ਜ਼ਿੰਦਗੀ ਦੀ ਜੰਗ ਹਾਰੀਆਂ ਇਕ ਦਿਲ ਵਾਲੀਆਂ ਜੌੜੀਆਂ ਬੱਚੀਆਂ

ਨਿੱਜੀ ਪੱਤਰ ਪ੍ਰੇਰਕ
ਅੰਬਾਲਾ, 14 ਜੁਲਾਈ
ਛਾਤੀ ਤੇ ਪੇਟ ਤੋਂ ਜੁੜੀਆਂ ਅਤੇ ਇਕ ਦਿਲ ਲੈ ਕੇ ਪੈਦਾ ਹੋਈਆਂ ਜੌੜੀਆਂ ਬੱਚੀਆਂ ਜ਼ਿੰਦਗੀ ਦੀ ਜੰਗ ਹਾਰ ਗਈਆਂ ਹਨ। ਦੋਵਾਂ ਨੇ ਸ਼ਨਿੱਚਰਵਾਰ ਦੇਰ ਰਾਤ ਆਖ਼ਰੀ ਸਾਹ ਲਿਆ। ਪਿਤਾ ਚੁਨਚੁਨ ਨੇ ਅੱਜ ਸਵੇਰੇ ਉਨ੍ਹਾਂ ਨੂੰ ਹੁੱਡਾ ਸੈਕਟਰ-34 ਲਾਗੇ ਟਾਂਗਰੀ ਨਦੀ ਕੋਲ ਸਥਿਤ ਸ਼ਮਸ਼ਾਨਘਾਟ ਵਿੱਚ ਦਫ਼ਨਾ ਦਿੱਤਾ। ਦੱਸ ਦੇਈਏ ਕਿ ਵੀਰਵਾਰ ਦੇਰ ਸ਼ਕੁੰਤਲਾ ਨੂੰ ਜਣੇਪਾ ਪੀੜਾਂ ਹੋਣ ਤੋਂ ਬਾਅਦ ਸਿਵਲ ਹਸਪਤਾਲ ਅੰਬਾਲਾ ਕੈਂਟ ਲਿਆਂਦਾ ਗਿਆ ਸੀ। ਨਾਰਮਲ ਡਿਲਿਵਰੀ ਨਾਲ ਪੈਦਾ ਹੋਈਆਂ ਜੌੜੀਆਂ ਬੱਚੀਆਂ ਦੀ ਛਾਤੀ ਤੇ ਪੇਟ ਜੁੜੇ ਹੋਏ ਸਨ। ਅਲਟਰਾ ਸਾਊਂਡ ਤੋਂ ਪਤਾ ਲੱਗਾ ਸੀ ਕਿ ਦੋਵਾਂ ਦਾ ਦਿਲ ਇੱਕ ਹੀ ਧੜਕ ਰਿਹਾ ਹੈ। ਕੁਝ ਦੇਰ ਬਾਅਦ ਉਨ੍ਹਾਂ ਨੂੰ ਪੀਜੀਆਈ ਰੈਫਰ ਕਰ ਦਿੱਤਾ ਗਿਆ ਪਰ ਉੱਥੇ ਇਲਾਜ ਸੰਭਵ ਨਾ ਹੋਣ ਦਾ ਕਹਿ ਕੇ ਵਾਪਸ ਸਿਵਲ ਹਸਪਤਾਲ ਅੰਬਾਲਾ ਕੈਂਟ ਭੇਜ ਦਿੱਤਾ ਗਿਆ। ਸ਼ੁੱਕਰਵਾਰ ਨੂੰ ਡਾਕਟਰਾਂ ਨੇ ਬੱਚੀਆਂ ਨੂੰ ਦੁਬਾਰਾ ਪੀਜੀਆਈ ਰੈਫਰ ਕੀਤਾ ਤਾਂ ਮਾਪੇ ਅੱਕ ਕੇ ਉਨ੍ਹਾਂ ਨੂੰ ਘਰ ਲੈ ਗਏ ਜਿੱਥੇ ਲੰਘੀ ਰਾਤ ਦੋਵਾਂ ਦੀ ਮੌਤ ਹੋ ਗਈ ਹੈ।