ਫ਼ਿਲਮ ‘ਜੇਲ੍ਹਰ’ ਦੇ ਗੀਤ ’ਤੇ ਨੱਚਿਆ ਜਾਪਾਨੀ ਰਾਜਦੂਤ

ਨਵੀਂ ਦਿੱਲੀ, 17 ਅਗਸਤ
ਭਾਰਤ ਵਿੱਚ ਜਾਪਾਨ ਦੇ ਰਾਜਦੂਤ ਹਿਰੋਸ਼ੀ ਸੁਜ਼ੂਕੀ ਵਿੱਚ ਸੁਪਰਸਟਾਰ ਰਜਨੀਕਾਂਤ ਦਾ ਫੈਨ ਲੁਕਿਆ ਹੈ। ਸੁਜ਼ੂਕੀ ਦੀ ਇਕ ਵੀਡੀਓ ਸੋਸ਼ਲ ਮੀਡੀਆ ’ਤੇ ਵਾਇਰਲ ਹੋਈ ਹੈ, ਜਿਸ ਵਿਚ ਉਹ ਰਜਨੀਕਾਂਤ ਦੀ ਹਾਲੀਆ ਰਿਲੀਜ਼ ਫਿਲਮ ‘ਜੇਲ੍ਹਰ’ ਦੇ ਗੀਤ ‘ਕਾਵਾਲਾ’ ਉੱਤੇ ਨੱਚਦਾ ਨਜ਼ਰ ਆ ਰਿਹਾ ਹੈ। ਸੁਜ਼ੂਕੀ ਨੇ 17 ਸਕਿੰਟ ਦੀ ਇਹ ਕਲਿੱਪ ਬੁੱਧਵਾਰ ਨੂੰ ਆਪਣੇ ਅਧਿਕਾਰਤ ‘ਐਕਸ’ ਪੇਜ ’ਤੇ ਸਾਂਝੀ ਕੀਤੀ ਸੀ। ਇਸ ਵੀਡੀਓ ਵਿਚ ਜਾਪਾਨੀ ਰਾਜਦੂਤ ਆਪਣੇ ਹੀ ਮੁਲਕ ਦੇ ਯੂਟਿਊਬਰ ਮਾਇਓ ਨਾਲ ਮਕਬੂਲ ਤਾਮਿਲ ਟਰੈਕ ’ਤੇ ਥਿਰਕਦਾ ਨਜ਼ਰ ਆ ਰਿਹਾ ਹੈ। ਫਿਲਮ ਵਿੱਚ ਇਹ ਗੀਤ ਰਜਨੀਕਾਂਤ ਤੇ ਤਮੰਨਾ ਭਾਟੀਆ ’ਤੇ ਫਿਲਮਾਇਆ ਗਿਆ ਹੈ। ਸੁਜ਼ੂਕੀ ਦੀ ਇਸ ਪੋਸਟ ਨੂੰ 8.20 ਲੱਖ ਵਿਊਜ਼ ਮਿਲੇ ਹਨ ਤੇ ਮਾਈਕਰੋਬਲੌਗਿੰਗ ਸਾਈਟ ’ਤੇ 300 ਤੋਂ ਵੱਧ ਕੁਮੈਂਟ ਕੀਤੇ ਗਏ ਹਨ। -ਪੀਟੀਆਈ