ਦਿੱਲੀ ਸਰਕਾਰ ਨੇ ਨੈਸ਼ਨਲ ਸਮਾਲ ਸੇਵਿੰਗਜ਼ ਫੰਡ ਤੋਂ 10,000 ਕਰੋੜ ਉਧਾਰ ਮੰਗੇ

ਪੱਤਰ ਪ੍ਰੇਰਕ
ਨਵੀਂ ਦਿੱਲੀ, 27 ਨਵੰਬਰ
ਦਿੱਲੀ ਸਰਕਾਰ ਨੇ ਵਿੱਤੀ ਸਾਲ 2024-25 ਲਈ ਨੈਸ਼ਨਲ ਸਮਾਲ ਸੇਵਿੰਗਜ਼ ਫੰਡ (ਐਨਐਸਐਸਐਫ) ਤੋਂ 10,000 ਕਰੋੜ ਰੁਪਏ ਉਧਾਰ ਲੈਣ ਦੀ ਮੰਗ ਕਰਦੇ ਹੋਏ ਇੱਕ ਮਹੱਤਵਪੂਰਨ ਵਿੱਤੀ ਕਦਮ ਚੁੱਕਿਆ ਹੈ। ਮੁੱਖ ਮੰਤਰੀ ਆਤਿਸ਼ੀ ਨੇ ਉਧਾਰ ਯੋਜਨਾ ਨੂੰ ਮਨਜ਼ੂਰੀ ਦੇ ਦਿੱਤੀ ਅਤੇ ਵਿੱਤ ਵਿਭਾਗ ਨੂੰ ਵਿੱਤ ਮੰਤਰਾਲੇ ਤੋਂ ਫੰਡਾਂ ਦੀ ਰਸਮੀ ਤੌਰ ’ਤੇ ਬੇਨਤੀ ਕਰਨ ਲਈ ਨਿਰਦੇਸ਼ ਦਿੱਤੇ। ਇਹ ਕਦਮ ਪ੍ਰਮੁੱਖ ਸਕੱਤਰ (ਵਿੱਤ) ਅਸ਼ੀਸ਼ ਚੰਦਰ ਵਰਮਾ ਦੀ ਸਿਫ਼ਾਰਸ਼ ਦੇ ਉਲਟ ਹੈ, ਜਿਸ ਨੇ ਐੱਨਐੱਸਐੱਸਐੱਫ ਤੋਂ ਕਰਜ਼ਾ ਲੈਣ ਵਿਰੁੱਧ ਸਲਾਹ ਦਿੱਤੀ ਸੀ, ਜਿਸ ਵਿੱਚ ਸੁਝਾਅ ਦਿੱਤਾ ਗਿਆ ਸੀ ਕਿ ਦਿੱਲੀ ਨੂੰ ਇਸ ਯੋਜਨਾ ਤੋਂ ਪੂਰੀ ਤਰ੍ਹਾਂ ਪਿੱਛੇ ਹਟਣਾ ਚਾਹੀਦਾ ਹੈ। ਵਰਮਾ ਨੇ ਲੰਬੇ ਸਮੇਂ ਦੇ ਵਿੱਤੀ ਤਣਾਅ ਨੂੰ ਉਜਾਗਰ ਕੀਤਾ। ਦਿੱਲੀ ਨੇ 2022-23 ਵਿੱਚ ਐਨਐਸਐਸਐਫ ਤੋਂ 3,721 ਕਰੋੜ ਰੁਪਏ ਉਧਾਰ ਲਏ ਸਨ ਪਰ ਪਿਛਲੇ ਵਿੱਤੀ ਸਾਲ ਵਿੱਚ ਕਰਜ਼ਾ ਨਹੀਂ ਲਿਆ ਸੀ।