ਨੌਜਵਾਨ ਪਿਸਤੌਲ ਅਤੇ ਰੌਂਦ ਸਣੇ ਗ੍ਰਿਫ਼ਤਾਰ

ਪੱਤਰ ਪ੍ਰੇਰਕ
ਰਤੀਆ, 4 ਨਵੰਬਰ
ਨਾਜਾਇਜ਼ ਹਥਿਆਰ ਰੱਖਣ ਦੇ ਦੋਸ਼ ਵਿਚ ਪੁਲੀਸ ਨੇ ਨੌਜਵਾਨ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਥਾਣਾ ਸ਼ਹਿਰ ਰਤੀਆ ਦੇ ਇੰਚਾਰਜ ਰਣਜੀਤ ਸਿੰਘ ਨੇ ਦੱਸਿਆ ਕਿ ਪੁਲੀਸ ਟੀਮ ਐੱਸਆਈ ਕੰਵਰ ਸਿੰਘ ਦੀ ਅਗਵਾਈ ਹੇਠ ਗਸ਼ਤ ਦੌਰਾਨ ਘੱਗਰ ਪੁਲ ਰਤੀਆ ਕੋਲ ਮੌਜੂਦ ਸੀ। ਇਸੇ ਦੌਰਾਨ ਪੁਲੀਸ ਨੂੰ ਸੂਚਨਾ ਮਿਲੀ ਕਿ ਅਕਾਸ਼ਦੀਪ ਸਿੰਘ ਪੁੱਤਰ ਗੁਰਪਾਲ ਸਿੰਘ ਵਾਸੀ ਰਤਨਗੜ੍ਹ ਨਾਜਾਇਜ਼ ਅਸਲੇ ਸਣੇ ਵਾਰਦਾਤ ਨੂੰ ਅੰਜਾਮ ਦੇਣ ਲਈ ਕਮਾਨਾ ਮੋੜ ’ਤੇ ਖੜ੍ਹਾ ਹੈ। ਇਸ ਸੂਚਨਾ ਤੇ ਪੁਲਸ ਟੀਮ ਮੌਕੇ ਤੇ ਪਹੁੰਚੀ ਤਾਂ ਕਮਾਨਾ ਮੋੜ ਤੇ ਇਕ ਨੌਜਵਾਨ ਖੜ੍ਹਾ ਦਿਖਾਈ ਦਿੱਤਾ। ਜਿਵੇਂ ਹੀ ਪੁਲੀਸ ਕਰਮਚਾਰੀ ਗੱਡੀ ਤੋਂ ਉਤਰ ਕੇ ਉਸ ਨੂੰ ਫੜਨ ਲੱਗੇ ਤਾਂ ਨੌਜਵਾਨ ਭੱਜਣ ਲੱਗਿਆ, ਪਰ ਕੁੱਝ ਹੀ ਦੂਰੀ ’ਤੇ ਉਸ ਲੂੰ ਕਾਬੂ ਕਰ ਲਿਆ। ਮੁਲਜ਼ਮ ਦੀ ਪਛਾਣ ਅਕਾਸ਼ਦੀਪ ਵਜੋਂ ਹੋਈ, ਜਿਸ ਕੋਲੋਂ ਪਿਸਤੌਲ 32 ਬੋਰ ਬਰਾਮਦ ਹੋਇਆ।