ਨੌਜਵਾਨਾਂ ਨੇ ਗੱਡੀ ਖੋਹੀ

ਪੱਤਰ ਪ੍ਰੇਰਕ
ਸ੍ਰੀ ਆਨੰਦਪੁਰ ਸਾਹਿਬ, 24 ਨਵੰਬਰ
ਸ੍ਰੀ ਆਨੰਦਪੁਰ ਸਾਹਿਬ-ਨੈਣਾ ਦੇਵੀ ਮੁੱਖ ਮਾਰਗ ’ਤੇ ਪਿੰਡ ਲਮਲੈਹੜੀ ਕੋਲ ਦੋ ਨੌਜਵਾਨਾਂ ਵੱਲੋਂ ਇੱਕ ਕਾਰ ਖੋਹਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਜਾਣਕਾਰੀ ਮੁਤਾਬਕ ਸਥਾਨਕ ਦਸਮੇਸ਼ ਟੈਕਸੀ ਸਟੈਂਡ ਦੀ ਇੱਕ ਗੱਡੀ ਦਾ ਡਰਾਈਵਰ ਸੁਭਾਸ਼ ਚੰਦ ਵਾਸੀ ਟਿੱਬਾ ਟੱਪਰੀਆਂ ਨੇ ਦੋ ਸਵਾਰੀਆਂ ਨੂੰ ਇੱਥੋਂ ਦੇ ਰੇਲਵੇ ਸਟੇਸ਼ਨ ਤੋਂ ਕੌਲਾਂ ਵਾਲੇ ਟੋਭੇ ਛੱਡਣ ਲਈ ਆਪਣੀ ਗੱਡੀ ਵਿੱਚ ਬਿਠਾਇਆ, ਉੱਥੇ ਪੁੱਜਣ ’ਤੇ ਨੌਜਵਾਨਾਂ ਨੇ ਇਹ ਕਹਿ ਕੇ ਉਸ ਨੂੰ ਵਾਪਸ ਮੋੜਿਆ ਕਿ ਉਨ੍ਹਾਂ ਦਾ ਸਾਮਾਨ ਸ੍ਰੀ ਆਨੰਦਪੁਰ ਸਾਹਿਬ ਵਿੱਚ ਰਹਿ ਗਿਆ ਹੈ ਜਿਸ ਨੂੰ ਉੱਥੋਂ ਵਾਪਸ ਲੈ ਕੇ ਆਉਣਾ ਹੈ। ਪਰ ਜਿਵੇਂ ਹੀ ਇਹ ਪਿੰਡ ਲਮਲੈਹੜੀ ਕੋਲ ਪੁੱਜੇ ਤਾਂ ਨੌਜਵਾਨ ਚਾਕੂ ਦਿਖਾ ਕੇ ਡਰਾਈਵਰ ਕੋਲੋਂ ਉਸ ਦਾ ਮੋਬਾਈਲ, 3200 ਰੁਪਏ ਅਤੇ ਕਾਰ ਖੋਹ ਕੇ ਫ਼ਰਾਰ ਹੋ ਗਏ। ਇਸ ਸਬੰਧੀ ਥਾਣਾ ਮੁਖੀ ਦਾਨਿਸ਼ਵੀਰ ਸਿੰਘ ਨੇ ਕਿਹਾ ਕਿ ਜਲਦ ਇਸ ਮਾਮਲੇ ਨੂੰ ਹੱਲ ਕਰ ਕੇ ਦੋਸ਼ੀਆਂ ਨੂੰ ਫੜਿਆ ਜਾਵੇਗਾ।