ਫਿਲਮ ‘ਜਵਾਨ’ ਦਾ ਪਹਿਲਾ ਗੀਤ ‘ਜ਼ਿੰਦਾ ਬੰਦਾ’ ਰਿਲੀਜ਼

ਮੁੰਬਈ: ਅਦਾਕਾਰ ਸ਼ਾਹਰੁਖ ਖ਼ਾਨ ਨੇ ਅੱਜ ਆਪਣੀ ਫਿਲਮ ‘ਜਵਾਨ’ ਦਾ ਪਹਿਲਾ ਗੀਤ ‘ਜ਼ਿੰਦਾ ਬੰਦਾ’ ਰਿਲੀਜ਼ ਕਰਦਿਆਂ ਉੱਘੇ ਉਰਦੂ ਕਵੀ ਵਸੀਮ ਬਰੇਲਵੀ ਦਾ ਧੰਨਵਾਦ ਕੀਤਾ ਹੈ, ਜਿਨ੍ਹਾਂ ਦੀ ਇੱਕ ਕਵਿਤਾ ਦੇ ਹਿੰਦੀ ਰੂਪਾਂਤਰਣ ’ਤੇ ਇਹ ਗੀਤ ਤਿਆਰ ਕੀਤਾ ਗਿਆ ਹੈ। ਅਨਿਰੁੱਧ ਰਵੀਚੰਦਰ ਵੱਲੋਂ ਸੰਗੀਤਬੱਧ ਕੀਤਾ ਗਿਆ ਇਹ ਗੀਤ ਤਾਮਿਲ, ਤੇਲਗੂ ਤੇ ਹਿੰਦੀ ਭਾਸ਼ਾਵਾਂ ਵਿੱਚ ਰਿਲੀਜ਼ ਕੀਤਾ ਗਿਆ ਹੈ। ਸ਼ਾਹਰੁਖ ਖ਼ਾਨ ਨੇ ਆਪਣੇ ਟਵਿੱਟਰ ਅਕਾਊਂਟ ’ਤੇ ਤਿੰਨੇ ਭਾਸ਼ਾਵਾਂ ਵਿੱਚ ਇਹ ਗੀਤ ਸਾਂਝਾ ਕਰਦਿਆਂ ਕਿਹਾ, ‘ਪੇਸ਼ ਕਰ ਰਹੇ ਹਾਂ....#ਜ਼ਿੰਦਾ ਬੰਦਾ..ਅਸੂਲੋਂ ਪਰ ਜਹਾਂ ਆਂਚ ਆਏ, ਟਕਰਾਨਾ ਜ਼ਰੂਰੀ ਹੈ...ਜੋ ਜ਼ਿੰਦਾ ਹੋ ਤੋ ਫਿਰ ਜ਼ਿੰਦਾ ਨਜ਼ਰ ਆਨਾ ਜ਼ਰੂਰੀ ਹੈ।’ ਆਪਣੀ ਕਵਿਤਾ ’ਤੇ ਆਧਾਰਿਤ ਇਹ ਗੀਤ ਤਿਆਰ ਕਰਨ ਦੇਣ ਲਈ ਵਸੀਮ ਬਰੇਲਵੀ ਸਾਹਿਬ ਦਾ ਬਹੁਤ ਬਹੁਤ ਧੰਨਵਾਦ। ਇਸ ਗੀਤ ਦੇ ਬੋਲ ਇਰਸ਼ਾਦ ਕਾਮਿਲ ਜੀ ਦੇ ਹਨ ਤੇ ਸੰਗੀਤ ਪਿਆਰੇ ਦੋਸਤ ਅਨਿਰੁੱਧ ਨੇ ਦਿੱਤਾ ਹੈ।’ ਜ਼ਿਕਰਯੋਗ ਹੈ ਕਿ ਐਟਲੀ ਵੱਲੋਂ ਨਿਰਦੇਸ਼ਿਤ ਫਿਲਮ ‘ਜਵਾਨ’ ਦੇ ਇਸ ਗੀਤ ਵਿੱਚ ਸ਼ਾਹਰੁਖ ਦੇ ਨਾਲ ਸਾਨਿਆ ਮਲਹੋਤਰਾ, ਪ੍ਰਿਆਮਨੀ ਗਿਰਿਜਾ ਓਕ, ਸੰਜੀਤਾ ਭੱਟਾਚਾਰੀਆ ਤੇ ਲਹਿਰ ਖ਼ਾਨ ਨੱਚਦੇ ਨਜ਼ਰ ਆਉਂਦੇ ਹਨ। ਇਸ ਗੀਤ ਦੀ ਕੋਰੀਓਗ੍ਰਾਫ਼ੀ ਸ਼ੋਬੀ ਵੱਲੋਂ ਕੀਤੀ ਗਈ ਹੈ। -ਪੀਟੀਆਈ