ਕੇਂਦਰੀ ਜੇਲ੍ਹ ਵਿੱਚੋਂਂ ਭੱਜਣ ਦੇ ਦੋਸ਼ ਹੇਠ ਤਿੰਨ ਕੈਦੀ ਨਾਮਜ਼ਦ

ਟ੍ਰਿਬਿਉੂਨ ਨਿਉੂਜ਼ ਸਰਵਿਸ

ਅੰਮ੍ਰਿਤਸਰ, 28 ਜੂਨ

ਸਥਾਨਕ ਕੇਂਦਰੀ ਜੇਲ੍ਹ ਦੀ ਬੈਰਕ ਨੂੰ ਸੰਨ੍ਹ ਲਾ ਕੇ ਅਤੇ ਛੱਤ ‘ਤੇ ਚੜ੍ਹ ਕੇ ਭੱਜਣ ਦੇ ਦੋਸ਼ ਹੇਠ ਪੁਲੀਸ ਨੇ ਤਿੰਨ ਕੈਦੀਆਂ ਖ਼ਿਲਾਫ਼ ਕੇਸ ਦਰਜ ਕੀਤਾ ਹੈ। ਇਨ੍ਹਾਂ ਵਿੱਚੋਂ ਦੋ ਨੂੰ ਜੇਲ੍ਹ ਪ੍ਰਸ਼ਾਸਨ ਨੇ ਮੌਕੇ ‘ਤੇ ਗ੍ਰਿਫ਼ਤਾਰ ਕਰ ਲਿਆ ਜਦੋਂਕਿ ਤੀਜੇ ਨੂੰ ਮੁੱਢਲੀ ਜਾਂਚ ਤੋਂ ਬਾਅਦ ਨਾਮਜ਼ਦ ਕੀਤਾ ਹੈ। ਇਨ੍ਹਾਂ ਦੀ ਸ਼ਨਾਖ਼ਤ ਆਕਾਸ਼ਦੀਪ ਸਿੰਘ, ਰਿੰਕੂ ਅਤੇ ਅੰਗਰੇਜ਼ ਸਿੰਘ ਵਜੋਂ ਹੋਈ ਹੈ।

ਜਾਣਕਾਰੀ ਮੁਤਾਬਕ ਇਨ੍ਹਾਂ ਨੇ ਬੈਰਕ ਦੀ ਕੰਧ ਵਿੱਚ ਸੰਨ੍ਹ ਲਾਉਣ ਵਾਸਤੇ ਗ੍ਰਿੱਲ ਦੇ ਸਰੀਏ ਦੀ ਵਰਤੋਂ ਕੀਤੀ ਹੈ। ਇਹ ਘਟਨਾ 23 ਤੇ 24 ਜੂਨ ਦੀ ਦਰਮਿਆਨੀ ਰਾਤ ਦੀ ਹੈ ਪਰ ਇਸ ਮਾਮਲੇ ਵਿੱਚ ਕੱਲ੍ਹ ਕੇਸ ਦਰਜ ਕੀਤਾ ਗਿਆ ਹੈ। ਇਸ ਸਬੰਧੀ ਦਰਜ ਕੀਤੇ ਕੇਸ ਵਿਚ ਇੱਥੇ ਤਾਇਨਾਤ ਇੰਡੀਅਨ ਰਿਜ਼ਰਵ ਬਟਾਲੀਅਨ ਦੇ ਏਐੱਸਆਈ ਅਮਰਜੀਤ ਸਿੰਘ ਨੇ ਦੱਸਿਆ ਕਿ ਉਸ ਰਾਤ ਨਸ਼ਾ ਛਡਾਊ ਕੇਂਦਰ ਦੇ ਨੇੜੇ ਉਸ ਨੇ ਕੁਝ ਹਰਕਤ ਦੇਖੀ ਤੇ ਬੈਰਕ ਦੇ ਪਿਛਲੇ ਪਾਸੇ ਕੁਝ ਆਵਾਜ਼ਾਂ ਵੀ ਸੁਣੀਆਂ। ਉਹ ਜਦੋਂ ਮੌਕੇ ‘ਤੇ ਗਿਆ ਤਾਂ ਉਸ ਨੇ ਨਸ਼ਾ ਛੁਡਾਊ ਬੈਰਕ ਦੀ ਛੱਤ ‘ਤੇ ਇੱਕ ਕੈਦੀ ਨੂੰ ਦੇਖਿਆ ਤੇ ਤੁਰੰਤ ਅਲਾਰਮ ਵਜਾਇਆ। ਇਸ ਤੋਂ ਬਾਅਦ ਇੱਕ ਹੋਰ ਕੈਦੀ ਬੈਰਕ ਦੀ ਕੰਧ ਵਿੱਚ ਕੀਤੀ ਮੋਰੀ ਰਾਹੀਂ ਉਸ ਵਿੱਚ ਵਾਪਸ ਜਾਣ ਦੀ ਕੋਸ਼ਿਸ਼ ਕਰ ਰਿਹਾ ਸੀ। ਉਨ੍ਹਾਂ ਦੋਵਾਂ ਨੂੰ ਤੁਰੰਤ ਕਾਬੂ ਕਰ ਲਿਆ ਗਿਆ ਤੇ ਬਾਅਦ ਵਿੱਚ ਮੁੱਢਲੀ ਜਾਂਚ ਦੌਰਾਨ ਉਨ੍ਹਾਂ ਕੋਲੋਂ ਕੀਤੀ ਪੜਤਾਲ ਦੌਰਾਨ ਇਸ ਵਿੱਚ ਸ਼ਾਮਲ ਉਨ੍ਹਾਂ ਦੇ ਤੀਜੇ ਸਾਥੀ ਦੀ ਸ਼ਮੂਲੀਅਤ ਦਾ ਵੀ ਖ਼ੁਲਾਸਾ ਹੋਇਆ।

ਪੁਲੀਸ ਨੇ ਇਸ ਸਬੰਧ ਵਿੱਚ ਕੇਸ ਦਰਜ ਕੀਤਾ ਹੈ।