ਮੇਜ਼ਬਾਨ ਬਰੌਲੀ ਦੀ ਟੀਮ ਨੇ ਜਿੱਤਿਆ ਕ੍ਰਿਕਟ ਟੂਰਨਾਮੈਂਟ

ਮਿਹਰ ਸਿੰਘ
ਕੁਰਾਲੀ, 28 ਨਵੰਬਰ
ਨੇੜਲੇ ਪਿੰਡ ਬਰੌਲੀ ਵਿੱਚ ਧੰਨ-ਧੰਨ ਬਾਬਾ ਦੀਪ ਸਿੰਘ ਸ਼ਹੀਦ ਸਪੋਰਟਸ ਕਲੱਬ ਅਤੇ ਵੈੱਲਫੇਅਰ ਸੁਸਾਇਟੀ ਵੱਲੋਂ 15ਵਾਂ ਸ਼ਾਨਦਾਰ ਕ੍ਰਿਕਟ ਟੂਰਨਾਮੈਂਟ ਕਰਵਾਇਆ ਗਿਆ। ਕਲੱਬ ਦੇ ਪ੍ਰਧਾਨ ਹਰਸ਼ਿਵੰਦਰ ਸਿੰਘ ਧਨੋਆ ਨੇ ਦੱਸਿਆ ਕਿ ਟੂਰਨਾਮੈਂਟ ਦੌਰਾਨ ਲਗਭਗ 35 ਟੀਮਾਂ ਨੇ ਹਿੱਸਾ ਲਿਆ। ਇਸ ਵਿੱਚ ਵਧੀਆ ਖੇਡ ਪ੍ਰਦਰਸ਼ਨ ਕਰਦਿਆਂ ਪਿੰਡ ਬਰੌਲੀ ਦੀ ਟੀਮ ਨੇ ਰਸੂਲਪੁਰ ਨੂੰ ਹਰਾ ਕੇ ਇਸ ਟਰਾਫ਼ੀ ’ਤੇ ਕਬਜ਼ਾ ਕੀਤਾ। ਜੇਤੂਆਂ ਨੂੰ ਇਨਾਮਾਂ ਦੀ ਵੰਡ ਉੱਘੇ ਸਮਾਜ ਸੇਵੀ ਤੇ ਕਾਂਗਰਸੀ ਆਗੂ ਗੁਰਪ੍ਰਤਾਪ ਸਿੰਘ ਪਡਿਆਲਾ ਨੇ ਕੀਤੀ। ਜੇਤੂ ਰਹੀ ਬਰੌਲੀ ਦੀ ਟੀਮ ਨੂੰ 31 ਹਜ਼ਾਰ ਨਗਦ ਤੇ ਟਰਾਫ਼ੀ ਜਦਕਿ ਉੱਪ ਜੇਤੂ ਰਸੂਲਪੁਰ ਦੀ ਟੀਮ ਨੂੰ 21 ਹਜ਼ਾਰ ਨਗਦ ਤੇ ਟਰਾਫ਼ੀ ਦੇ ਕੇ ਸਨਮਾਨਿਤ ਕੀਤਾ ਗਿਆ। ਸ਼ਿਬੂ ਸਿਹਰਾ ਨੂੰ ਸਰਵੋਤਮ ਬੱਲੇਬਾਜ਼, ਮਨੀ ਰਸੂਲਪੁਰ ਸਰਵੋਤਮ ਗੇਂਦਬਾਜ਼ ਅਤੇ ਅਭੀ ਬਰੋਲੀ ਤੇ ਜੋਤ ਰਸੂਲਪੁਰ ਦਾ ਵਿਸ਼ੇਸ਼ ਸਨਾਮਨ ਕੀਤਾ ਗਿਆ। ਕਾਂਗਰਸੀ ਆਗੂ ਗੁਰਪ੍ਰਤਾਪ ਸਿੰਘ ਪਡਿਆਲਾ ਵੱਲੋਂ ਨੌਜਵਾਨਾਂ ਨੂੰ ਸੰਬੋਧਨ ਕਰਦਿਆਂ ਖੇਡਾਂ ਨਾਲ ਜੁੜਨ ਅਤੇ ਨਸ਼ਿਆਂ ਤੋਂ ਕਿਨਾਰਾ ਕਰਨ ਦੀ ਅਪੀਲ ਕੀਤੀ। ਇਸ ਮੌਕੇ ਅੰਗਦ ਬੈਂਸ, ਅਮਨ ਬੈਂਸ, ਮੋਨੂੰ ਕੁਰਾਲੀ, ਗੁਰਸ਼ਰਨ ਬਿੰਦਰਖੀਆ ਵੀ ਹਾਜ਼ਰ ਸਨ।