ਅੱਗ ਬੁਝਾਉਣ ਤੋਂ ਪਹਿਲਾਂ ਹੀ ਫਾਇਰ ਬ੍ਰਿਗੇਡ ਦਾ ਪਾਣੀ ਮੁੱਕਿਆ

ਮੁਖਤਿਆਰ ਸਿੰਘ ਨੌਗਾਵਾਂ
ਦੇਵੀਗੜ੍ਹ, 5 ਮਈ
ਕਸਬਾ ਬਲਬੇੜਾ ਨੇੜੇ ਸਵੇਰੇ ਜੈ ਜਵਾਲਾ ਕਾਰਡ ਬੋਰਡ, ਗੱਤਾ ਫੈਕਟਰੀ ’ਚ ਅੱਗ ਲੱਗਣ ਕਾਰਨ ਲੱਖਾਂ ਦਾ ਸਾਮਾਨ ਸੜ ਕੇ ਸੁਆਹ ਹੋ ਗਿਆ।
ਫੈਕਟਰੀ ਦੇ ਐੱਮਡੀ ਰਾਜਿੰਦਰ ਕੁਮਾਰ ਤੇ ਸੁਮਨ ਲੱਤਾ ਨੇ ਦੱਸਿਆ ਕਿ ਖੇਤਾਂ ’ਚ ਨਾੜ ਨੂੰ ਲੱਗੀ ਅੱਗ, ਤੇਜ਼ ਹਵਾਵਾਂ ਚੱਲਣ ਕਾਰਨ ਫੈਕਟਰੀ ’ਚ ਜਾ ਵੜੀ। ਇਸ ਦਾ ਉਨ੍ਹਾਂ ਨੂੰ ਕਰੀਬ 11 ਵਜੇ ਸਵੇਰੇ ਫੋਨ ’ਤੇ ਪਤਾ ਲੱਗਾ। ਇਸ ’ਤੇ ਉਹ ਤੁਰੰਤ ਫੈਕਟਰੀ ਪਹੁੰਚੇ ਅਤੇ ਪੁਲੀਸ ਚੌਕੀ ਬਲਬੇੜਾ ਨੂੰ ਇਤਲਾਹ ਦਿੱਤੀ ਅਤੇ ਫਾਇਰ ਬ੍ਰਿਗੇਡ ਨੂੰ ਸੂਚਿਤ ਕੀਤਾ। ਕਈ ਘੰਟੇ ਬਾਅਦ ਫਾਇਰ ਬ੍ਰਿਗੇਡ ਦੀ ਗੱਡੀ ਪਹੁੰਚੀ, ਜਦੋਂ ਅੱਗ ਬੁਝਾਉਣ ਦੀ ਕੋਸ਼ਿਸ਼ ਕੀਤੀ ਤਾਂ ਗੱਡੀ ਦਾ ਪਾਣੀ ਖਤਮ ਹੋ ਗਿਆ ਜਦੋਂ ਤੱਕ ਦੁਬਾਰਾ ਫਾਇਰ ਬ੍ਰਿਗੇਡ ਦੀ ਗੱਡੀ ਪਾਣੀ ਲੈ ਕੇ ਆਈ ਉਦੋਂ ਤੱਕ ਸਾਰਾ ਕੁਝ ਸੜ ਕੇ ਸੁਆਹ ਹੋ ਚੁੱਕਿਆ ਸੀ। ਉਨ੍ਹਾਂ ਦੱਸਿਆ ਕਿ ਜੇਕਰ ਫਾਇਰ ਬ੍ਰਿਗੇਡ ਸਹੀ ਸਮੇਂ ’ਤੇ ਕੰਮ ਕਰਦੀ ਤਾਂ ਲੱਖਾਂ ਰੁਪਏ ਦਾ ਨੁਕਸਾਨ ਹੋਣੋਂ ਬਚ ਸਕਦਾ ਸੀ। ਉਨ੍ਹਾਂ ਕਿਹਾ ਕਿ ਅੱਗ ਕਾਰਨ ਫੈਕਟਰੀ ’ਚ ਪਿਆ ਗੱਤਾ, ਬਾਰਦਾਨਾ, ਰੁਈਂ, ਮਸ਼ੀਨਰੀ ਆਦਿ ਸਭ ਕੁਝ ਸੜ ਗਿਆ ਅਤੇ ਲੱਖਾਂ ਦਾ ਨੁਕਸਾਨ ਹੋ ਗਿਆ।