ਕਾਰ ’ਤੇ ਟਰੱਕ ਪਲਟਿਆ, ਬੱਚੇ ਸਣੇ ਦੋ ਔਰਤਾਂ ਹਲਾਕ

ਜਲੰਧਰ (ਹਤਿੰਦਰ ਮਹਿਤਾ):

ਇੱਥੋਂ ਦੇ ਪਠਾਨਕੋਟ ਚੌਕ ਨੇੜੇ ਕਾਰ ’ਤੇ ਝੋਨੇ ਨਾਲ ਭਰਿਆ ਟਰੱਕ ਪਲਟਣ ਕਾਰਨ ਦੋ ਔਰਤਾਂ ਤੇ ਇਕ ਬੱਚਾ ਹਲਾਕ ਹੋ ਗਿਆ ਅਤੇ ਚਾਰ ਗੰਭੀਰ ਜ਼ਖਮੀ ਹੋ ਗਏ। ਮ੍ਰਿਤਕਾਂ ਦੀਆਂ ਲਾਸ਼ਾਂ ਕਾਰ ਨੂੰ ਵੱਢ ਕੇ ਬਾਹਰ ਕੱਢੀਆਂ ਗਈਆਂ। ਡਿਵੀਜ਼ਨ ਨੰਬਰ-8 ਦੀ ਪੁਲੀਸ ਵੱਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਜਾਣਕਾਰੀ ਅਨੁਸਾਰ ਜਦੋਂ ਇਹ ਹਾਦਸਾ ਵਾਪਰਿਆ ਉਸ ਵੇਲੇ ਕਾਰ ਸਵਾਰ ਅੰਮ੍ਰਿਤਸਰ ਤੋਂ ਲੁਧਿਆਣਾ ਜਾ ਰਹੇ ਸਨ। ਏਐੱਸਆਈ ਸਤਪਾਲ ਨੇ ਦੱਸਿਆ ਕਿ ਜ਼ਖ਼ਮੀ ਹਾਲਤ ’ਚ ਇੱਕ ਬੱਚੇ ਤੇ ਔਰਤ ਨੂੰ ਨਿੱਜੀ ਹਸਪਤਾਲ ਦਾਖ਼ਲ ਕਰਵਾਇਆ ਗਿਆ ਹੈ। ਉਨ੍ਹਾਂ ਦੱਸਿਆ ਕਿ ਕਾਰ ’ਚ ਲਗਪਗ 6 ਤੋਂ 7 ਲੋਕ ਸਵਾਰ ਸਨ। ਉਨ੍ਹਾਂ ਦੱਸਿਆ ਕਿ ਕਾਰ ਚਾਲਕ ਪਰਿਵਾਰ ਸਮੇਤ ਆਪਣੀ ਬਿਮਾਰ ਮਾਤਾ ਦੀ ਖਬਰਸਾਰ ਲੈਣ ਡੀਐੱਸਸੀ ਲੁਧਿਆਣਾ ਜਾ ਰਿਹਾ ਸੀ। ਪੁਲੀਸ ਅਨੁਸਾਰ ਮ੍ਰਿਤਕਾਂ ਦੀ ਪਛਾਣ ਜੋਤੀ ਅਰੋੜਾ, ਪਲਕ ਅਤੇ ਉਸ ਦੇ ਪੁੱਤਰ ਪਿਊਸ਼ (ਬੱਚਾ) ਵਜੋਂ ਹੋਈ ਹੈ। ਜਦੋਂ ਕਿ ਜ਼ਖ਼ਮੀਆਂ ਦੀ ਪਛਾਣ ਮੀਨਾ ਤੇ ਅੰਸ਼ (ਬੱਚਾ), ਵਰੁਣ ਅਤੇ ਅਮਨ ਵਜੋਂ ਹੋਈ ਹੈ। ਇਹ ਪਰਿਵਾਰ ਹੱਥੀ ਗੇਟ ਅੰਮ੍ਰਿਤਸਰ ਦਾ ਰਹਿਣ ਵਾਲਾ ਹੈ।