ਲੋਕ ਸਭਾ ਚੋਣਾਂ ਦੇ 6ਵੇਂ ਗੇੜ ਲਈ ਮਤਦਾਨ ਅੱਜ

ਨਵੀਂ ਦਿੱਲੀ, 24 ਮਈ
ਲੋਕ ਸਭਾ ਚੋਣਾਂ ਦੇ 6ਵੇਂ ਗੇੜ ਲਈ ਸ਼ਨਿੱਚਰਵਾਰ ਨੂੰ ਛੇ ਰਾਜਾਂ ਤੇ ਦੋ ਕੇਂਦਰ ਸ਼ਾਸਿਤ ਪ੍ਰਦੇਸ਼ਾਂ ਵਿਚ ਪੈਂਦੀਆਂ 58 ਸੀਟਾਂ ਲਈ ਮਤਦਾਨ ਹੋਵੇਗਾ। ਇਨ੍ਹਾਂ ਵਿਚ ਦਿੱਲੀ ਦੀਆਂ 7 ਤੇ ਹਰਿਆਣਾ ਦੀਆਂ 10 ਸੀਟਾਂ ਵੀ ਸ਼ਾਮਲ ਹਨ। ਹਰਿਆਣਾ ਦੀ ਕਰਨਾਲ ਵਿਧਾਨ ਸਭਾ ਸੀਟ ਲਈ ਜ਼ਿਮਨੀ ਚੋਣ ਵੀ ਭਲਕੇ ਹੀ ਹੋਵੇਗੀ। ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਇਥੋਂ ਉਮੀਦਵਾਰ ਹਨ। ਕੌਮੀ ਰਾਜਧਾਨੀ ਤੋਂ ਇਲਾਵਾ ਭਲਕੇ ਉੱਤਰ ਪ੍ਰਦੇਸ਼ ਦੀਆਂ 14 ਸੀਟਾਂ, ਬਿਹਾਰ ਤੇ ਪੱਛਮੀ ਬੰਗਾਲ ਦੀਆਂ 8-8 , ਉੜੀਸਾ 6, ਝਾਰਖੰਡ 4 ਤੇ ਜੰਮੂ ਕਸ਼ਮੀਰ (ਅਨੰਤਨਾਗ-ਰਾਜੌਰੀ) ਦੀ ਇਕ ਸੀਟ ਲਈ ਵੀ ਪੋਲਿੰਗ ਹੋਵੇਗੀ। ਲੋਕ ਸਭਾ ਚੋਣਾਂ ਦੇ ਨਾਲ ਉੜੀਸਾ ਦੇ 42 ਅਸੈਂਬਲੀ ਹਲਕਿਆਂ ਲਈ ਵੀ ਮਤਦਾਨ ਹੋਵੇਗਾ। ਛੇਵੇਂ ਗੇੇੜ ਵਿਚ 11.13 ਕਰੋੜ ਤੋਂ ਵੱਧ ਵੋਟਰ, ਜਿਨ੍ਹਾਂ ਵਿਚ 5.84 ਕਰੋੜ ਪੁਰਸ਼, 5.29 ਕਰੋੜ ਮਹਿਲਾ ਤੇ 5120 ਕਿੰਨਰ ਸ਼ਾਮਲ ਹਨ, ਆਪਣੇ ਜਮਹੂਰੀ ਹੱਕ ਦਾ ਇਸਤੇਮਾਲ ਕਰਨਗੇ। ਚੋਣ ਕਮਿਸ਼ਨ ਨੇ 1.14 ਲੱਖ ਪੋਲਿੰਗ ਬੂਥਾਂ ’ਤੇ ਕਰੀਬ 11.4 ਲੱਖ ਪੋਲਿੰਗ ਅਧਿਕਾਰੀ ਤਾਇਨਾਤ ਕੀਤੇ ਹਨ। ਛੇਵੇਂ ਗੇੜ ਵਿਚ ਚੋਣ ਪਿੜ ’ਚ ਸਿਆਸੀ ਕਿਸਮਤ ਅਜ਼ਮਾਉਣ ਵਾਲੇ ਪ੍ਰਮੁੱਖ ਉਮੀਦਵਾਰਾਂ ਵਿਚ ਕੇਂਦਰੀ ਮੰਤਰੀ ਧਰਮੇਂਦਰ ਪ੍ਰਧਾਨ, ਰਾਓ ਇੰਦਰਜੀਤ ਸਿੰਘ ਤੇ ਕ੍ਰਿਸ਼ਨ ਪਾਲ ਗੁੱਜਰ, ਭਾਜਪਾ ਦੀ ਮੇਨਕਾ ਗਾਂਧੀ, ਸੰਬਿਤ ਪਾਤਰਾ, ਮਨੋਹਰ ਲਾਲ ਖੱਟਰ, ਨਵੀਨ ਜਿੰਦਲ ਤੇ ਮਨੋਜ ਤਿਵਾੜੀ, ਪੀਡੀਪੀ ਮੁਖੀ ਮਹਿਬੂਬਾ ਮੁਫ਼ਤੀ, ਕਾਂਗਰਸ ਦੇ ਦੀਪੇਂਦਰ ਸਿੰਘ ਹੁੱਡਾ, ਰਾਜ ਬੱਬਰ ਤੇ ਕਨ੍ਹੱਈਆ ਕੁਮਾਰ ਦੇ ਨਾਂ ਸ਼ਾਮਲ ਹਨ। -ਪੀਟੀਆਈ