ਕਿਸਾਨ ਜਥੇਬੰਦੀ ਨੇ ਮਕਾਨ ਦੀ ਕੁਰਕੀ ਰੁਕਵਾਈ

ਬੀਰਬਲ ਰਿਸ਼ੀ
ਧੂਰੀ, 12 ਮਈ
ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾਂ ਨੇ ਧੋਬੀ ਘਾਟ ਧੂਰੀ ਨੇੜੇ ਰਹਿੰਦੇ ਦਵਿੰਦਰਪਾਲ ਸਿੰਗਲਾ ਦੇ ਘਰ ਦੀ ਕੁਰਕੀ ਰੁਕਵਾਉਣ ਲਈ ਧਰਨਾ ਦੇ ਕੇ ਜ਼ੋਰਦਾਰ ਨਾਅਰੇਬਾਜ਼ੀ ਕੀਤੀ।
ਬੀਕੇਯੂ ਏਕਤਾ ਉਗਰਾਹਾਂ ਦੇ ਬਲਾਕ ਪ੍ਰਧਾਨ ਹਰਬੰਸ ਸਿੰਘ ਲੱਡਾ, ਜਨਰਲ ਸਕੱਤਰ ਹਰਪਾਲ ਸਿੰਘ ਪੇਧਨੀ, ਪ੍ਰੈਸ ਸਕੱਤਰ ਮਨਜੀਤ ਸਿੰਘ ਜਹਾਂਗੀਰ ਆਦਿ ਨੇ ਜਨਤਕ ਇਕੱਠ ਨੂੰ ਸੰਬੋਧਨ ਕਰਦਿਆਂ ਦੱਸਿਆ ਕਿ ਦਰਸ਼ਨਾ ਦੇਵੀ ਤੇ ਉਸ ਦੇ ਪੁੱਤਰ ਦਵਿੰਦਰਪਾਲ ਸਿੰਗਲਾ ਨੇ ਧੂਰੀ ਦੀ ਇੱਕ ਬੈਂਕ ਤੋਂ 26 ਲੱਖ ਦਾ ਲੋਨ ਪਾਸ ਕਰਵਾਇਆ ਸੀ ਜਿਸ ਵਿੱਚ ਪਹਿਲੀ ਕਿਸ਼ਤ ਵਜੋਂ ਉਸਨੂੰ 13 ਲੱਖ ਦੀ ਰਾਸ਼ੀ ਦਿੱਤੀ ਗਈ। ਆਗੂਆਂ ਨੇ ਦਾਅਵਾ ਕੀਤਾ ਕਿ ਪ੍ਰਾਪਤ ਕੀਤੀ ਰਾਸ਼ੀ ਵਿੱਚੋਂ ਦਵਿੰਦਰਪਾਲ ਸਿੰਘ ਵੱਲੋਂ ਤਕਰੀਬਨ ਪੌਣੇ ਅੱਠ ਲੱਖ ਰੁਪਏ ਕਿਸ਼ਤਾਂ ਰਾਹੀਂ ਭਰੇ ਵੀ ਜਾ ਚੁੱਕੇ ਹਨ ਪਰ ਹੁਣ ਉਨ੍ਹਾਂ ਦੇ ਘਰ ਦੀ ਕੁਰਕੀ ਕਰਵਾਈ ਜਾ ਰਹੀ ਹੈ। ਕਿਸਾਨ ਆਗੂ ਹਰਪਾਲ ਸਿੰਘ ਪੇਧਨੀ ਨੇ ਸਪੱਸ਼ਟ ਕਿਹਾ ਕਿ ਕਰਜ਼ੇ ਬਦਲੇ ਕਿਸੇ ਵੀ ਕਿਸਾਨ ਦੀ ਜ਼ਮੀਨ ਤੇ ਕਿਸੇ ਪਰਿਵਾਰ ਦੇ ਰੈਣ-ਬਸੇਰੇ ਦੀ ਕੁਰਕੀ ਨਹੀਂ ਹੋਣ ਦਿਆਂਗੇ। ਆਗੂਆਂ ਨੇ ਦੱਸਿਆ ਕਿ ਅੱਜ ਕੋਈ ਵੀ ਅਧਿਕਾਰੀ ਕਿਸਾਨ ਧਰਨੇ ਦੇ ਮੱਦੇਨਜ਼ਰ ਕੁਰਕੀ ਕਰਨ ਨਹੀਂ ਆਇਆ।

ਪੁਲੀਸ ਇਮਦਾਦ ਨਾ ਮਿਲਣ ਕਰਕੇ ਸੰਭਵ ਨਹੀਂ ਹੋ ਸਕੀ ਕਾਰਵਾਈ

ਤਹਿਸੀਲਦਾਰ ਧੂਰੀ ਵਿਸਵਾਜੀਤ ਸਿੰਘ ਨੇ ਕਿਹਾ ਕਿ ਇਹ ਨਾਇਬ ਤਹਿਸੀਲਦਾਰ ਦੇ ਅਧਿਕਾਰ ਖੇਤਰ ਵਾਲੇ ਏਰੀਏ ਦਾ ਮਾਮਲਾ ਹੈ ਅਤੇ ਉਹੀ ਦੱਸ ਸਕਦੇ ਹਨ। ਨਾਇਬ ਤਹਿਸੀਲਦਾਰ ਮਨੀ ਮਹਾਜਨ ਨੇ ਦੱਸਿਆ ਕਿ ਅੰਡਰ ਸੈਕਸ਼ਨ 14 ਆਫ਼ ਸਰਫੇਸ਼ੀ ਐਕਟ 2002 ਤਹਿਤ ਹੋਣ ਵਾਲੀ ਕਾਰਵਾਈ ਪੁਲੀਸ ਇਮਦਾਦ ਨਾ ਮਿਲਣ ਕਰਕੇ ਸੰਭਵ ਨਹੀਂ ਹੋ ਸਕੀ।