ਕੁਸ਼ਤੀ ਫੈਡਰੇਸ਼ਨ ਵੱਲੋਂ ਮੁੜ ਟਰਾਇਲ ਕਰਵਾਉਣ ਦਾ ਫ਼ੈਸਲਾ

ਨਵੀਂ ਦਿੱਲੀ: ਏਸ਼ਿਆਈ ਓਲੰਪਿਕ ਕੁਆਲੀਫਾਇਰ ’ਚ ਭਾਰਤੀ ਪੁਰਸ਼ ਟੀਮ ਦੇ ਨਿਰਾਸ਼ਾਜਨਕ ਪ੍ਰਦਰਸ਼ਨ ਤੋਂ ਨਾਰਾਜ਼ ਤੇ ਫਿਰਕਮੰਦ ਭਾਰਤੀ ਕੁਸ਼ਤੀ ਫੈਡਰੇਸ਼ਨ ਨੇ ਵਿਸ਼ਵ ਕੁਆਲੀਫਾਇਰ ਲਈ ਟੀਮ ਦੀ ਚੋਣ ਵਾਸਤੇ ਨਵੇਂ ਸਿਰਿਓਂ ਟਰਾਇਲ ਕਰਵਾਉਣ ਦਾ ਫ਼ੈਸਲਾ ਕੀਤਾ ਹੈ। ਬਿਸ਼ਕੇਕ ’ਚ ਏਸ਼ਿਆਈ ਚੈਂਪੀਅਨਸ਼ਿਪ ’ਚ ਭਾਰਤ 18 ਵਿੱਚੋਂ ਸਿਰਫ ਚਾਰ ਕੋਟੇ ਹੀ ਹਾਸਲ ਕਰ ਸਕਿਆ ਹੈ। ਹਾਲੇ ਵੀ 14 ਵਰਗ ਬਾਕੀ ਹਨ। ਡਬਲਿਊਐੱਫਆਈ ਸਾਰੇ 14 ਵਰਗਾਂ ਲਈ ਟਰਾਇਲ ਕਰਵਾਏਗਾ। ਇਸ ਵਿੱਚ ਮਹਿਲਾ ਵਰਗ ’ਚ ਦੋ (68 ਤੇ 62 ਕਿਲੋ), ਪੁਰਸ਼ ਫ੍ਰੀਸਟਾਈਲ ਤੇ ਗ੍ਰੀਕੋ ਰੋਮਨ ’ਚ ਛੇ-ਛੇ ਵਰਗ ਸ਼ਾਮਲ ਹਨ, ਜਿਨ੍ਹਾਂ ਲਈ ਟਰਾਇਲ ਅਪਰੈਲ ਦੇ ਆਖਰੀ ਹਫ਼ਤੇ ਜਾਂ ਮਈ ਦੇ ਪਹਿਲੇ ਹਫ਼ਤੇ ਲਏ ਜਾਣਗੇ। -ਪੀਟੀਆਈ