ਭੇਡਾਂ ਖੋਹਣ ਵਾਲੇ ਗਰੋਹ ਦੇ ਦੋ ਮੈਂਬਰ ਗ੍ਰਿਫ਼ਤਾਰ
ਐਸ.ਏ.ਐਸ. ਨਗਰ (ਮੁਹਾਲੀ)
ਮੁਹਾਲੀ ਪੁਲੀਸ ਨੇ ਬੀਤੀ 11 ਫਰਵਰੀ ਦੀ ਰਾਤ ਨੂੰ ਇੱਥੋਂ ਦੇ ਸੈਕਟਰ-94 ਸਥਿਤ ਬੇਆਬਾਦ ਜੰਗਲਨੁਮਾ ਖੇਤਰ ਵਿੱਚ ਗਡਰੀਆ ਦੀ ਕੁੱਟਮਾਰ ਕਰ ਕੇ ਕਰੀਬ 150 ਭੇਡਾਂ ਖੋਹਣ ਵਾਲੇ ਗਰੋਹ ਦੇ ਦੋ ਮੈਂਬਰਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਮੁਲਜ਼ਮਾਂ ਦੀ ਪਛਾਣ ਰੋਸ਼ਨਦੀਨ ਵਾਸੀ ਜਾਹਦਪੁਰ ਅਤੇ ਮੁੱਖ ਮੁਲਜ਼ਮ ਮਾਸੂਮ ਅਲੀ ਉਰਫ਼ ਸੰਮੀ ਵਾਸੀ ਡੇਰਾ ਰਾਏਪੁਰ ਰਾਈਆ ਵਜੋਂ ਹੋਈ ਹੈ। ਮੁਹਾਲੀ ਦੇ ਡੀਐਸਪੀ (ਸਿਟੀ-2) ਹਰਸਿਮਰਨ ਸਿੰਘ ਬੱਲ ਨੇ ਦੱਸਿਆ ਕਿ ਜੰਗਲੀ ਇਲਾਕੇ ’ਚ 4 ਗਡਰੀਏ ਆਪਣੀਆਂ ਕਰੀਬ 650 ਭੇਡਾਂ ਨਾਲ ਆਰਾਮ ਕਰ ਰਹੇ ਸਨ। ਇਸ ਦੌਰਾਨ ਕੁੱਝ ਨਕਾਬਪੋਸ਼ਾਂ ਨੇ ਖ਼ੁਦ ਨੂੰ ਜੰਗਲਾਤ ਵਿਭਾਗ ਦੇ ਕਰਮਚਾਰੀ ਦੱਸ ਕੇ ਜੰਗਲ ਵਿੱਚੋਂ ਲੱਕੜਾਂ ਕੱਟਣ ਦਾ ਦੋਸ਼ ਲਾਉਂਦੇ ਹੋਏ ਗਡਰੀਆਂ ਦੀ ਕੁੱਟਮਾਰ ਕੀਤੀ ਤੇ ਜ਼ਬਰਦਸਤੀ ਕਰੀਬ 150 ਭੇਡਾਂ ਟਰੱਕ ਵਿੱਚ ਲੱਦ ਕੇ ਫ਼ਰਾਰ ਹੋ ਗਏ। ਸੋਹਾਣਾ ਥਾਣੇ ਦੇ ਐੱਸਐੱਚਓ ਇੰਸਪੈਕਟਰ ਜਸਪ੍ਰੀਤ ਸਿੰਘ ਕਾਹਲੋਂ ਦੀ ਅਗਵਾਈ ਵਾਲੀ ਟੀਮ ਨੇ ਦੋ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ ਤੇ ਹੋਰਾਂ ਦੀ ਭਾਲ ਜਾਰੀ ਹੈ। -ਪੱਤਰ ਪ੍ਰੇਰਕ