕਿ ਇਸ ਹਾਦਸੇ ਵਿੱਚ ਉਸ ਦਾ ਕਾਫ਼ੀ ਆਰਥਿਕ ਨੁਕਸਾਨ ਹੋਇਆ ਹੈ। ਉਸ ਨੇ ਤਸੱਲੀ ਪ੍ਰਗਟਾਈ ਕਿ ਹਾਦਸੇ ਵਿੱਚ ਉਸ ਦਾ ਪੁੱਤਰ ਵਾਲ ਵਾਲ ਬੱਚ ਗਿਆ ਹੈ।