ਅਮੀਰਾਂ ਨੂੰ ਟੀਕੇ ਲਈ ਤਰਜੀਹ ਨਹੀਂ ਦਿੱਤੀ ਜਾ ਸਕਦੀ: ਪੋਪ

ਵੈਟੀਕਨ ਸਿਟੀ, 19 ਅਗਸਤ

ਪੋਪ ਫਰਾਂਸਿਸ ਨੇ ਅਜਿਹੀ ਕਿਸੇ ਵੀ ਸੰਭਾਵਨਾ ਖ਼ਿਲਾਫ਼ ਚਿਤਾਵਨੀ ਦਿੱਤੀ ਹੈ ਕਿ ਅਮੀਰਾਂ ਨੂੰ ਕਰੋਨਾਵਾਇਰਸ ਟੀਕੇ ਲਈ ਤਰਜੀਹ ਦਿੱਤੀ ਜਾਵੇਗੀ। ਹਫ਼ਤਾਵਾਰੀ ਜਨਤਕ ਭਾਸ਼ਣ ਤੋਂ ਪਹਿਲਾਂ ਪੋਪ ਨੇ ਕਿਹਾ ‘ਮਹਾਮਾਰੀ ਸੰਕਟ ਹੈ। ਇਸ ਵਿਚੋਂ ‘ਪਹਿਲਾਂ ਵਰਗੇ’ ਹੀ ਵਾਪਸ ਨਹੀਂ ਆਇਆ ਜਾਣਾ, ਜਾਂ ਤਾਂ ਅਸੀਂ ਬਿਹਤਰ ਬਣਾਂਗੇ ਜਾਂ ਹੋਰ ਖ਼ਰਾਬ।’ ਉਨ੍ਹਾਂ ਕਿਹਾ ਕਿ ਬਿਹਤਰ ਹੋ ਕੇ ਹੀ ਨਿਕਲਣਾ ਪਵੇਗਾ। ਪੋਪ ਨੇ ਕਿਹਾ ਕਿ ਜੇ ਅਮੀਰ ਲੋਕਾਂ ਨੂੰ ਤਰਜੀਹ ਦਿੱਤੀ ਗਈ ਤਾਂ ਅਫ਼ਸੋਸ ਹੋਵੇਗਾ। ਉਨ੍ਹਾਂ ਨਾਲ ਹੀ ਕਿਹਾ ਕਿ ਮਹਾਮਾਰੀ ਦੇ ਮੱਦੇਨਜ਼ਰ ਜਿਹੜੀ ਵੀ ਵਿੱਤੀ ਸਹਾਇਤਾ ਦਿੱਤੀ ਜਾ ਰਹੀ ਹੈ, ਉਸ ਦਾ ਲਾਭ ਜੇ ਗਰੀਬਾਂ ਨੂੰ ਨਾ ਹੋਇਆ ਤਾਂ ਇਹ ਵੀ ਸ਼ਰਮਨਾਕ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਮਹਾਮਾਰੀ ਨੇ ਗਰੀਬ ਵਰਗ ਦੀਆਂ ਮੁਸ਼ਕਲਾਂ ਖੁੱਲ੍ਹ ਕੇ ਸਭ ਦੇ ਸਾਹਮਣੇ ਲਿਆ ਦਿੱਤੀਆਂ ਹਨ। ਦੁਨੀਆ ਵਿਚ ਕਿੰਨੀ ਊਚ-ਨੀਚ ਹੈ, ਸਭ ਨੇ ਦੇਖੀ ਹੈ। ਪੋਪ ਫਰਾਂਸਿਸ ਨੇ ਕਿਹਾ ਕਿ ਕਰੋਨਾਵਾਇਰਸ ਨੇ ਤਾਂ ਦੁਨੀਆ ਨੂੰ ਗੋਡੇ ਟੇਕਣ ਲਈ ਮਜਬੂਰ ਕੀਤਾ ਹੈ ਹੀ, ਪਰ ਸਾਨੂੰ ਸਮਾਜਿਕ ਅਨਿਆਂ, ਨਾਬਰਾਬਰੀ ਜਿਹੇ ਵਾਇਰਸ ਨਾਲ ਵੀ ਲੜਨਾ ਪੈਣਾ ਹੈ। -ਏਪੀ