ਆਮਦਨ ਕਰ ਰਿਫੰਡ ਲਈ ਜਾਅਲੀ ਦਾਅਵੇ ਕਰਨ ’ਤੇ ਹੋਵੇਗੀ ਸਜ਼ਾ
07:22 AM Jul 29, 2024 IST
ਨਵੀਂ ਦਿੱਲੀ, 28 ਜੁਲਾਈ
ਆਈਟੀ ਵਿਭਾਗ ਨੇ ਆਮਦਨ ਕਰ ਰਿਟਰਨ ਭਰਨ ਵਾਲਿਆਂ ਨੂੰ ਆਪਣੇ ਜਾਅਲੀ ਖਰਚੇ ਤੇ ਆਪਣੀ ਕਮਾਈ ਘੱਟ ਦੱਸਣ ਤੋਂ ਗੁਰੇਜ਼ ਕਰਨ ਲਈ ਕਿਹਾ ਹੈ। ਵਿਭਾਗ ਨੇ ਕਿਹਾ ਹੈ ਕਿ ਅਜਿਹਾ ਕਰਨ ’ਤੇ ਸਜ਼ਾ ਹੋਵੇਗੀ ਤੇ ਰਿਫੰਡ ਜਾਰੀ ਕਰਨ ਵਿੱਚ ਦੇਰੀ ਹੋ ਸਕਦੀ ਹੈ। ਅਧਿਕਾਰੀਆਂ ਨੇ ਦੱਸਿਆ ਕਿ ਸਾਲ 2024-25 ਲਈ ਆਮਦਨ ਕਰ ਰਿਟਰਨ ਭਰਨ ਦੀ ਆਖਰੀ ਮਿਤੀ 31 ਜੁਲਾਈ ਹੈ ਤੇ ਇਸ ਤੋਂ ਬਾਅਦ ਖਾਤਿਆਂ ਦਾ ਆਡਿਟ ਨਹੀਂ ਕੀਤਾ ਜਾਵੇਗਾ। ਇਨਕਮ ਟੈਕਸ ਵਿਭਾਗ ਅਤੇ ਇਸ ਦੀ ਪ੍ਰਸ਼ਾਸਕੀ ਸੰਸਥਾ ਸੈਂਟਰਲ ਬੋਰਡ ਆਫ ਡਾਇਰੈਕਟ ਟੈਕਸ (ਸੀਬੀਡੀਟੀ) ਅਨੁਸਾਰ 26 ਜੁਲਾਈ ਤੱਕ ਪੰਜ ਕਰੋੜ ਤੋਂ ਵੱਧ ਆਈਟੀਆਰ ਭਰੀਆਂ ਜਾ ਚੁੱਕੀਆਂ ਹਨ। ਆਮਦਨ ਕਰ ਵਿਭਾਗ ਨੇ ਹਾਲ ਹੀ ਵਿੱਚ ਜਨਤਕ ਸੂਚਨਾ ਰਾਹੀਂ ਕਿਹਾ ਸੀ ਕਿ ਟੈਕਸਦਾਤਾਵਾਂ ਨੂੰ ਆਪਣੀ ਰਿਟਰਨ ਸਹੀ ਢੰਗ ਨਾਲ ਭਰਨੀ ਚਾਹੀਦੀ ਹੈ ਤਾਂ ਹੀ ਉਨ੍ਹਾਂ ਨੂੰ ਸਮੇਂ ’ਤੇ ਰਿਫੰਡ ਮਿਲੇਗਾ। ਵਿਭਾਗ ਰਿਫੰਡ ਦੇ ਦਾਅਵੇ ਤਸਦੀਕ ਕਰਨ ਲਈ ਜਾਂਚ ਕਰ ਰਿਹਾ ਹੈ ਜਿਸ ਨਾਲ ਰਿਫੰਡ ’ਚ ਦੇਰੀ ਹੋ ਸਕਦੀ ਹੈ। -ਪੀਟੀਆਈ
Advertisement
Advertisement