ਕੌਂਸਲ ਦੇ ਹੱਕ ’ਚ ਹੋਇਆ 54 ਵਿੱਘੇ ਜ਼ਮੀਨ ਦਾ ਫ਼ੈਸਲਾ

ਨਿੱਜੀ ਪੱਤਰ ਪ੍ਰੇਰਕ
ਮੰਡੀ ਗੋਬਿੰਦਗੜ੍ਹ, 22 ਜੁਲਾਈ
ਨਗਰ ਕੌਂਸਲ ਮੰਡੀ ਗੋਬਿੰਦਗੜ੍ਹ ਦੀ ਹਦੂਦ ਵਿੱਚ ਪੈਂਦੀ 54 ਵਿੱਘੇ ਜ਼ਮੀਨ ਜੋ ਕੌਂਸਲ ਦੀ ਹਦੂਦ ਵਿੱਚ ਆਉਣ ਤੋਂ ਪਹਿਲਾਂ ਗ੍ਰਾਮ ਪੰਚਾਇਤ ਨਸਰਾਲੀ ਦੀ ਜਾਇਦਾਦ ਸੀ, ਦਾ ਮਾਮਲਾ ਕੌਂਸਲ ਨੇ ਜਿੱਤ ਲਿਆ ਹੈ। ਵਿਧਾਇਕ ਗੁਰਿੰਦਰ ਸਿੰਘ ਗੈਰੀ ਵੜਿੰਗ ਅਤੇ ਕੌਂਸਲ ਪ੍ਰਧਾਨ ਹਰਪ੍ਰੀਤ ਸਿੰਘ ਪ੍ਰਿੰਸ ਨੇ ਦੱਸਿਆ ਕਿ ਇਹ ਜ਼ਮੀਨ ਕੌਂਸਲ ਦੀ ਹਦੂਦ ਅੰਦਰ ਆਉਣ ਉਪਰੰਤ ਕਿਸੇ ਵੀ ਲੀਜ਼ ਹੋਲਡਰ ਵੱਲੋਂ ਲੀਜ਼ ਰੀਨਿਊ ਨਹੀਂ ਕਰਵਾਈ ਗਈ ਅਤੇ ਕਰੀਬ 25 ਸਾਲਾਂ ਤੋਂ ਇਸ ’ਤੇ ਕਥਿਤ ਨਾਜਾਇਜ਼ ਕਾਬਜ਼ਕਾਰ ਚੱਲੇ ਆ ਰਹੇ ਸਨ। ਕੌਂਸਲ ਵੱਲੋਂ ਮਤਾ ਪਾ ਕੇ ਸਾਲ 2014 ਵਿੱਚ ਡਿਪਟੀ ਡਾਇਰੈਕਟਰ, ਅਰਬਨ ਲੋਕਲ ਬਾਡੀਜ਼, ਲੁਧਿਆਣਾ ਦੀ ਅਦਾਲਤ ਵਿੱਚ ਕੇਸ ਦਾਇਰ ਕੀਤੇ ਸਨ ਪਰ ਸਰਕਾਰ ਵੱਲੋਂ ਡਿਪਟੀ ਡਾਇਰੈਕਟਰ, ਅਰਬਨ ਦੀਆਂ ਅਸਾਮੀਆਂ ਖ਼ਤਮ ਕਰਨ ਕਰ ਕੇ ਕੇਸ ਵਧੀਕ ਡਿਪਟੀ ਕਮਿਸ਼ਨਰ ਫਤਹਿਗੜ੍ਹ ਸਾਹਿਬ ਪਾਸ ਆ ਗਏ। ਉਨ੍ਹਾਂ ਦੱਸਿਆ ਕਿ 19 ਜੁਲਾਈ ਨੂੰ ਵਧੀਕ ਡਿਪਟੀ ਕਮਿਸ਼ਨਰ ਨੇ ਕੇਸਾਂ ਦਾ ਫ਼ੈਸਲਾ ਨਗਰ ਕੌਂਸਲ ਦੇ ਹੱਕ ਵਿੱਚ ਕਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਜਗ੍ਹਾ ਖਾਲੀ ਕਰਵਾਉਣ ਲਈ ਜਲਦੀ ਕਾਰਵਾਈ ਕੀਤੀ ਜਾਵੇਗੀ।