ਸਿਲੰਡਰ ਨੂੰ ਅੱਗ ਲੱਗੀ; ਦਾਦੇ-ਪੋਤੇ ਸਣੇ ਤਿੰਨ ਝੁਲਸੇ

ਪੱਤਰ ਪ੍ਰੇਰਕ
ਤਪਾ ਮੰਡੀ, 3 ਨਵੰਬਰ
ਲਾਗਲੇ ਪਿੰਡ ਦਰਾਕਾ ਵਿੱਚ ਗੈਸ ਸਿਲੰਡਰ ਨੂੰ ਅੱਗ ਲੱਗ ਗਈ ਜਿਸ ਨੂੰ ਬੁਝਾਉਂਦਿਆਂ ਦਾਦੇ-ਪੋਤੇ ਸਮੇਤ ਤਿੰਨ ਵਿਅਕਤੀ ਝੁਲਸ ਗਏ।
ਜਾਣਕਾਰੀ ਅਨੁਸਾਰ ਘਰ ਦੀਆਂ ਔਰਤਾਂ ਰਸੋਈ ਵਿੱਚ ਕੰਮ ਕਰ ਰਹੀਆਂ ਸਨ। ਅਚਾਨਕ ਸਿਲੰਡਰ ਦੀ ਪਾਈਪ ਨੂੰ ਅੱਗ ਲੱਗ ਗਈ ਅਤੇ ਕੁਝ ਹੀ ਮਿੰਟਾਂ ਵਿੱਚ ਅੱਗ ਰਸੋਈ ਵਿੱਚ ਫੈਲ ਗਈ। ਅੱਗ ਬੁਝਾਉਂਦਿਆਂ ਗੰਡਾ ਸਿੰਘ ਝੁਲਸ ਗਿਆ। ਜਦੋਂ ਦਾਦੇ ਨੂੰ ਬਚਾਉਣ ਲਈ ਉਸ ਦਾ ਪੋਤਾ ਬਲਜੋਤ ਸਿੰਘ ਅੱਗੇ ਆਇਆ ਤਾਂ ਉਹ ਵੀ ਅੱਗ ਦੀ ਲਪੇਟ ਵਿੱਚ ਆ ਗਿਆ। ਰੌਲਾ ਸੁਣ ਕੇ ਪੁੱਤਰ ਚਮਕੀਲਾ ਸਿੰਘ ਵੀ ਬਚਾਅ ਲਈ ਆਇਆ ਤਾਂ ਉਹ ਵੀ ਝੁਲਸ ਗਿਆ। ਆਂਢ-ਗੁਆਂਢ ਨੇ ਇਕੱਠੇ ਹੋ ਕੇ ਅੱਗ ’ਤੇ ਕਾਬੂ ਪਾਇਆ ਅਤੇ ਜ਼ਖਮੀਆਂ ਨੂੰ ਸਰਕਾਰੀ ਹਸਪਤਾਲ ਤਪਾ ਵਿੱਚ ਪਹੁੰਚਾਇਆ ਜਿੱਥੋਂ ਬਜ਼ੁਰਗ ਦੀ ਗੰਭੀਰ ਹਾਲਤ ਕਰਕੇ ਉਸ ਨੂੰ ਹੋਰ ਹਸਪਤਾਲ ਰੈਫਰ ਕਰ ਦਿੱਤਾ ਗਿਆ।