ਖਰੜ ਕੌਂਸਲ ਦੀ ਮੀਟਿੰਗ ਵਿਚ 10 ਕਰੋੜ ਦੇ ਮਤੇ ਪਾਸ
ਸ਼ਸ਼ੀ ਪਾਲ ਜੈਨ
ਖਰੜ, 26 ਜੁਲਾਈ
ਸਥਾਨਕ ਨਗਰ ਕੌਂਸਲ ਦੀ ਅੱਜ ਪ੍ਰਧਾਨ ਜਸਪ੍ਰੀਤ ਕੌਰ ਲੌਂਗੀਆ ਦੀ ਪ੍ਰਧਾਨਗੀ ਹੇਠ ਹੋਈ ਮੀਟਿੰਗ ਵਿਚ ਸ਼ਹਿਰ ਦੇ ਵੱਖ ਵੱਖ ਵਾਰਡਾਂ ਵਿਚ ਵਿਕਾਸ ਦੇ ਕੰਮਾਂ ਸਬੰਧੀ 10 ਕਰੋੜ ਰੁਪਏ ਤੋਂ ਵੱਧ ਦੇ ਮਤੇ ਪਾਸ ਕੀਤੇ ਗਏ। ਇੰਝ ਹੀ ਮੀਟਿੰਗ ਵਿਚ ਪਿੰਡ ਦਾਊਂਮਾਜਰਾ, ਭਾਗੋਮਾਜਰਾ ਅਤੇ ਪੀਰ ਸੁਹਾਣਾ ਵਿੱਚ ਸੀਵਰ ਟ੍ਰੀਟਮੈਂਟ ਪਲਾਂਟ ਲਗਾਉਣ ਲਈ ਮਤੇ ਪਾਸ ਕੀਤੇ ਗਏ। ਕੌਂਸਲ ਦੀ ਪ੍ਰਧਾਨ ਜਸਪ੍ਰੀਤ ਕੌਰ ਲੌਂਗੀਆ ਨੇ ਦੱਸਿਆ ਕਿ ਇਸ ਗੱਲ ਦਾ ਧਿਆਨ ਰੱਖਿਆ ਗਿਆ ਹੈ ਕਿ ਹਰ ਵਾਰਡ ਵਿਚ 25 ਤੋਂ ਲੈ ਕੇ 30 ਲੱਖ ਰੁਪਏ ਦੇ ਵਿਕਾਸ ਦੇ ਕੰਮ ਹੋਣ।
ਮੀਟਿੰਗ ਵਿਚ ਵੱਖ-ਵੱਖ ਮੁੱਦਿਆਂ ’ਤੇ ਮੈਂਬਰਾਂ ਨੇ ਭਰਵੀਂ ਬਹਿਸ ਕੀਤੀ। ਮੀਟਿੰਗ ਵਿਚ ਗਿਲਕੋ ਵੈਲੀ ਵਾਰਡ ਨੰਬਰ-16 ਵਿੱਚ ਕਮਿਊਨਿਟੀ ਸੈਂਟਰ ਬਣਾਉਣ ਨੂੰ ਮਨਜ਼ੂਰੀ ਦਿੱਤੀ ਗਈ। ਮੀਟਿੰਗ ਵਿਚ ਪਿੰਡ ਤਿਰਪੜੀ, ਪੁਖੜੀ, ਪੀਰ ਸੁਹਾਣਾ, ਤੋਲੇਮਾਜਰਾ ਆਦਿ ਪਿੰਡਾਂ ਵਿਚ ਚੱਲ ਰਹੀਆਂ ਜਲ ਸਪਲਾਈ ਸਕੀਮਾਂ ਨੂੰ ਨਗਰ ਕੌਂਸਲ ਦੇ ਖੇਤਰ ਵਿਚ ਲੈਣ ਸਬੰਧੀ ਮਤਾ ਪਾਸ ਕੀਤਾ ਗਿਆ। ਇਸ ਮੌਕੇ ਕੌਂਸਲਰ ਵਨੀਤ ਜੈਨ ਬਿੱਟੂ ਨੇ ਕਿਹਾ ਕਿ ਨਗਰ ਕੌਂਸਲ ਨੂੰ ਪਹਿਲਾਂ ਇਹ ਚਾਹੀਦਾ ਹੈ ਕਿ ਉਹ ਖਰੜ ਸ਼ਹਿਰ ਦੇ ਵਸਨੀਕਾਂ ਨੂੰ ਪੇਸ਼ ਆ ਰਹੀਆਂ ਪਾਣੀ ਦੀਆਂ ਸਮੱਸਿਆਵਾਂ ਨੂੰ ਹੱਲ ਕਰਨ ਲਈ ਕਦਮ ਚੁੱਕੇ। ਵਨੀਤ ਜੈਨ ਨੇ ਕਿਹਾ ਕਿ ਖਰੜ ਦੀ ਰਾਮ ਬਾਗ਼ ਰੋਡ ਜੋ ਸਮਸ਼ਾਨਘਾਟ ਨੂੰ ਜਾਂਦੀ ਹੈ, ਉੱਤੇ ਵਹਿ ਰਹੇ ਸੀਵਰ ਦੇ ਪਾਣੀ ਨੂੰ ਕੰਟਰੋਲ ਕਰਨ ਸਬੰਧੀ ਤੁਰੰਤ ਕਦਮ ਚੁੱਕੇ ਜਾਣ।