ਹੜ੍ਹ ਦੌਰਾਨ ਸਤਲੁਜ ਵਿੱਚ ਰੁੜ੍ਹਿਆ ਸਾਮਾਨ ਲੱਭਦੇ ਵਿਅਕਤੀ ਦੀ ਮੌਤ

ਜਲੰਧਰ: ਹੜ੍ਹ ਕਾਰਨ ਸਤਲੁਜ ਦਰਿਆ ਵਿੱਚ ਰੁੜ੍ਹੇ ਆਪਣੇ ਘਰ ਦੇ ਸਾਮਾਨ ਨੂੰ ਡੂੰਘੇ ਪਾਣੀਆਂ ਵਿੱਚ ਚੁੱਬੀਆਂ ਮਾਰ ਕੇ ਕੱਢਣ ਵਾਲੇ ਇੱਕ ਵਿਅਕਤੀ ਦੀ ਡੁੱਬਣ ਨਾਲ ਮੌਤ ਹੋ ਗਈ। ਮ੍ਰਿਤਕ ਦੀ ਪਛਾਣ ਹਰਮੇਸ਼ (45) ਵਾਸੀ ਧੱਕਾ ਬਸਤੀ ਬਲਾਕ ਲੋਹੀਆਂ ਵੱਜੋਂ ਹੋਈ। ਮ੍ਰਿਤਕ ਹਰਮੇਸ਼ ਦੇ ਪਰਿਵਾਰ ਵਿੱਚ ਦੋ ਲੜਕੇ, ਪਤਨੀ ਤੇ ਮਾਂ ਸ਼ਾਮਲ ਹੈ। ਲੋਹੀਆਂ ਖ਼ਾਸ ਦੇ ਥਾਣੇਦਾਰ ਯਾਦਵਿੰਦਰ ਸਿੰਘ ਨੇ ਦੱਸਿਆ ਕਿ ਹਰਮੇਸ਼ ਲੰਘੀ ਸ਼ਾਮ ਨੂੰ ਪਾਣੀ ਵਿੱਚ ਡੁੱਬ ਗਿਆ ਸੀ। ਉਧਰ ਐਸਡੀਐਮ ਸ਼ਾਹਕੋਟ ਨੇ ਪੰਜਾਬ ਸਰਕਾਰ ਵੱਲੋਂ ਪੀੜਤ ਪਰਿਵਾਰ ਨੂੰ ਸਾਢੇ ਚਾਰ ਲੱਖ ਦੀ ਆਰਥਿਕ ਸਹਾਇਤਾ ਵਾਲਾ ਚੈੱਕ ਦਿੱਤਾ ਹੈ। ਧੱਕਾ ਬਸਤੀ ਦੇ ਦਰਜਨ ਤੋਂ ਵੱਧ ਘਰ ਹੜ੍ਹ ਵਾਲੀ ਪਹਿਲੀ ਰਾਤ ਨੂੰ ਹੀ ਰੁੜ੍ਹ ਗਏ ਸਨ। -ਨਿੱਜੀ ਪੱਤਰ ਪ੍ਰੇਰਕ