ਧੁੰਦ ਕਾਰਨ ਤਿੰਨ ਟਰੱਕ ਤੇ ਦੋ ਕਾਰਾਂ ਭਿੜੀਆਂ

ਹਰਦੀਪ ਸਿੰਘ
ਧਰਮਕੋਟ, 9 ਨਵੰਬਰ
ਮੋਗਾ-ਅੰਮ੍ਰਿਤਸਰ ਮਾਰਗ ਉੱਤੇ ਪਿੰਡ ਮੱਲੂਬਾਣੀਆ ਨੇੜੇ ਅੱਜ ਤੜਕਸਾਰ ਹਾਦਸੇ ਵਿੱਚ ਝੋਨੇ ਦੇ ਭਰੇ ਤਿੰਨ ਟਰੱਕ ਅਤੇ ਦੋ ਕਾਰਾਂ ਨੁਕਸਾਨੀਆਂ ਗਈਆਂ ਪਰ ਜਾਨੀ ਨੁਕਸਾਨ ਤੋਂ ਬਚਾਅ ਰਿਹਾ।
ਸਰਦੀ ਦੀ ਪਹਿਲੀ ਧੁੰਦ ਪੈਣ ’ਤੇ ਅੱਜ ਤੜਕੇ 3 ਵਜੇ ਦੇ ਕਰੀਬ ਪਿੰਡ ਮੱਲੂਬਾਣੀਆ ਨੇੜੇ ਖੜ੍ਹੇ ਟਰੱਕ ਵਿੱਚ ਝੋਨੇ ਦੇ ਭਰੇ ਦੋ ਟਰੱਕ ਆ ਵੱਜੇ। ਇਸ ਦੇ ਨਾਲ ਹੀ ਇਕ ਸਕਾਰਪੀਓ ਗੱਡੀ ਅਤੇ ਇਕ ਸਵਿਫ਼ਟ ਕਾਰ ਵੀ ਇਨ੍ਹਾਂ ਟਰੱਕਾਂ ਵਿੱਚ ਆ ਵੱਜੀ, ਜਿਸ ਕਰ ਕੇ ਟਰੱਕ ਅਤੇ ਕਾਰਾਂ ਬੁਰੀ ਤਰ੍ਹਾਂ ਨੁਕਸਾਨੀਆਂ ਗਈਆਂ। ਚੌਕੀ ਬਘੇਲੇਵਾਲਾ ਦੇ ਇੰਚਾਰਜ ਅਨਵਰ ਮਸੀਹ ਨੇ ਦੱਸਿਆ ਕਿ ਇਹ ਹਾਦਸਾ ਖ਼ਰਾਬ ਖੜ੍ਹੇ ਟਰੱਕ ਕਾਰਨ ਵਾਪਰਿਆ ਹੈ। ਉਨ੍ਹਾਂ ਦੱਸਿਆ ਕਿ ਪੁਲੀਸ ਨੇ ਮੌਕੇ ’ਤੇ ਪੁੱਜ ਕੇ ਘਟਨਾ ਬਾਰੇ ਜਾਣਕਾਰੀ ਪ੍ਰਾਪਤ ਕੀਤੀ ਅਤੇ ਟਰੱਕਾਂ ਵਾਲਿਆਂ ਦੀ ਆਪਸੀ ਸਹਿਮਤੀ ਹੋਣ ਸਦਕਾ ਕੋਈ ਪੁਲੀਸ ਕਾਰਵਾਈ ਅਮਲ ਵਿੱਚ ਨਹੀਂ ਲਿਆਂਦੀ ਗਈ ਹੈ।