ਬੈਂਕ ਵਿੱਚੋਂ ਨਕਾਬਪੋਸ਼ਾਂ ਨੇ 15 ਲੱਖ ਰੁਪਏ ਖੋਹੇ

ਜੋਗਿੰਦਰ ਸਿੰਘ ਓਬਰਾਏ/ਡੀਪੀਐਸ ਬੱਤਰਾ
ਖੰਨਾ/ਸਮਰਾਲਾ, 11 ਜੂਨ
ਇਥੋਂ ਦੇ ਬੀਜਾ ਨੇੜਲੇ ਪਿੰਡ ਬਗਲੀ ਵਿੱਚ ਅੱਜ ਬਾਅਦ ਦੁਪਹਿਰ ਲੁਟੇਰੇ ਪੰਜਾਬ ਐਂਡ ਸਿੰਧ ਬੈਂਕ ਵਿੱਚੋਂ 15 ਲੱਖ ਰੁਪਏ ਦੇ ਕਰੀਬ ਨਗ਼ਦੀ ਖੋਹ ਕੇ ਫਰਾਰ ਹੋ ਗਏ। ਜਾਣਕਾਰੀ ਅਨੁਸਾਰ ਤਿੰਨੇ ਮੋਟਰਸਾਈਕਲ ਸਵਾਰ ਬੈਂਕ ਦੇ ਗੇਟ ਅੱਗੇ ਆਏ ਜਿਨ੍ਹਾਂ ਵਿੱਚੋਂ ਇੱਕ ਗੇਟ ਦੇ ਬਾਹਰ ਖੜ੍ਹਾ ਰਿਹਾ ਜਦੋਂ ਕਿ ਦੋ ਜਣੇ ਅੰਦਰ ਗਏ ਅਤੇ ਖਾਤਾ ਖੋਲ੍ਹਣ ਲਈ ਕਿਹਾ। ਬੈਂਕ ਦੇ ਗੰਨਮੈਨ ਨੇ ਇਨ੍ਹਾਂ ਨੂੰ ਆਪਣੇ ਮੂੰਹ ਤੋਂ ਮਾਸਕ ਹਟਾਉਣ ਲਈ ਕਿਹਾ ਤਾਂ ਉਨ੍ਹਾਂ ਨੇ ਗੰਨਮੈਨ ਨੂੰ ਜੱਫਾ ਪਾ ਲਿਆ ਅਤੇ ਹੱਥੋਪਾਈ ਹੋ ਗਏ। ਉਨ੍ਹਾਂ ਨੇ ਗੋਲੀ ਚਲਾ ਦਿੱਤੀ ਅਤੇ ਸਾਰੇ ਬੈਂਕ ਸਟਾਫ ਨੂੰ ਇੱਕ ਜਗ੍ਹਾ ਇਕੱਠਾ ਕਰਕੇ ਉਥੋਂ 15 ਲੱਖ ਰੁਪਏ ਲੈ ਕੇ ਫਰਾਰ ਹੋ ਗਏ। ਉਹ ਜਾਂਦੇ ਹੋਏ ਗੰਨਮੈਨ ਦੀ ਬੰਦੂਕ ਖੋਹ ਕੇ ਲੈੈ ਗਏ ਤੇ ਗੇਟ ਦੇ ਬਾਹਰ ਸੁੱਟ ਗਏ। ਘਟਨਾ ਤੋਂ ਬਾਅਦ ਮੌਕੇ ’ਤੇ ਪੁੱਜੇ ਐਸਐਸਪੀ ਅਮਨੀਤ ਕੌਂਡਲ ਨੇ ਕਿਹਾ ਕਿ ਜਲਦ ਲੁਟੇਰਿਆਂ ਨੂੰ ਗ੍ਰਿਫਤਾਰ ਕਰ ਲਿਆ ਜਾਵੇਗਾ।