ਡਾ. ਪੂਨਮ ਅਗਰਵਾਲ ਨੂੰ ਸਰਵੋਤਮ ਪ੍ਰੋਫ਼ੈਸਰ ਐਵਾਰਡ

ਲੁਧਿਆਣਾ, 26 ਦਸੰਬਰ‬‎

ਪੀਏਯੂ ਦੇ ਭੋਜਨ ਵਿਗਿਆਨ ਅਤੇ ਤਕਨਾਲੋਜੀ ਵਿਭਾਗ ਦੇ ਸਾਬਕਾ ਮੁਖੀ ਡਾ. ਪੂਨਮ ਅਗਰਵਾਲ ਨੂੰ ਭੋਜਨ ਵਿਗਿਆਨੀਆਂ ਤੇ ਤਕਨੀਕੀ ਮਾਹਰਾਂ ਦੀ ਐਸੋਸੀਏਸ਼ਨ ਵੱਲੋਂ 2023 ਲਈ ਸਰਵੋਤਮ ਪ੍ਰੋਫ਼ੈਸਰ ਵਜੋਂ ‘ਪ੍ਰੋਫ਼ੈਸਰ ਜੀਵਨ ਸਿੰਘ ਸਿੱਧੂ’ ਐਵਾਰਡ ਨਾਲ ਸਨਮਾਨਿਆ ਗਿਆ ਹੈ। ਪੀਏਯੂ ਵਿੱਚ 33 ਸਾਲਾਂ ਤੋਂ ਵਧੇਰੇ ਸਮੇਂ ਦੀ ਸੇਵਾ ਕਰਦਿਆਂ ਡਾ. ਪੂਨਮ ਨੂੰ ਭੋਜਨ ਵਿਗਿਆਨ ਵਿੱਚ ਅਧਿਆਪਨ, ਖੋਜ ਤੇ ਖੋਜ ਅਗਵਾਈ ਦੇ ਖੇਤਰ ਵਿੱਚ ਉਨ੍ਹਾਂ ਦੇ ਬੇਮਿਸਾਲ ਯੋਗਦਾਨ ਲਈ ਜਾਣਿਆ ਜਾਂਦਾ ਹੈ।

ਆਪਣੇ ਕਾਰਜਕਾਲ ਦੌਰਾਨ ਉਨ੍ਹਾਂ ਨੇ ਕਈ ਖੋਜ ਪ੍ਰਾਜੈਕਟ ਸੰਪੂਰਨ ਕਰਨ, ਪ੍ਰਮੁੱਖ ਕਾਰੋਬਾਰੀ ਸਿਖਲਾਈ ਢਾਂਚੇ ਦੀ ਸਥਾਪਨਾ ਕਰਨ ਤੇ ਤਿੰਨ ਰਜਿਸਟਰਡ ਪੇਟੈਂਟਾਂ ਤੇ 300 ਤੋਂ ਵੱਧ ਖੋਜ ਅਤੇ ਪਾਸਾਰ ਪ੍ਰਕਾਸ਼ਨਾਂਵਾਂ ਲਿਖਣ ਦਾ ਮਾਣ ਹਾਸਲ ਕੀਤਾ। ਉਪ ਕੁਲਪਤੀ ਡਾ. ਸਤਿਬੀਰ ਸਿੰਘ ਗੋਸਲ, ਨਿਰਦੇਸ਼ਕ ਖੋਜ ਡਾ. ਅਜਮੇਰ ਸਿੰਘ ਢੱਟ, ਡੀਨ, ਪੋਸਟ ਗ੍ਰੈਜੂਏਟ ਸਟੱਡੀਜ਼ ਡਾ. ਮਾਨਵ ਇੰਦਰਾ ਸਿੰਘ ਗਿੱਲ, ਖੇਤੀਬਾੜੀ ਕਾਲਜ ਦੇ ਡੀਨ ਡਾ. ਚਰਨਜੀਤ ਸਿੰਘ ਔਲਖ ਅਤੇ ਡਾ. ਸਵਿਤਾ ਸ਼ਰਮਾ (ਮੁਖੀ ਭੋਜਨ ਵਿਗਿਆਨ ਅਤੇ ਤਕਨਾਲੋਜੀ ਵਿਭਾਗ) ਨੇ ਡਾ. ਪੂਨਮ ਅਗਰਵਾਲ ਨੂੰ ਇਹ ਵੱਕਾਰੀ ਪੁਰਸਕਾਰ ਹਾਸਲ ਕਰਨ ਲਈ ਵਧਾਈ ਦਿੱਤੀ।