ਡਰੇਨਾਂ ਦੀ ਸਫ਼ਾਈ ’ਚ ਘਪਲਾ ਹੋਇਆ: ਸਚਦੇਵਾ

ਪੱਤਰ ਪ੍ਰੇਰਕ
ਨਵੀਂ ਦਿੱਲੀ, 1 ਅਗਸਤ
ਦਿੱਲੀ ਭਾਜਪਾ ਦੇ ਪ੍ਰਧਾਨ ਵਰਿੰਦਰ ਸਚਦੇਵਾ ਨੇ ਅੱਜ ਪ੍ਰੈੱਸ ਕਾਨਫਰੰਸ ਦੌਰਾਨ ਕਿਹਾ ਕਿ ਪਿਛਲੇ ਦੋ-ਤਿੰਨ ਸਾਲਾਂ ਵਿੱਚ ਦਿੱਲੀ ਦਾ ਸੀਵਰ ਸਿਸਟਮ ਅਤੇ ਮੀਂਹ ਦੇ ਪਾਣੀ ਦੀ ਨਿਕਾਸੀ ਪੂਰੀ ਤਰ੍ਹਾਂ ਬਰਬਾਦ ਹੋ ਚੁੱਕੀ ਹੈ, ਹਲਕੀ ਬਰਸਾਤ ਤੋਂ ਬਾਅਦ ਵੀ ਦਿੱਲੀ ਦੀਆਂ ਸੜਕਾਂ ਪਾਣੀ ਵਿੱਚ ਡੁੱਬ ਜਾਂਦੀਆਂ ਹਨ। ਉਨ੍ਹਾਂ ਕਿਹਾ ਕਿ ਦਿੱਲੀ ਵਿੱਚ 1998 ਤੋਂ ਭਾਰਤੀ ਜਨਤਾ ਪਾਰਟੀ ਦਾ ਰਾਜ ਨਹੀਂ ਹੈ ਪਰ ਸਮੇਂ-ਸਮੇਂ ‘ਤੇ ਦਿੱਲੀ ਨਗਰ ਨਿਗਮ ਰਾਹੀਂ ਕਲੋਨੀਆਂ ਦੇ ਛੋਟੇ-ਛੋਟੇ ਨਾਲਿਆਂ ਅਤੇ ਨਾਲਿਆਂ ਦੀ ਸਫਾਈ ਸਾਡੇ ਕਾਰਜਕਾਲ ਦੌਰਾਨ ਕੀਤੀ ਗਈ। ਪਰ ਪਿਛਲੇ ਦੋ ਸਾਲਾਂ ਵਿੱਚ ਦੇਖਿਆ ਹੈ ਕਿ ਭਾਵੇਂ ਮੁੱਖ ਸੜਕ ਹੋਵੇ ਜਾਂ ਕਲੋਨੀਆਂ ਦੀਆਂ ਗਲੀਆਂ, ਸਭ ਵਿੱਚ ਪਾਣੀ ਭਰਨ ਦਾ ਇਹੋ ਹਾਲ ਦੇਖਣ ਨੂੰ ਮਿਲ ਰਿਹਾ ਹੈ। ਇਸ ਕੰਮ ਦਾ ਅਧਿਐਨ ਕਰਨ ਲਈ ਵਿਧਾਇਕ ਮੋਹਨ ਸਿੰਘ ਬਿਸ਼ਟ, ਦਿੱਲੀ ਨਗਰ ਨਿਗਮ ਵਿੱਚ ਵਿਰੋਧੀ ਧਿਰ ਦੇ ਆਗੂ, ਸੀਨੀਅਰ ਨਿਗਮ ਕੌਂਸਲਰ ਸੰਦੀਪ ਕਪੂਰ ਅਤੇ ਪ੍ਰਵੀਨ ਸ਼ੰਕਰ ਕਪੂਰ ਦੀ ਇੱਕ ਅੰਤ੍ਰਿੰਗ ਕਮੇਟੀ ਬਣਾਈ। ਸ੍ਰੀ ਸਚਦੇਵਾ ਨੇ ਕਿਹਾ ਕਿ ਸਾਡੀ ਅੰਤ੍ਰਿੰਗ ਕਮੇਟੀ ਨੇ 20 ਜੂਨ ਦੇ ਆਸ-ਪਾਸ ਸਾਨੂੰ ਸੁਚੇਤ ਕੀਤਾ ਸੀ ਕਿ ਦਿੱਲੀ ਵਿੱਚ 2022 ਵਿੱਚ ਸਿੰਜਾਈ ਵਿਭਾਗ ਨੇ 3 ਲੱਖ ਮੀਟ੍ਰਿਕ ਟਨ, ਲੋਕ ਨਿਰਮਾਣ ਵਿਭਾਗ ਨੇ 2 ਲੱਖ ਮੀਟ੍ਰਿਕ ਟਨ, ਦਿੱਲੀ ਦੀਆਂ ਤਿੰਨ ਨਗਰ ਨਿਗਮਾਂ ਨੇ 2 ਲੱਖ ਮੀਟ੍ਰਿਕ ਟਨ, ਦਿੱਲੀ ਜਲ ਬੋਰਡ ਨੇ 40 ਹਜ਼ਾਰ ਮੀਟ੍ਰਿਕ ਟਨ ਗਾਰ ਕੱਢੀ ਸੀ। ਇਸ ਅੰਦਾਜ਼ੇ ਨਾਲ 2024 ਵਿੱਚ ਕਾਫ਼ੀ ਗਾਰ ਕੱਢੀ ਗਈ ਹੋਵੇਗੀ। ਉਨ੍ਹਾਂ ਕਿਹਾ ਕਿ ਹੁਣ ਸਵਾਲ ਉਠਦਾ ਹੈ ਕਿ ਇਹ ਗਾਰ ਕਿੱਥੇ ਗਈ ਜਾਂ ਫਿਰ ਇਹ ਗਾਰ ਕੱਢੀ ਨਹੀਂ ਗਈ।