ਅੰਪਾਇਰ ਲਿਫਟ ’ਚ ਫਸਿਆ, ਆਸਟਰੇਲੀਆ-ਪਾਕਿਸਤਾਨ ਟੈਸਟ ਮੈਚ ਰੁਕਿਆ

ਮੈਲਬਰਨ, 28 ਦਸੰਬਰ
ਤੀਸਰੇ ਅੰਪਾਇਰ ਰਿਚਰਡ ਇਲਿੰਗਵਰਥ ਦੇ ਲਿਫਟ ’ਚ ਫਸ ਜਾਣ ਕਾਰਨ ਆਸਟਰੇਲੀਆ ਅਤੇ ਪਾਕਿਸਤਾਨ ਵਿਚਾਲੇ ਦੂਜੇ ਟੈਸਟ ਕ੍ਰਿਕਟ ਮੁਕਾਬਲੇ ਦੇ ਤੀਜੇ ਦਿਨ ਲੰਚ ਤੋਂ ਬਾਅਦ ਦੀ ਖੇਡ ਰੋਕਣੀ ਪਈ। ਲੰਚ ਤੋਂ ਬਾਅਦ ਖਿਡਾਰੀ ਮੈਦਾਨ ਵਿੱਚ ਪਹੁੰਚ ਗਏ ਸਨ ਪਰ ਕਈ ਮਿੰਟਾਂ ਤੱਕ ਖੇਡ ਰੁਕੀ ਰਹੀ। ਮੈਦਾਨ ’ਚ ਮੌਜੂਦ ਅੰਪਾਇਰਾਂ ਜੌਏਲ ਵਿਲਸਨ ਅਤੇ ਮਾਈਕਲ ਗਾਫ ਨੂੰ ਸੂਚਿਤ ਕੀਤਾ ਗਿਆ ਸੀ ਕਿ ਇਲਿੰਗਵਰਥ ਐੱਮਸੀਜੀ ਵਿੱਚ ਆਪਣੇ ਸਥਾਨ ’ਤੇ ਨਹੀਂ ਪਹੁੰਚੇ ਹਨ। ਇਸ ਮਗਰੋਂ ਪ੍ਰਸਾਰਕਾਂ ਨੇ ਵੀ ਖਾਲੀ ਸੀਟ ਦਿਖਾਈ। ਕ੍ਰਿਕਟ ਆਸਟਰੇਲੀਆ ਨੇ ਸੋਸ਼ਲ ਮੀਡੀਆ ’ਤੇ ਲਿਖਿਆ, ‘‘ਤੀਜੇ ਅੰਪਾਇਰ ਦੇ ਲਿਫਟ ’ਚ ਫਸਣ ਕਾਰਨ ਮੈਚ ’ਚ ਦੇਰੀ ਹੋਈ ਹੈ।’’ ਇਸ ਦੌਰਾਨ ਸਲਾਮੀ ਬੱਲੇਬਾਜ਼ ਡੇਵਿਡ ਵਾਰਨਰ ਨਾਲ ਬੱਲੇਬਾਜ਼ੀ ਕਰ ਰਹੇ ਸਟੀਵ ਸਮਿਥ ਨੇ ਵਿਲਸਨ ਨੂੰ ਪੁੱਛਿਆ ਕਿ ਕੀ ਉਹ ਇਲਿੰਗਵਰਥ ਦੇ ਵਾਪਸ ਆਉਣ ਤੱਕ ਬੈਠ ਸਕਦਾ ਹੈ। ਕੁਝ ਮਿੰਟਾਂ ਬਾਅਦ ਇਲਿੰਗਵਰਥ ਲਿਫਟ ’ਚੋਂ ਬਾਹਰ ਆ ਗਏ ਅਤੇ ਖੇਡ ਸ਼ੁਰੂ ਹੋਈ। -ਪੀਟੀਆਈ