ਸੁਨਿਆਰ ਦਾ ਮੁਲਾਜ਼ਮ ਹੀਰੇ ਦੀਆਂ ਮੁੰਦਰੀਆਂ ਲੈ ਕੇ ਫ਼ਰਾਰ

ਟ੍ਰਿਬਿਊਨ ਨਿਊਜ਼ ਸਰਵਿਸ
ਲੁਧਿਆਣਾ, 23 ਨਵੰਬਰ
ਸੁਨਿਆਰੇ ਦੀ ਦੁਕਾਨ ’ਤੇ ਕੰਮ ਕਰਦੇ ਇੱਕ ਮੁਲਾਜ਼ਮ ਨੇ ਹੀਰੇ ਦੀਆਂ 12 ਮੁੰਦਰੀਆਂ ਚੋਰੀ ਕਰ ਲਈਆਂ। ਇਸ ਸਬੰਧੀ ਥਾਣਾ ਡਿਵੀਜ਼ਨ ਨੰਬਰ 8 ਦੀ ਪੁਲੀਸ ਨੇ ਸਰਾਭਾ ਨਗਰ ਦੇ ਸ਼ਿਆਮ ਸੁੰਦਰ ਵਰਮਾ ਦੀ ਸ਼ਿਕਾਇਤ ’ਤੇ ਵਿਨੈ ਕੁਮਾਰ ਚੌਹਾਨ ਵਾਸੀ ਅਲੀ ਮੁਹੱਲਾ, ਜਲੰਧਰ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਹੈ। ਸ਼ਿਕਾਇਤਕਰਤਾ ਨੇ ਦੱਸਿਆ ਕਿ ਉਸ ਨੇ 2 ਸਤੰਬਰ ਨੂੰ ਵਿਨੈ ਕੁਮਾਰ ਚੌਹਾਨ ਨੂੰ ਨੌਕਰੀ ’ਤੇ ਰੱਖਿਆ ਸੀ। 7 ਅਕਤੂਬਰ ਨੂੰ ਵਿਨੈ ਉਸ ਕੋਲੋਂ ਬਿੱਲ ਵਾਊਚਰ ਲੈ ਕੇ ਹੀਰੇ ਦੇ ਗਹਿਣੇ ਵੇਚਣ ਲਈ ਗਿਆ ਸੀ ਤੇ 8 ਅਕਤੂਬਰ ਨੂੰ ਆ ਕੇ ਦੱਸਿਆ ਕਿ ਗਹਿਣੇ ਆਰਐੱਲ ਅਗਰਵਾਲ ਜਿਊਲਰਜ਼ ਜੋਤੀ ਚੌਕੀ ਜਲੰਧਰ ਨੂੰ ਵੇਚੇ ਹਨ। ਜਦੋਂ ਸ਼ਿਆਮ ਸੁੰਦਰ ਨੇ ਆਰ ਐਲ ਜਿਊਲਰਜ਼ ਨੂੰ ਪੇਮੈਂਟ ਲਈ ਫੋਨ ਕੀਤਾ ਤਾਂ ਪਤਾ ਲੱਗਿਆ ਕਿ ਉਨ੍ਹਾਂ ਕੋਈ ਗਹਿਣੇ ਨਹੀਂ ਖਰੀਦੇ।