ਦੋ ਸਕੇ ਭਰਾਵਾਂ ਦੇ ਕਤਲ ਕੇਸ ਵਿੱਚ ਤਿੰਨ ਗ੍ਰਿਫ਼ਤਾਰ

ਪੱਤਰ ਪ੍ਰੇਰਕ
ਜਲੰਧਰ, 14 ਅਗਸਤ
ਨਕੋਦਰ ਤਹਿਸੀਲ ਦੇ ਪਿੰਡ ਖੀਵਾ ਦੇ ਦੋ ਸਕੇ ਭਰਾਵਾਂ ਦੇ ਨਾਲਾਗੜ੍ਹ ’ਚ ਹੋਏ ਕਤਲ ਮਾਮਲੇ ਵਿੱਚ ਹਿਮਾਚਲ ਪ੍ਰਦੇਸ਼ ਦੀ ਪੁਲੀਸ ਨੇ ਤਿੰਨ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਨਾਲਾਗੜ੍ਹ ਦੇ ਡੀਐੱਸਪੀ ਫਿਰੋਜ਼ ਖ਼ਾਨ ਨੇ ਦੱਸਿਆ ਕਿ ਹਿਮਾਚਲ ਪੁਲੀਸ ਨੇ ਮੁਲਜ਼ਮ ਇੰਦਰਜੀਤ ਇੰਦੂ ਵਾਸੀ ਦੇਸਰਪੁਰ ਜ਼ਿਲ੍ਹਾ ਜਲੰਧਰ ਨੂੰ ਸ਼ਨਿਚਰਵਾਰ ਨੂੰ ਕਸਬਾ ਲੋਹੀਆਂ ਅਤੇ ਮੁਲਜ਼ਮਾਂ ਗੌਰਵ ਗਿੱਲ ਵਾਸੀ ਖੀਵਾ ਜ਼ਿਲ੍ਹਾ ਜਲੰਧਰ ਤੇ ਇੰਦਰਜੀਤ ਸਿੰਘ ਨੂੰ ਦਰਬਾਰ ਸਾਹਿਬ ਅੰਮ੍ਰਿਤਸਰ ਨੇੜਿਓਂ ਗ੍ਰਿਫ਼ਤਾਰ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਮੁੱਢਲੀ ਜਾਂਚ ’ਚ ਇਹ ਮਾਮਲਾ ਪੈਸਿਆਂ ਦੇ ਲੈਣ ਦੇਣ ਦਾ ਲੱਗਦਾ ਹੈ। ਉਕਤ ਦੋਵੇਂ ਭਰਾ ਵਰੁਨ ਤੇ ਕੁਨਾਲ ਨਾਲਾਗੜ੍ਹ ’ਚ ਆਪਣੇ ਮਾਸੜ-ਮਾਸੀ ਕੋਲ ਰਹਿ ਕੇ ਕੰਮ ਕਰਦੇ ਸਨ। ਇਸ ਦੌਰਾਨ ਉਨ੍ਹਾਂ ਦੇ ਦੋਸਤ ਗੌਰਵ ਗਿੱਲ ਨੇ ਆਪਣੇ ਸਾਥੀਆਂ ਨਾਲ ਮਿਲ ਕੇ ਤੇਜ਼ਧਾਰ ਹਥਿਆਰਾਂ ਨਾਲ ਇਨ੍ਹਾਂ ਦਾ ਕਤਲ ਕਰ ਦਿੱਤਾ ਸੀ।