ਵਿਰਾਟ ਕੋਹਲੀ ਤੇ ਅਨੁਸ਼ਕਾ ਸ਼ਰਮਾ ਦੀ ਬਾਰਬਾਡੋਸ ਦੀ ਫੋਟੋ ਵਾਇਰਲ

ਬਰਿੱਜਟਾਊਨ: ਭਾਰਤੀ ਕ੍ਰਿਕਟ ਖਿਡਾਰੀ ਵਿਰਾਟ ਕੋਹਲੀ ਨੇ ਆਪਣੀ ਪਤਨੀ ਤੇ ਬੌਲੀਵੁੱਡ ਅਦਾਕਾਰਾ ਅਨੁਸ਼ਕਾ ਸ਼ਰਮਾ ਨਾਲ ਹਾਲ ਹੀ ’ਚ ਬਾਰਬਾਡੋਸ ’ਚ ਛੁੱਟੀਆਂ ਮਨਾਉਣ ਦੀ ਇਕ ਤਸਵੀਰ ਸਾਂਝੀ ਕੀਤੀ ਹੈ, ਜਿਸ ’ਚ ਉਹ ਆਪਣੀ ਪਤਨੀ ਅਨੁਸ਼ਕਾ ਨਾਲ ਕੈਫੇ ਦੇ ਬਾਹਰ ਪੋਜ਼ ਦਿੰਦੇ ਨਜ਼ਰ ਆ ਰਹੇ ਹਨ। ਇਸ ਜੋੜੀ ਨੇ ਕੈਜ਼ੂਅਲ ਕੱਪੜੇ ਪਾਏ ਹੋਏ ਹਨ। ਹੁਣ ਉਨ੍ਹਾਂ ਦੀ ਬਾਰਬਾਡੋਸ ਦੀ ਇੱਕ ਹੋਰ ਤਸਵੀਰ ਸੋਸ਼ਲ ਮੀਡੀਆ ’ਤੇ ਸਾਹਮਣੇ ਆਈ ਹੈ ਜਿਸ ਵਿੱਚ ਵਿਰਾਟ ਅਤੇ ਅਨੁਸ਼ਕਾ ਕੈਫੇ ਵਿੱਚ ਦੁਪਹਿਰ ਦਾ ਖਾਣਾ ਖਾ ਰਹੇ ਹਨ। ਇਸ ਦੌਰਾਨ ਵਿਰਾਟ ਤੇ ਅਨੁਸ਼ਕਾ ਮੁਸਕਰਾਉਂਦੇ ਨਜ਼ਰ ਆ ਰਹੇ ਹਨ। ਇਸ ਮੌਕੇ ਅਨੁਸ਼ਕਾ ਨੇ ਚਿੱਟੇ ਸਲਿੱਪ-ਆਨ ਅਤੇ ਮੈਚਿੰਗ ਸਨਗਲਾਸ ਨਾਲ ਲੰਬੀ ਨੀਲੀ ਕਮੀਜ਼ ਪਾਈ ਹੋਈ ਹੈ। ਦੂਜੇ ਪਾਸੇ ਵਿਰਾਟ ਨੇ ਨੀਲੇ ਰੰਗ ਦੀ ਟੀ-ਸ਼ਰਟ, ਪ੍ਰਿੰਟਿਡ ਸਫੈਦ ਸ਼ਾਰਟਸ ਅਤੇ ਹਰੇ ਰੰਗ ਦੀ ਟੋਪੀ ਪਾਈ ਹੋਈ ਹੈ। ਦੱਸਣਾ ਬਣਦਾ ਹੈ ਕਿ ਵਿਰਾਟ ਤੇ ਅਨੁਸ਼ਕਾ ਨੇ ਇਟਲੀ ਵਿੱਚ ਵਿਆਹ ਕਰਵਾਇਆ ਸੀ। ਉਨ੍ਹਾਂ ਦੇ ਘਰ ਜਨਵਰੀ 2021 ਵਿੱਚ ਧੀ ਵਾਮਿਕਾ ਦਾ ਜਨਮ ਹੋਇਆ। ਇਸ ਦੌਰਾਨ ਕੰਮ ਦੇ ਮੋਰਚੇ ’ਤੇ ਵਿਰਾਟ ਪਾਕਿਸਤਾਨ ਤੇ ਸ੍ਰੀਲੰਕਾ ਵਿਚ ਹੋਣ ਵਾਲੇ ਏਸ਼ੀਆ ਕੱਪ ਵਿਚ ਭਾਰਤੀ ਕ੍ਰਿਕਟ ਟੀਮ ਦਾ ਹਿੱਸਾ ਹੋਵੇਗਾ ਜਿਸ ਦੇ ਮੈਚ 30 ਅਗਸਤ ਤੋਂ ਸ਼ੁਰੂ ਹੋਣਗੇ ਜਦਕਿ ਉਹ 5 ਅਕਤੂਬਰ ਤੋਂ ਭਾਰਤ ਦੀ ਮੇਜ਼ਬਾਨੀ ਵਿਚ ਹੋਣ ਵਾਲੇ ਆਈਸੀਸੀ ਕ੍ਰਿਕਟ ਵਿਸ਼ਵ ਕੱਪ ਦੌਰਾਨ ਵੀ ਆਪਣੇ ਜੌਹਰ ਦਿਖਾਏਗਾ। ਦੂਜੇ ਪਾਸੇ, ਅਨੁਸ਼ਕਾ ਸ਼ਰਮਾ ਸਪੋਰਟਸ ਬਾਇਓਪਿਕ ਫਿਲਮ ‘ਛਕੜਾ ਐਕਸਪ੍ਰੈੱਸ’ ਵਿੱਚ ਨਜ਼ਰ ਆਵੇਗੀ ਜੋ ਸਾਬਕਾ ਭਾਰਤੀ ਕ੍ਰਿਕਟ ਖਿਡਾਰਨ ਝੂਲਨ ਗੋਸਵਾਮੀ ਦੇ ਜੀਵਨ ’ਤੇ ਅਧਾਰਿਤ ਹੈ ਜੋ ਨੈੱਟਫਲਿੱਕਸ ’ਤੇ ਦਿਖਾਈ ਜਾਵੇਗੀ। -ਏਐੱਨਆਈ