ਝਾੜ ਚੰਗਾ ਪਰ ਢੁਕਵਾਂ ਭਾਅ ਨਾ ਮਿਲਣ ਕਾਰਨ ਕਿਸਾਨਾਂ ਨੂੰ ਖਰਚੇ ਪੂਰੇ ਕਰਨੇ ਵੀ ਔਖੇ ਹੋਏ

ਗੁਰਪ੍ਰੀਤ ਸਿੰਘ
ਸਾਦਿਕ, 19 ਜੂਨ
ਇਲਾਕੇ ਦੇ ਪਿੰਡ ਝੋਟੀ ਵਾਲਾ, ਘੁਗਿਆਣਾ, ਅਰਾਈਆਂ ਵਾਲਾ ਤੇ ਮਚਾਕੀ ਆਦਿ ਵਿੱਚ ਟਮਾਟਰਾਂ ਦੀ ਭਰਵੀਂ ਖੇਤੀ ਹੁੰਦੀ ਹੈ। ਇਸ ਵਾਰ ਵੀ ਤਿੰਨ ਹਜ਼ਾਰ ਏਕੜ ਦੇ ਕਰੀਬ ਕਾਸ਼ਤ ਹੋਈ ਹੈ। ਇਥੋਂ ਪੂਰੇ ਪੰਜਾਬ ਦੀਆਂ ਮੰਡੀਆਂ ਸਮੇਤ ਰਾਜਸਥਾਨ, ਹਿਮਾਚਲ, ਉੱਤਰ ਪ੍ਰਦੇਸ਼, ਮੱਧ ਪ੍ਰਦੇਸ਼ ਤੇ ਦਿੱਲੀ ਆਦਿ ਤੋਂ ਵਪਾਰੀ ਰੋਜ਼ਾਨਾ ਕਰੀਬ 400 ਗੱਡੀਆਂ ਟਮਾਟਰਾਂ ਦੀਆਂ ਭਰ ਕੇ ਲਿਜਾਂਦੇ ਹਨ। ਹੁਣ ਟਮਾਟਰਾਂ ਦੀ ਤੁੜਵਾਈ ਅਖਰੀਲੇ ਪੜਾਅ ’ਤੇ ਪਹੁੰਚ ਚੁੱਕੀ ਹੈ। ਐਤਕੀਂ ਝਾੜ ਚੋਖਾ ਰਿਹਾ ਪਰ ਭਾਅ ਢੁੱਕਵਾਂ ਨਾ ਮਿਲਣ ਕਾਰਨ ਕਿਸਾਨ ਚਿੰਤਾ ਵਿੱਚ ਹਨ। ਪਿੰਡ ਘੁਗਿਆਣਾ ਦਾ ਕਿਸਾਨ ਕਰਨੈਲ ਸਿੰਘ ਨੇ 90,000 ਪ੍ਰਤੀ ਏਕੜ ਠੇਕੇ ’ਤੇ ਲੈ ਕੇ ਟਮਾਟਰ ਦੀ ਖੇਤੀ ਕੀਤੀ ਹੈ। ਉਸ ਨੇ ਦੱਸਿਆ ਕਿ ਜ਼ਿਆਦਾਤਰ ਕਿਸਾਨ ਜ਼ਮੀਨ ਠੇਕੇ ’ਤੇ ਲੈ ਕੇ ਹੀ ਖੇਤੀ ਕਰ ਰਹੇ ਹਨ ਪਰ ਇਸ ਵਾਰ ਮੁਨਾਫਾ ਤਾਂ ਦੂਰ ਦੀ ਗੱਲ ਲਾਗਤ ਖਰਚ ਵੀ ਮੁੜਦਾ ਨਜ਼ਰ ਨਹੀਂ ਆ ਰਿਹਾ। ਕਿਸਾਨ ਨੇ ਦੱਸਿਆ ਕਿ 25 ਕਿੱਲੋ ਦਾ ਕਰੇਟ ਜੋ ਦੋ ਸਾਲ ਪਹਿਲਾਂ 600 ਰੁਪਏ ਦਾ ਵਿਕਿਆ ਸੀ ਐਤਕੀਂ 100 ਤੋਂ 120 ਰੁਪਏ ਤੱਕ ਹੀ ਵਿਕਿਆ ਹੈ ਜਿਸ ਦੀ ਤੁੜਵਾਈ ਦਾ ਖਰਚ ਹੀ 25 ਰੁਪਏ ਹੈ। ਕਿਸਾਨ ਗੁਰਬਚਨ ਸਿੰਘ ਨੇ ਦੱਸਿਆ ਪਿਛਲੇ ਸਾਲ ਇਹਨੀਂ ਦਿਨੀਂ ਮੌਸਮ ਠੀਕ ਹੋਣ ਕਾਰਨ ਫ਼ਸਲ ਦਾ ਸੀਜ਼ਨ ਲੰਮਾ ਚੱਲਿਆ ਸੀ ਜਿਸ ਨਾਲ ਅਖਰੀਲੇ ਪੜਾਅ ’ਤੇ ਭਾਅ ਠੀਕ ਬਣ ਗਿਆ ਸੀ ਪਰ ਐਤਕੀਂ ਗਰਮੀ ਕਾਰਨ ਖੇਤ ਜਲਦੀ ਵਿਹਲੇ ਹੋ ਗਏ ਜੋ ਘਾਟੇ ਸੌਦਾ ਸਾਬਤ ਹੋਇਆ ਹੈ। ਝੋਟੀਵਾਲਾ ਦੇ ਕਿਸਾਨ ਬਲਧੀਰ ਸਿੰਘ ਨੇ ਦੱਸਿਆ ਕਿ ਪੰਜਾਬ ਐਗਰੋ ਵੱਲੋਂ ਅਬੋਹਰ ਵਿਚਲੇ ਪਲਾਂਟ ਵਿੱਚ 6.20 ਰੁਪਏ ਕਿੱਲੋ ਦੇ ਹਿਸਾਬ ਨਾਲ ਮਾਲ ਖਰੀਦਿਆ ਗਿਆ ਹੈ ਪਰ ਮਹੀਨੇ ਤੋਂ ਵਧੇਰੇ ਸਮਾਂ ਬੀਤਣ ’ਤੇ ਵੀ ਕਿਸਾਨਾਂ ਨੂੰ ਪੈਸੇ ਨਹੀਂ ਮਿਲੇ।