ਵਿਜੀਲੈਂਸ ਵੱਲੋਂ ਪੁੱਡਾ ਦਾ ਜੇਈ ਤੇ ਸਾਥੀ ਰਿਸ਼ਵਤ ਲੈਂਦੇ ਕਾਬੂ

ਪੱਤਰ ਪ੍ਰੇਰਕ
ਬਠਿੰਡਾ, 10 ਅਗਸਤ
ਵਿਜੀਲੈਂਸ ਬਿਓਰੋ ਨੇ ਬਠਿੰਡਾ ਵਿਕਾਸ ਆਥਰਟੀ ਬੀਡੀਏ ਦਫ਼ਤਰ ’ਚ ਅੱਜ ਇੱਕ ਜੂਨੀਅਰ ਇੰਜਨੀਅਰ ਗੁਰਵਿੰਦਰ ਸਿੰਘ ਨੂੰ ਰਿਸ਼ਵਤ ਲੈਂਦਿਆਂ ਰੰਗੇ ਹੱਥੀ ਕਾਬੂ ਕੀਤਾ ਹੈ। ਮੁਲਜ਼ਮ ਜੇਈ ਨੇ ਵਕੀਲ ਗੁਰਤੇਜ ਸਿੰਘ ਕੋਲੋਂ ਘਰ ਦੀ ਐੱਨਓਸੀ ਜਾਰੀ ਕਰਨ ਬਦਲੇ 10 ਹਜ਼ਾਰ ਰੁਪਏ ਦੀ ਮੰਗ ਕੀਤੀ ਸੀ। ਉਕਤ ਜੇਈ ਬੀਡੀਏ ’ਚ ਤਾਇਨਾਤ ਇੱਕ ਪ੍ਰਾਈਵੇਟ ਸੁਰੱਖਿਆ ਮੁਲਾਜ਼ਮ ਗੁਰਮੀਤ ਸਿੰਘ ਰਾਹੀਂ ਪੈਸੇ ਫੜਦਾ ਸੀ। ਸ਼ਿਕਾਇਤਕਰਤਾ ਵਕੀਲ ਨੇ ਸਬੂਤ ਵਜੋਂ ਜੇਈ ਨਾਲ ਹੋਈ ਗੱਲਬਾਤ ਦੀ ਆਡੀਓ ਵੀ ਪੇਸ਼ ਕੀਤੀ। ਸ਼ਿਕਾਇਤ ਦੀ ਜਾਂਚ ਮਰਗੋਂ ਵਿਜੀਲੈਂਸ ਦੀ ਯੋਜਨਾ ਤਹਿਤ ਅੱਜ ਸ਼ਿਕਾਇਤਕਰਤਾ ਨੇ ਮੁਲਜ਼ਮ ਨੂੰ ਪੈਸੇ ਦਿੱਤੇ ਜੋ ਗੁਰਮੀਤ ਸਿੰਘ ਨੇ ਜੇਈ ਦੀ ਦਰਾਜ਼ ’ਚ ਰੱਖ ਦਿੱਤੇ। ਵਿਜੀਲੈਂਸ ਦੀ ਟੀਮ ਨੇ ਮੌਕੇ ’ਤੇ ਗੁਰਮੀਤ ਸਿੰਘ ਤੇ ਗੁਰਵਿੰਦਰ ਸਿੰਘ ਨੂੰ ਦਿੱਤੇ ਗਏ ਨੌਟਾਂ ਸਹਿਤ ਫੜ ਕੇ ਬਠਿੰਡਾ ਦੇ ਥਾਣੇ ’ਚ ਕੇਸ ਦਰਜ ਕਰ ਲਿਆ ਹੈ।