ਸ਼ਰਾਬ ਸਣੇ ਦੋ ਕਾਬੂ

ਸੰਜੀਵ ਬੱਬੀ
ਚਮਕੌਰ ਸਾਹਿਬ, 20 ਨਵੰਬਰ
ਚਮਕੌਰ ਸਾਹਿਬ ਪੁਲੀਸ ਨੇ ਕਬਾੜ ਦਾ ਕੰਮ ਕਰਨ ਵਾਲੇ ਦੋ ਵਿਅਕਤੀਆਂ ਤੋਂ ਇੱਕ ਜੁਗਾੜੂ ਰਿਕਸ਼ਾ ਰੇਹੜੀ ਵਿੱਚੋਂ 10 ਪੇਟੀਆਂ ਸ਼ਰਾਬ ਦੀਆਂ ਬਰਾਮਦ ਕਰ ਕੇ ਮੁਲਜ਼ਮਾਂ ਵਿਰੁੱਧ ਕੇਸ ਦਰਜ ਕੀਤਾ ਹੈ। ਏਐੱਸਆਈ ਜਰਨੈਲ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਨਰਸਰੀ ਮੋੜ ’ਤੇ ਨਾਕਾਬੰਦੀ ਕੀਤੀ ਹੋਈ ਸੀ। ਉਸ ਸਮੇਂ ਉਨ੍ਹਾਂ ਦੇ ਨਾਲ ਸੌਰਵ ਗੁਪਤਾ ਐਕਸਾਈਜ਼ ਇੰਸਪੈਕਟਰ ਆਬਕਾਰੀ ਸਰਕਲ ਮੋਰਿੰਡਾ ਵੀ ਹਾਜ਼ਰ ਸਨ। ਏਐੱਸਆਈ ਨੇ ਦੱਸਿਆ ਕਿ ਚੈਕਿੰਗ ਦੌਰਾਨ ਇੱਕ ਜੁਗਾੜੂ ਰਿਕਸ਼ਾ ਰੇਹੜੀ ਆਈ ਜਿਸ ’ਤੇ ਕਬਾੜ ਲੱਦਿਆ ਹੋਇਆ ਸੀ। ਇਸ ਉੱਪਰ ਇੱਕ ਹੋਰ ਵਿਅਕਤੀ ਬੈਠਾ ਸੀ ਜਦੋਂ ਰੇਹੜੀ ਨੂੰ ਚੈੱਕ ਕੀਤਾ ਗਿਆ ਤਾਂ ਕਬਾੜ ਦੇ ਹੇਠਾਂ ਤੋਂ 10 ਪੇਟੀਆਂ ਦੇਸੀ ਸ਼ਰਾਬ ਦੀਆਂ ਬਰਾਮਦ ਕੀਤੀਆਂ ਗਈਆਂ। ਉਨ੍ਹਾਂ ਦੱਸਿਆ ਕਿ ਜੁਗਾੜੂ ਰਿਕਸ਼ਾ ਰੇਹੜੀ ਦੇ ਚਾਲਕ ਤੋਂ ਜਦੋਂ ਪੜਤਾਲ ਕੀਤੀ ਤਾਂ ਉਸ ਨੇ ਆਪਣਾ ਨਾਮ ਅਜੇ ਤੇ ਪਿੱਛੇ ਬੈਠੇ ਵਿਅਕਤੀ ਨੇ ਆਪਣਾ ਨਾਮ ਰੋਸ਼ਨ ਲਾਲ ਦੱਸਿਆ।