ਕਾਰਤਿਕ ਦੀ ਫ਼ਿਲਮ ‘ਚੰਦੂ ਚੈਂਪੀਅਨ’ ਦੀ ਝਲਕ ਸਾਹਮਣੇ ਆਈ

ਲੰਡਨ: ਕਾਰਤਿਕ ਆਰੀਅਨ ਨੇ ਆਪਣੀ ਆਉਣ ਵਾਲੀ ਨਵੀਂ ਫ਼ਿਲਮ ‘ਚੰਦੂ ਚੈਂਪੀਅਨ’ ਵਿਚਲੀ ਝਲਕ ਦੀ ਪਹਿਲੀ ਤਸਵੀਰ ਇੰਸਟਾਗ੍ਰਾਮ ’ਤੇ ਸਾਂਝੀ ਕੀਤੀ ਹੈ। ਜਾਣਕਾਰੀ ਮੁਤਾਬਕ ਇਸ ਫ਼ਿਲਮ ਦੀ ਲੰਡਨ ਵਿਚਲੀ ਸ਼ੂਟਿੰਗ ਦਾ ਪੜਾਅ ਪੂਰਾ ਹੋ ਚੁੱਕਿਆ ਹੈ। ਕਾਰਤਿਕ ਨੇ ਤਸਵੀਰ ਸਾਂਝੀ ਕਰਦਿਆਂ ਲਿਖਿਆ, ‘‘ਜਦੋਂ ਛਾਤੀ ’ਤੇ ‘ਇੰਡੀਆ’ ਲਿਖਿਆ ਹੋਵੇ ਤਾਂ ਇਹ ਬਹੁਤ ਹੀ ਵਿਲੱਖਣ ਭਾਵਨਾ ਹੁੰਦੀ ਹੈ ਤੇ ਮੈਨੂੰ ਇੱਕ ਅਸਲ ਹੀਰੋ ਦਾ ਕਿਰਦਾਰ ਨਿਭਾਉਣ ’ਤੇ ਮਾਣ ਹੈ, ਜਿਸ ਇਨਸਾਨ ਨੇ ਕਦੇ ਕਿਸੇ ਮੁਸ਼ਕਲ ਦਾ ਸਾਹਮਣਾ ਕਰਦੇ ਹੋਏ ਹਾਰ ਨਹੀਂ ਮੰਨੀ, ਉਹ ਹੈ ‘ਚੰਦੂ ਚੈਂਪੀਅਨ’।’’ ਫ਼ਿਲਮ ’ਚ ਨਿਭਾਏ ਗਏ ਕਿਰਦਾਰ ਦੀ ਇਸ ਪਹਿਲੀ ਝਲਕ ਵਿੱਚ ਕਾਰਤਿਕ ਦੇ ਵਾਲ ਛੋਟੇ ਹਨ ਤੇ ਉਸ ਨੇ ਭਾਰਤੀ ਲੋਗੋ ਵਾਲਾ ਕੋਟ ਪਹਿਨਿਆ ਹੋਇਆ ਹੈ, ਉਸ ਦੇ ਚਿਹਰੇ ’ਤੇ ਤੀਬਰ ਭਾਵ ਤੇ ਕੁਝ ਸੱਟਾਂ ਦੇ ਨਿਸ਼ਾਨ ਨਜ਼ਰ ਆ ਰਹੇ ਹਨ। ਇਹ ਫ਼ਿਲਮ ਕਬੀਰ ਖਾਨ ਵੱਲੋਂ ਬਣਾਈ ਜਾ ਰਹੀ ਹੈ। ਇਸ ਫ਼ਿਲਮ ਦੇ ਅਗਲੇ ਸਾਲ 2024 ਵਿੱਚ 14 ਜੂਨ ਨੂੰ ਰਿਲੀਜ਼ ਹੋਣ ਦੀ ਉਮੀਦ ਹੈ। ਦੱਸਣਯੋਗ ਹੈ ਕਿ ‘ਚੰਦੂ ਚੈਂਪੀਅਨ’ ਦੀ ਕਹਾਣੀ ਇੱਕ ਖਿਡਾਰੀ ਦੀ ਅਸਲ ਜ਼ਿੰਦਗੀ ਨੂੰ ਬਿਆਨ ਕਰਦੀ ਹੈ। ਇਸ ਵਿੱਚ ਉਹ ਚੰਦੂ ਨਾਮ ਦਾ ਕਿਰਦਾਰ ਨਿਭਾਅ ਰਿਹਾ ਹੈ। ਜਵਿੇਂ ਹੀ ਕਾਰਤਿਕ ਨੇ ਆਪਣੀ ਫ਼ਿਲਮ ਵਿਚਲੀ ਨਵੀਂ ਦਿਖ ਪ੍ਰਸ਼ੰਸਕਾਂ ਨਾਲ ਸਾਂਝੀ ਕੀਤੀ ਹੈ ਤਾਂ ਉਸ ਦੇ ਪੋਸਟ ’ਤੇ ਲਗਾਤਾਰ ਟਿੱਪਣੀਆਂ ਆ ਰਹੀਆਂ ਹਨ। -ਏਐੱਨਆਈ