ਵਾਈਐੱਸ ਪਬਲਿਕ ਸਕੂਲ ਨੇ ਜਿੱਤਿਆ ‘ਸਰਵੋਤਮ ਸਕੂਲ ਪੁਰਸਕਾਰ’

ਰਵਿੰਦਰ ਰਵੀ
ਬਰਨਾਲਾ, 20 ਨਵੰਬਰ
ਭਾਰਤ ਦੇ ਚੋਟੀ ਦੇ 50 ਸਕੂਲਾਂ ਵਿੱਚ ਸ਼ੁਮਾਰ ਵਾਈਐੱਸ ਪਬਲਿਕ ਸਕੂਲ ਨੇ ਚੰਡੀਗੜ੍ਹ ਯੂਨੀਵਰਸਿਟੀ ਵਿੱਚ ਕਰਵਾਏ ‘ਫੈਪ’ ਨੈਸ਼ਨਲ ਐਵਾਰਡ 2024 ਵਿੱਚ ਸ਼ਾਨਦਾਰ ਸਫ਼ਲਤਾ ਪ੍ਰਾਪਤ ਕੀਤੀ ਹੈ। ਫੈਡਰੇਸ਼ਨ ਆਫ ਪ੍ਰਾਈਵੇਟ ਸਕੂਲ ਐਂਡ ਐਸੋਸੀਏਸ਼ਨ ਆਫ ਪੰਜਾਬ ‘ਫੈਪ’ ਨੇ ਵਾਈਐੱਸ ਪਬਲਿਕ ਸਕੂਲ ਨੂੰ ਖੇਡਾਂ ਵਿੱਚ ਉੱਤਮਤਾ ਦਿਖਾਉਣ ਲਈ ਸਰਵੋਤਮ ਸਕੂਲ ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ ਅਤੇ ਵਾਈਐੱਸ ਪਬਲਿਕ ਸਕੂਲ ਦੇ ਖੇਡ ਡਾਇਰੈਕਟਰ ਜਤਿੰਦਰਜੀਤ ਸਿੰਘ ਨੂੰ ਵਿਦਿਆਰਥੀਆਂ ਨੂੰ ਖੇਡਾਂ ਵਿੱਚ ਸ਼ਾਨਦਾਰ ਕੋਚਿੰਗ ਪ੍ਰਦਾਨ ਕਰਨ ਲਈ ਸਰਵੋਤਮ ਖੇਡ ਕੋਚ ਨਾਲ ਸਨਮਾਨਿਤ ਕੀਤਾ ਗਿਆ। ਵਾਈਐੱਸ ਪਬਲਿਕ ਸਕੂਲ ਦੇ 6 ਰਾਸ਼ਟਰੀ ਅਤੇ ਰਾਜ ਪੱਧਰੀ ਜੇਤੂ ਵਿਦਿਆਰਥੀਆਂ ਜਿਵੇਂ ਕਿ ਵੱਖ-ਵੱਖ ਖੇਡਾਂ ਵਿੱਚ ਮਹਿਕਪ੍ਰੀਤ ਕੌਰ, ਜੈਸਮੀਨ ਕੌਰ, ਅਨਮੋਲਪ੍ਰੀਤ ਕੌਰ, ਖੁਸ਼ਪ੍ਰੀਤ ਕੌਰ, ਹੁਸਨਪ੍ਰੀਤ ਸਿੰਘ ਮੱਲ੍ਹੀ ਅਤੇ ਅਨੁਰੀਤ ਕੌਰ ਨੂੰ ਉਨ੍ਹਾਂ ਦੀਆਂ ਪ੍ਰਾਪਤੀਆਂ ਲਈ ਟਰਾਫੀਆਂ ਅਤੇ ਸਰਟੀਫਿਕੇਟ ਦਿੱਤੇ ਗਏ। ਇਹ ਐਵਾਰਡ ਸੰਸਦ ਮੈਂਬਰ ਸਤਨਾਮ ਸਿੰਘ ਸੰਧੂ, ‘ਫੈਪ’ ਦੇ ਪ੍ਰਧਾਨ ਜਗਜੀਤ ਸਿੰਘ, ਸੀਯੂ ਦੇ ਵਾਈਸ ਚਾਂਸਲਰ ਡਾ. ਮਨਪ੍ਰੀਤ ਸਿੰਘ ਮੰਨਾ ਅਤੇ ਗੁਰਨਾਮ ਭੁੱਲਰ ਪੰਜਾਬੀ ਸਿੰਗਰ ਵੱਲੋਂ ਦਿੱਤਾ ਗਿਆ। ਸਕੂਲ ਦੇ ਖੇਡ ਡਾਇਰੈਕਟਰ ਜਤਿੰਦਰਜੀਤ ਸਿੰਘ ਨੇ ਕਿਹਾ ਕਿ ‘‘ਖੇਡਾਂ ਵਿੱਚ ਕੈਰੀਅਰ ਸਿਰਫ਼ ਇੱਕ ਨਿੱਜੀ ਪ੍ਰਾਪਤੀ ਨਹੀਂ ਹੈ, ਸਗੋਂ ਦੇਸ਼ ਲਈ ਇੱਕ ਬਹੁਤ ਮਾਣ ਵਾਲੀ ਗੱਲ ਹੈ। ਪੇਸ਼ੇਵਰ ਖੇਡਣ ਤੋਂ ਲੈ ਕੇ ਕੋਚਿੰਗ ਤੱਕ, ਸੰਭਾਵਨਾਵਾਂ ਬੇਅੰਤ ਹਨ।’’ ਸਕੂਲ ਦੀ ਪ੍ਰਿੰਸੀਪਲ ਡਾ. ਅੰਜਿਤਾ ਦਹੀਆ ਨੇ ਜੇਤੂਆਂ ਨੂੰ ਵਧਾਈ ਦਿੱਤੀ ਅਤੇ ਆਖਿਆ, ‘‘ਖੇਡਾਂ ਸਿਰਫ਼ ਸਰੀਰਕ ਗਤੀਵਿਧੀਆਂ ਹੀ ਨਹੀਂ ਹਨ, ਇਹ ਸੰਪੂਰਨ ਸਿੱਖਿਆ ਦਾ ਆਧਾਰ ਹਨ। ਇਹ ਅਨੁਸ਼ਾਸਨ ਅਤੇ ਟੀਮ ਵਰਕ ਸਿਖਾਉਂਦੀਆਂ ਹਨ। ਚੰਗੇ ਵਿਅਕਤੀਆਂ ਨੂੰ ਨਿਖਾਰਦੀਆਂ ਹਨ।’’