ਭਾਰਤੀ ਮਹਿਲਾ ਟੀਮ ਨੇ ਟੀ-20 ਲੜੀ ਜਿੱਤੀ

ਸਿਲਹਟ (ਬੰਗਲਾਦੇਸ਼), 9 ਮਈ
ਰਿਚਾ ਘੋਸ਼ ਦੀ 28 ਦੌੜਾਂ ਦੀ ਨਾਬਾਦ ਪਾਰੀ ਤੋਂ ਬਾਅਦ, ਰਾਧਾ ਯਾਦਵ (24 ਦੌੜਾਂ ’ਤੇ 3 ਵਿਕਟਾਂ) ਦੀ ਸ਼ਾਨਦਾਰ ਗੇਂਦਬਾਜ਼ੀ ਦੀ ਬਦੌਲਤ ਭਾਰਤ ਨੇ ਅੱਜ ਬੰਗਲਾਦੇਸ਼ ਦੇ ਖ਼ਿਲਾਫ਼ ਪੰਜਵਾਂ ਅਤੇ ਆਖਰੀ ਮਹਿਲਾ ਟੀ-20 ਕੌਮਾਂਤਰੀ ਮੈਚ 21 ਦੌੜਾਂ ਨਾਲ ਜਿੱਤ ਕੇ ਲੜੀ 5-0 ਨਾਲ ਆਪਣੇ ਨਾਂ ਕਰ ਲਈ ਹੈ। ਬੰਗਲਾਦੇਸ਼ ਨੇ 157 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦਿਆਂ ਚੰਗੀ ਸ਼ੁਰੂਆਤ ਕੀਤੀ ਪਰ ਖੱਬੇ ਹੱਥ ਦੀ ਸਪਿੰਨਰ ਰਾਧਾ ਯਾਦਵ ਦੀ ਗੇਂਦਬਾਜ਼ੀ ਅੱਗੇ ਢਹਿ-ਢੇਰੀ ਹੋਣ ਕਾਰਨ ਮੇਜ਼ਬਾਨ ਟੀਮ 20 ਓਵਰਾਂ ਵਿੱਚ ਛੇ ਵਿਕਟਾਂ ’ਤੇ 136 ਦੌੜਾਂ ਹੀ ਬਣਾ ਸਕੀ। ਬੰਗਲਾਦੇਸ਼ ਲਈ ਰਿਤੂ ਮੌਨੀ ਦੀਆਂ 37 ਦੌੜਾਂ ਤੇ ਸ਼ਰੀਫਾ ਖਾਤੂਨ ਦੀਆਂ 28 ਦੌੜਾਂ ਦੀ ਨਾਬਾਦ ਪਾਰੀ ਵੀ ਕਿਸੇ ਕੰਮ ਨਹੀਂ ਆਈ। ਆਲ ਰਾਊਂਡਰ ਮੌਨੀ ਤੇ ਸ਼ਰੀਫਾ ਨੇ ਛੇਵੇਂ ਵਿਕਟ ਲਈ 57 ਦੌੜਾਂ ਦੀ ਸਾਂਝੇਦਾਰੀ ਬਣਾ ਕੇ ਭਾਰਤ ਨੂੰ ਦਬਾਅ ਵਿੱਚ ਲਿਆ ਦਿੱਤਾ ਪਰ ਮਹਿਮਾਨ ਟੀਮ ਨੇ ਅਖੀਰ ਵੱਚ ਲੜੀ ਜਿੱਤ ਲਈ। -ਪੀਟੀਆਈ