ਫਿਲਮ ‘ਮੈਟਰੋ ਇਨ ਦਿਨੋਂ’ ਦੀ ਸ਼ੂਟਿੰਗ ਮੁਕੰਮਲ

ਮੁੰਬਈ:
ਇੱਥੇ ਅੱਜ ਅਦਾਕਾਰ ਅਲੀ ਫਜ਼ਲ ਨੇ ਕਿਹਾ ਕਿ ਉਸ ਨੇ ਨਿਰਦੇਸ਼ਕ ਅਨੁਰਾਗ ਬਾਸੂ ਦੀ ਫ਼ਿਲਮ ‘ਮੈਟਰੋ ਇਨ ਦਿਨੋਂ’ ਦੀ ਸ਼ੂਟਿੰਗ ਪੂਰੀ ਕਰ ਲਈ ਹੈ। ਇਹ ਫ਼ਿਲਮ ਬਾਸੂ ਦੀ 2007 ਆਈ ਫ਼ਿਲਮ ‘ਲਾਈਫ ਇਨ ਏ ਮੈਟਰੋ’ ਦੀ ਅਗਲੀ ਕੜੀ ਹੈ। ਫਜ਼ਲ ਨੇ ਕਿਹਾ ਕਿ ਰੁਮਾਂਟਿਕ ਡਰਾਮਾ ਫ਼ਿਲਮ ’ਚ ਕੰਮ ਕਰਨਾ ਖੁਸ਼ੀ ਭਰਿਆ ਤੇ ਭਾਵੁਕ ਤਜਰਬਾ ਰਿਹਾ ਹੈ। ਉਸ ਨੇ ਦੱਸਿਆ ਕਿ ਫ਼ਿਲਮ ‘ਮੈਟਰੋ ਇਨ ਦਿਨੋਂ’ ਦੀ ਸ਼ੂਟਿੰਗ ਕਰਨਾ ਬਹੁਤ ਖੁਸ਼ੀ ਭਰਿਆ ਸਫ਼ਰ ਰਿਹਾ। ਅਨੁਰਾਗ ਨਾਲ ਕੰਮ ਕਰਨਾ ਬਹੁਤ ਸਨਮਾਨ ਵਾਲੀ ਗੱਲ ਹੈ। ਅਨੁਰਾਗ ਦੀ ਕਹਾਣੀ ਨੇ ਹਮੇਸ਼ਾ ਉਸ ਨੂੰ ਪ੍ਰੇਰਿਤ ਕੀਤਾ ਹੈ ਅਤੇ ਉਹ ‘ਮੈਟਰੋ ਇਨ ਦਿਨੋਂ’ ਦੀ ਟੀਮ ਦਾ ਹਿੱਸਾ ਬਣ ਕੇ ਬਹੁਤ ਖੁਸ਼ ਹੈ। ਇਸ ਤੋਂ ਪਹਿਲਾਂ ਅਲੀ ਫਜ਼ਲ ਨੇ ਫ਼ਿਲਮ ‘3 ਇਡੀਅਟਸ’, ‘ਫੁਕਰੇ’ ਅਤੇ ‘ਮਿਰਜ਼ਾਪੁਰ’ ਨਾਲ ਆਪਣੀ ਪਛਾਣ ਬਣਾਈ ਹੈ। ਫ਼ਿਲਮ ‘ਮੈਟਰੋ ਇਨ ਦਿਨੋਂ’ ਵਿੱਚ ਆਦਿੱਤਿਆ ਰਾਏ ਕਪੂਰ, ਸਾਰਾ ਅਲੀ ਖਾਨ, ਅਨੁਪਮ ਖੇਰ, ਨੀਨਾ ਗੁਪਤਾ, ਪੰਕਜ ਤ੍ਰਿਪਾਠੀ, ਕੋਂਕਨਾ ਸੇਨ ਸ਼ਰਮਾ ਅਤੇ ਫਾਤਿਮਾ ਸਨਾ ਸ਼ੇਖ ਵੀ ਕੰਮ ਕਰ ਰਹੇ ਹਨ। ਇਹ ਫ਼ਿਲਮ ਟੀ-ਸੀਰੀਜ਼ ਦੇ ਭੂਸ਼ਣ ਕੁਮਾਰ ਅਤੇ ਅਨੁਰਾਗ ਬਾਸੂ ਪ੍ਰੋਡਕਸ਼ਨ ਪ੍ਰਾਈਵੇਟ ਲਿਮਟਿਡ ਵੱਲੋਂ ਬਣਾਈ ਗਈ ਹੈ। ਇਸ ਦਾ ਸੰਗੀਤ ਪ੍ਰੀਤਮ ਵੱਲੋਂ ਦਿੱਤਾ ਗਿਆ ਹੈ, ਜਿਸ ਨੇ ਪਹਿਲਾਂ ‘ਗੈਂਗਸਟਰ’, ‘ਲਾਈਫ ਇਨ ਏ…ਮੈਟਰੋ’, ‘ਬਰਫੀ!’, ‘ਜੱਗਾ ਜਾਸੂਸ’ ਅਤੇ ‘ਲੂਡੋ’ ਵਰਗੀਆਂ ਫ਼ਿਲਮਾਂ ਵਿੱਚ ਸੰਗੀਤ ਦਿੱਤਾ ਹੈ। -ਪੀਟੀਆਈ