ਇਜ਼ਰਾਇਲੀ ਸੈਨਾ ਨੇ ਖਾਨ ਯੂਨਿਸ ’ਚ ਕਾਰਵਾਈ ਤੇਜ਼ ਕੀਤੀ
ਇਜ਼ਰਾਇਲੀ ਫੌਜ ਵੱਲੋਂ ਵੱਡੀ ਮਾਤਰਾ ਵਿੱਚ ਹਥਿਆਰ ਤੇ ਗੋਲੀਸਿੱਕਾ ਬਰਾਮਦ
ਤਲ ਅਵੀਵ, 9 ਜਨਵਰੀ
ਇਜ਼ਰਾਇਲੀ ਸੈਨਾ ਨੇ ਲੰਘੀ ਰਾਤ ਗਾਜ਼ਾ ਦੇ ਸ਼ਹਿਰ ਖਾਨ ਯੂਨਿਸ ’ਚ ਆਪਣੀ ਮੁਹਿੰਮ ਨੂੰ ਅੱਗੇ ਵਧਾਉਂਦਿਆਂ 40 ਅਤਿਵਾਦੀ ਹਲਾਕ ਕਰ ਦਿੱਤੇ ਅਤੇ ਵੱਡੀ ਮਾਤਰਾ ’ਚ ਹਥਿਆਰ ਅਤੇ ਗੋਲਾ ਬਾਰੂਦ ਬਰਾਮਦ ਕੀਤਾ। ਹਮਾਸ ਅਤਿਵਾਦੀਆਂ ਨਾਲ ਲੜਦੇ ਹੋਏ ਇਜ਼ਰਾਈਲ ਦੇ ਪੰਜ ਸੈਨਿਕ ਵੀ ਮਾਰੇ ਗਏ ਹਨ। ਇਹ ਜਾਣਕਾਰੀ ਇਜ਼ਰਾਇਲੀ ਰੱਖਿਆ ਬਲਾਂ (ਆਈਡੀਐੱਫ) ਨੇ ਅੱਜ ਦਿੱਤੀ।
ਉਨ੍ਹਾਂ ਦੱਸਿਆ ਕਿ ਇਜ਼ਰਾਇਲੀ ਸੈਨਾ ਨੇ 12 ਕਲਾਸ਼ਨੀਕੋਵ ਰਾਈਫਲਾਂ, ਚਾਰ ਆਰਪੀਜੀ ਲਾਂਚਰ, ਦਰਜਨਾਂ ਗਰੇਨੇਡ ਤੇ ਕਾਰਤੂਸ ਬਰਾਮਦ ਕੀਤੇ ਹਨ। ਉਨ੍ਹਾਂ ਦੱਸਿਆ ਕਿ ਇਜ਼ਰਾਇਲੀ ਬਲਾਂ ਨੇ ਹਮਾਸ ਦੀ ਇਮਾਰਤ ’ਤੇ ਹਮਲਾ ਕੀਤਾ। ਇਸ ਮਗਰੋਂ ਸੈਨਾ ਨੇ ਹਮਾਸ ਅਤਿਵਾਦੀਆਂ ’ਤੇ ਹਵਾਈ ਹਮਲਾ ਕੀਤਾ। ਦੂਜੇ ਪਾਸੇ ਇਜ਼ਰਾਈਲ ਦੀ ਜਲ ਸੈਨਾ ਨੇ ਹਮਾਸ ਵੱਲੋਂ ਵਰਤੇ ਜਾ ਰਹੇ ਫੌਜੀ ਟਿਕਾਣਿਆਂ, ਗੁਦਾਮਾਂ ਤੇ ਬੇੜਿਆਂ ’ਤੇ ਹਮਲੇ ਕੀਤੇ। ਇਸੇ ਦੌਰਾਨ ਆਈਡੀਐੱਫ ਨੇ ਦੱਸਿਆ ਕਿ ਹਮਾਸ ਨਾਲ ਲੜਾਈ ਦੌਰਾਨ ਇਜ਼ਰਾਇਲੀ ਸੈਨਾ ਦੇ ਪੰਜ ਜਵਾਨ ਵੀ ਮਾਰੇ ਗਏ ਹਨ। ਉਨ੍ਹਾਂ ਦੱਸਿਆ ਕਿ 27 ਅਕਤੂਬਰ ਨੂੰ ਗਾਜ਼ਾ ਖ਼ਿਲਾਫ਼ ਸ਼ੁਰੂ ਹੋਈ ਜੰਗ ’ਚ ਹੁਣ ਤੱਕ 185 ਇਜ਼ਰਾਇਲੀ ਜਵਾਨ ਮਾਰੇ ਜਾ ਚੁੱਕੇ ਹਨ। ਉੱਤਰੀ ਗਾਜ਼ਾ ਪੱਟੀ ’ਤੇ ਆਈਡੀਐੱਫ ਦਾ ਤਕਰੀਬਨ ਮੁਕੰਮਲ ਕੰਟਰੋਲ ਹੋਣ ਤੋਂ ਬਾਅਦ ਹੁਣ ਫੌਜੀ ਦਸਤੇ ਕੇਂਦਰੀ ਤੇ ਦੱਖਣੀ ਗਾਜ਼ਾ ਪੱਟੀ ਵਿੱਚ ਜੰਗ ਲੜ ਰਹੇ ਹਨ। -ਏਐੱਨਆਈ