ਚਾਹੜਕੇ ਵਿੱਚ ਪੰਚ ਦੇ ਅਹੁਦੇ ਲਈ ਮਾਮਾ ਤੇ ਭਾਣਜਾ ਆਹਮੋ-ਸਾਹਮਣੇ

ਪੱਤਰ ਪ੍ਰੇਰਕ
ਭੋਗਪੁਰ, 7 ਅਕਤੂਬਰ
ਬਲਾਕ ਭੋਗਪੁਰ ਦੇ ਪਿੰਡ ਚਾਹੜਕੇ ਵਿੱਚ ਪੰਚਾਇਤ ਚੋਣਾਂ ’ਚ ਵਾਰਡ ਨੰਬਰ 4 ਦੇ ਜਗਦੇਵ ਸਿੰਘ ਸੈਣੀ (ਆਪ ਆਗੂ) ਦਾ ਆਪਣੇ ਭਾਣਜੇ ਮਨਦੀਪ ਸਿੰਘ ਮੰਨਾ ਮਝੈਲ (ਕਾਂਗਰਸੀ ਆਗੂ) ਵਿਚਕਾਰ ਚੋਣ ਮੁਕਾਬਲਾ ਹੈ। ਵਿਧਾਇਕ ਬਲਕਾਰ ਸਿੰਘ ਨੇ ਦੋਵਾਂ ਵਿਚਕਾਰ ਸਰਬਸੰਮਤੀ ਕਰਾਉਣ ਲਈ ਕੋਸ਼ਿਸ਼ ਕੀਤੀ ਪਰ ਕਾਮਯਾਬ ਨਹੀਂ ਹੋਏ ਕਿਉਂਕਿ ਉਹ ਆਪਣੇ ਹੀ ਸਮਰਥਕ ਜਗਦੇਵ ਸਿੰਘ ਸੈਣੀ ਦੇ ਚੋਣ ਲੜਨ ਦੇ ਕਾਗਜ਼ ਚੁੱਕਵਾ ਕੇ ਕਾਂਗਰਸੀ ਆਗੂ ਮੰਨਾ ਮਝੈਲ ਨੂੰ ਸਰਬਸੰਮਤੀ ਨਾਲ ਪੰਚ ਬਣਾਉਣਾ ਚਾਹੁੰਦੇ ਸਨ ਪਰ ਸ੍ਰੀ ਸੈਣੀ ਨੇ ਜਵਾਬ ਦੇ ਦਿੱਤਾ। ਵਾਰਡ ਨੰਬਰ-5 ਵਿੱਚ ਵੀ ਜੋਗਿੰਦਰ ਸਿੰਘ ਭੰਗੂ ਦਾ ਉਸ ਦੇ ‘ਆਪ’ ਆਗੂ ਭਾਣਜੇ ਹਰਦਿਆਲ ਸਿੰਘ ਗਿੱਲ ਨਾਲ ਮੁਕਾਬਲਾ ਸੀ ਪਰ ਹਰਦਿਆਲ ਨੇ ਮਾਮੇ ਦਾ ਸਤਿਕਾਰ ਰੱਖਦੇ ਹੋਏ ਆਪਣੇ ਨਾਮਜ਼ਦਗੀ ਕਾਗਜ਼ ਵਾਪਸ ਲੈ ਲਏ। ਇਸ ਕਰ ਕੇ ਜੋਗਿੰਦਰ ਸਿੰਘ ਭੰਗੂ ਬਿਨਾਂ ਚੋਣ ਲੜਿਆਂ ਹੀ ਪੰਚ ਚੁਣੇ ਗਏ।