ਚੱਲਦੀ ਥਾਰ ਨੂੰ ਅੱਗ ਲੱਗੀ

ਬਠਿੰਡਾ: ਇੱਥੇ ਬਠਿੰਡਾ-ਸ੍ਰੀ ਮੁਕਤਸਰ ਸਾਹਿਬ ਮਾਰਗ ’ਤੇ ਪਿੰਡ ਬੁਰਜ ਮਹਿਮਾ ਨੇੜੇ ਇੱਕ ਚੱਲਦੀ ਥਾਰ ਕਾਰ ਨੂੰ ਅਚਾਨਕ ਅੱਗ ਲੱਗ ਗਈ। ਇਸ ਦੌਰਾਨ ਥਾਰ ਵਿੱਚ ਸਵਾਰ ਦੋ ਨੌਜਵਾਨਾਂ ਦਾ ਬਚਾਅ ਹੋ ਗਿਆ। ਥਾਰ ਦੇ ਚਾਲਕ ਰਾਘਵ ਅਰੋੜਾ ਵਾਸੀ ਬਠਿੰਡਾ ਦੇ ਪਿਤਾ ਰਵੀ ਅਰੋੜਾ ਨੇ ਦੱਸਿਆ ਕਿ ਉਸ ਦਾ ਪੁੱਤਰ ਅਤੇ ਉਸ ਦਾ ਦੋਸਤ ਦੇਰ ਸ਼ਾਮ ਬਠਿੰਡਾ ਤੋਂ ਬੁਰਜ ਮਹਿਮਾ ਆ ਰਹੇ ਸਨ ਕਿ ਇਸ ਦੌਰਾਨ ਬੁਰਜ ਮਹਿਮਾ ਬੱਸ ਸਟੈਂਡ ਤੋਂ ਥੋੜ੍ਹੀ ਦੂਰੀ ’ਤੇ ਕਾਰ ਨੂੰ ਅਚਾਨਕ ਅੱਗ ਲੱਗ ਗਈ। ਅੱਗ ਲੱਗਣ ’ਤੇ ਉਸ ਦੇ ਪੁੱਤਰ ਨੇ ਫਾਇਰ ਬਿਗ੍ਰੇਡ ਬਠਿੰਡਾ ਨੂੰ ਤੁਰੰਤ ਸੂਚਿਤ ਕੀਤਾ ਪਰ ਫਾਇਰ ਬ੍ਰਿਗੇਡ ਕਰੀਬ ਇੱਕ ਘੰਟੇ ਮਗਰੋਂ ਪਹੁੰਚੀ ਤੇ ਕਾਰ ਸੜ ਕੇ ਸੁਆਹ ਹੋ ਗਈ। ਦੂਜੇ ਪਾਸੇ ਫਾਇਰ ਬ੍ਰਿਗੇਡ ਦੇਰੀ ਨਾਲ ਪੁੱਜਣ ’ਤੇ ਲੋਕਾਂ ਨੇ ਜਾਮ ਲਾ ਕੇ ਫਾਇਰ ਅਮਲੇ ਖ਼ਿਲਾਫ਼ ਧਰਨਾ ਦਿੱਤਾ। ਖ਼ਬਰ ਲਿਖੇ ਜਾਣ ਤੱਕ ਚੌਕੀ ਕਿਲੀ ਨਿਹਾਲ ਸਿੰਘ ਵਾਲਾ ਦੀ ਪੁਲੀਸ ਮਾਮਲੇ ਨੂੰ ਸ਼ਾਂਤ ਕਰਨ ’ਚ ਜੁਟੀ ਸੀ। -ਪੱਤਰ ਪ੍ਰੇਰਕ