ਵਾਇਨਾਡ ਨੂੰ ਆਲਮੀ ਸੈਰ-ਸਪਾਟਾ ਕੇਂਦਰ ਬਣਾਵਾਂਗੇ: ਗਾਂਧੀ

ਵਾਇਨਾਡ, 11 ਨਵੰਬਰ
ਕਾਂਗਰਸ ਆਗੂ ਰਾਹੁਲ ਗਾਂਧੀ ਨੇ ਵਾਇਨਾਡ ਲੋਕ ਸਭਾ ਸੀਟ ’ਤੇ ਹੋਣ ਜਾ ਰਹੀ ਜ਼ਿਮਨੀ ਚੋਣ ਦੇ ਪ੍ਰਚਾਰ ਦੇ ਆਖਰੀ ਦਿਨ ਅੱਜ ਆਪਣੀ ਭੈਣ ਪ੍ਰਿਯੰਕਾ ਗਾਂਧੀ ਵਾਡਰਾ ਨਾਲ ਲੋਕਾਂ ਨੂੰ ਸੰਬੋਧਨ ਕੀਤਾ ਅਤੇ ਵਾਇਨਾਡ ਨੂੰ ਦੁਨੀਆ ਦੇ ਅਹਿਮ ਸੈਰ-ਸਪਾਟਾ ਕੇਂਦਰਾਂ ਦੀ ਸ਼੍ਰੇਣੀ ’ਚ ਲਿਆਉਣ ਦਾ ਵਾਅਦਾ ਕੀਤਾ।
ਪਾਰਟੀ ਦੇ ਜਨਰਲ ਸਕੱਤਰ ਪ੍ਰਿਯੰਕਾ ਗਾਂਧੀ ਇਸ ਉਪ ਚੋਣ ’ਚ ਸਾਂਝੇ ਜਮਹੂਰੀ ਮੋਰਚਾ (ਯੂਡੀਐੱਫ) ਦੀ ਉਮੀਦਵਾਰ ਹੈ। ਰਾਹੁਲ ਨੇ ਇੱਥੇ ਸੁਲਤਾਨ ਬਾਥਰੀ ’ਚ ਅਸੰਪਸ਼ਨ ਜੰਕਸ਼ਨ ਤੋਂ ਚੁੰਗਮ ਜੰਕਸ਼ਨ ਤੱਕ ਪ੍ਰਿਯੰਕਾ ਨਾਲ ਰੋਡ ਸ਼ੋਅ ਕਰਨ ਮਗਰੋਂ ਰੈਲੀ ਨੂੰ ਸੰਬੋਧਨ ਕਰਦਿਆਂ ਕਿਹਾ, ‘ਇੱਕ ਚੁਣੌਤੀ ਦੇ ਰੂਪ ’ਚ ਮੈਂ ਵਾਇਨਾਡ ਨੂੰ ਦੁਨੀਆ ਦਾ ਸਭ ਤੋਂ ਚੰਗਾ ਸੈਰ-ਸਪਾਟਾ ਕੇਂਦਰ ਬਣਾਉਣ ’ਚ ਉਨ੍ਹਾਂ ਦੀ (ਪ੍ਰਿਯੰਕਾ ਗਾਂਧੀ ਦੀ) ਮਦਦ ਕਰਾਂਗਾ।’ ਲੋਕ ਸਭਾ ’ਚ ਵਿਰੋਧੀ ਧਿਰ ਦੇ ਨੇਤਾ ਨੇ ਕਿਹਾ ਕਿ ਵਾਇਨਾਡ ਦੇ ਲੋਕਾਂ ਨੇ ਉਨ੍ਹਾਂ ਨੂੰ ਸਿਖਾਇਆ ਕਿ ਰਾਜਨੀਤੀ ’ਚ ਪ੍ਰੇਮ ਸ਼ਬਦ ਦਾ ਵੱਡਾ ਮਹੱਤਵ ਹੈ। ਉਨ੍ਹਾਂ ਕਿਹਾ, ‘ਮੈਂ ਉਸ ਸ਼ਬਦ ਦੀ ਵਰਤੋਂ ਨਹੀਂ ਕੀਤੀ ਪਰ ਵਾਇਨਾਡ ਦੇ ਲੋਕਾਂ ਨੇ ਮੈਨੂੰ ਸਿਖਾਇਆ ਕਿ ਰਾਜਨੀਤੀ ’ਚ ਇਸ ਸ਼ਬਦ ਦੀ ਵੱਡੀ ਥਾਂ ਹੈ।’ ਕਾਂਗਰਸ ਨੇਤਾ ਨੇ ਇਹ ਵੀ ਕਿਹਾ ਕਿ ਨਫਰਤ ਤੇ ਗੁੱਸੇ ਨਾਲ ਲੜਨ ਲਈ ਪਿਆਰ ਤੇ ਸਨੇਹ ਹੀ ਇੱਕੋ-ਇੱਕ ਹਥਿਆਰ ਹੈ। ਸੁਲਤਾਨ ਬਾਥਰੀ ’ਚ ਅਸੰਪਸ਼ਨ ਜੰਕਸ਼ਨ ਤੋਂ ਚੁੰਗਮ ਜੰਕਸ਼ਨ ਤੱਕ ਸੜਕ ਦੇ ਦੋਵੇਂ ਪਾਸੇ ਲੋਕਾਂ ਦੀ ਭਾਰੀ ਭੀੜ ਦਿਖਾਈ ਦਿੱਤੀ।
ਵਾਇਨਾਡ ਲੋਕ ਸਭਾ ਸੀਟ ’ਤੇ ਜ਼ਿਮਨੀ ਚੋਣ 13 ਨਵੰਬਰ ਨੂੰ ਹੋਵੇਗੀ। ਹਾਲ ਹੀ ’ਚ ਲੋਕ ਸਭਾ ਚੋਣਾਂ ਵਿੱਚ ਰਾਏਬਰੇਲੀ ਤੋਂ ਆਪਣੀ ਜਿੱਤ ਮਗਰੋਂ ਰਾਹੁਲ ਗਾਂਧੀ ਨੇ ਵਾਇਨਾਡ ਸੀਟ ਤੋਂ ਅਸਤੀਫਾ ਦੇ ਦਿੱਤਾ ਸੀ ਜਿਸ ਕਾਰਨ ’ਤੇ ਉਪ ਚੋਣ ਹੋ ਰਹੀ ਹੈ। -ਪੀਟੀਆਈ