ਜੀਐਨਡੀਯੂ ’ਚ ਜ਼ੋਨਲ ਯੁਵਕ ਮੇਲਾ ਭਲਕ ਤੋਂ

ਪੱਤਰ ਪ੍ਰੇਰਕ
ਅੰਮ੍ਰਿਤਸਰ, 7 ਅਕਤੂਬਰ
ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ (ਜੀਐੱਨਡੀਯੂ) ਦੇ ਦਸਮੇਸ਼ ਆਡੀਟੋਰੀਅਮ ’ਚ ਐਜੂਕੇਸ਼ਨ ਕਾਲਜਾਂ ਦਾ ਦੋ ਰੋਜ਼ਾ ਜ਼ੋਨਲ ਯੁਵਕ ਮੇਲਾ 9 ਤੇ 10 ਅਕਤੂਬਰ ਨੂੰ ਹੋਵੇਗਾ। ਯੁਵਕ ਮਾਮਲਿਆਂ ਦੇ ਇੰਚਾਰਜ ਡਾ. ਅਮਨਦੀਪ ਸਿੰਘ ਨੇ ਦੱਸਿਆ ਕਿ ਤਿੰਨ ਦਿਨ ਚੱਲਣ ਵਾਲੇ ਇਸ ਯੁਵਕ ਮੇਲੇ ਵਿਚ ਵੀਹ ਐਜੂਕੇਸ਼ਨ ਕਾਲਜਾਂ ਦੇ 300 ਕਲਾਕਾਰ ਵਿਦਿਆਰਥੀ ਹਿੱਸਾ ਲੈ ਰਹੇ ਹਨ, ਜਿਹੜੇ ਵੱਖ-ਵੱਖ ਸਟੇਜਾਂ ’ਤੇ 35 ਮੁਕਾਬਲਿਆਂ ’ਚ ਆਪਣੀ ਕਲਾ ਦਾ ਪ੍ਰਦਰਸ਼ਨ ਕਰਨਗੇ। ਉਨ੍ਹਾਂ ਦੱਸਿਆ ਕੇ ਮੇਲੇ ਦੇ ਪਹਿਲੇ ਦਿਨ ਕੌਸਟਿਊਮ ਪਰੇਡ, ਮਿਮਿਕਰੀ, ਸਕਿੱਟ, ਗੀਤ/ਗਜ਼ਲ ਅਤੇ ਲੋਕ ਗੀਤ ਦੇ ਮੁਕਾਬਲੇ ਦਸਮੇਸ਼ ਆਡੀਟੋਰੀਅਮ ਕਰਵਾਏ ਜਾਣਗੇ। ਆਰਕੀਟੈਕਚਰ ਵਿਭਾਗ ’ਚ ਪੇਂਟਿੰਗ ਆਨ ਦਿ ਸਪਾਟ, ਸਕੈਚਿੰਗ, ਪੋਸਟਰ ਮੇਕਿੰਗ, ਕੋਲਾਜ਼, ਕਲੇਅ ਮਾਡਲਿੰਗ, ਸਲੋਗਨ ਰਾਈਟਿੰਗ ਅਤੇ ਕਾਰਟੂਨਿੰਗ ਮੁਕਾਬਲੇ ਹੋਣਗੇ। ਕਾਨਫਰੰਸ ਹਾਲ ’ਚ ਐਲੋਕਿਊਸ਼ਨ, ਡਿਬੇਟ ਆਦਿ ਕਰਵਾਏ ਜਾਣਗੇ। ਦੂਜੇ ਦਿਨ 10 ਅਕਤੂਬਰ ਨੂੰ ਦਸਮੇਸ਼ ਆਡੀਟੋਰੀਅਮ ’ਚ ਹੋਣ ਵਾਲੇ ਮੁਕਾਬਲਿਆਂ ਵਿਚ ਗਰੁੱਪ ਸ਼ਬਦ ਭਜਨ, ਗਰੁੱਪ ਸਾਂਗ ਇੰਡੀਅਨ ਅਤੇ ਗਿੱਧਾ ਹੋਵੇਗਾ। ਇਸੇ ਦਿਨ ਆਰਕੀਟੈਕਚਰ ਵਿਭਾਗ ਵਿਚ ਰੰਗੋਲੀ, ਫੁਲਕਾਰੀ, ਮਹਿੰਦੀ ਅਤੇ ਪੇਂਟਿੰਗ ਸਟਿੱਲ ਲਾਈਫ ਮੁਕਾਬਲੇ ਹੋਣਗੇ। ਕਾਨਫਰੰਸ ਹਾਲ ਵਿਚ ਕੁਇਜ਼ ਤੇ ਪ੍ਰੀਲਿਮਨਰੀ ਤੇ ਫਾਈਨਲ ਮੁਕਾਬਲਿਆਂ ਤੋਂ ਬਾਅਦ ਦਸਮੇਸ਼ ਆਡੀਟੋਰੀਅਮ ’ਚ ਇਨਾਮ ਵੰਡ ਸਮਾਰੋਹ ਕਰਵਾਇਆ ਜਾਵੇਗਾ।