ਨਿਗਮ ਨੇ ਕਾਲੇ ਕਬਾੜੀਏ ਦੀਆਂ ਗ਼ੈਰਕਾਨੂੰਨੀ ਉਸਾਰੀਆਂ ਢਾਹੀਆਂ

ਦਵਿੰਦਰ ਸਿੰਘ
ਯਮੁਨਾਨਗਰ, 12 ਜੂਨ
ਨਗਰ ਨਿਗਮ ਦੀ ਟੀਮ ਨੇ ਢਾਈ ਦਿਨਾਂ ਵਿੱਚ ਗੈਰਕਾਨੂੰਨੀ ਗਤੀਵਿਧੀਆਂ ਵਿੱਚ ਸ਼ਾਮਲ ਨਰੇਸ਼ ਵਰਮਾ ਉਰਫ਼ ਕਾਲਾ ਕਬਾੜੀ ਵੱਲੋਂ ਬਣਾਈਆਂ 9 ਜਾਇਦਾਦਾਂ ਨੂੰ ਢਾਹ ਦਿੱਤਾ। ਨਿਗਮ ਦੀ ਲਗਾਤਾਰ ਕਾਰਵਾਈ ਦੌਰਾਨ ਨਿਗਮ ਨੇ ਉਸ ਦੀਆਂ ਵੱਡੀਆਂ ਇਮਾਰਤਾਂ ਨੂੰ ਵੀ ਢਾਹ ਦਿੱਤਾ। ਨਗਰ ਨਿਗਮ ਕਮਿਸ਼ਨਰ ਆਯੂਸ਼ ਸਿਨਹਾ ਦੇ ਨਿਰਦੇਸ਼ਾਂ ’ਤੇ ਏਟੀਪੀ ਅਤੇ ਨਿਗਮ ਇੰਜਨੀਅਰ ਕੁਲਦੀਪ ਯਾਦਵ ਦੀ ਅਗਵਾਈ ਹੇਠ ਬਣਾਈ ਟੀਮ ਨੇ ਦੁਪਹਿਰ 12 ਵਜੇ ਤੱਕ ਕਾਰਵਾਈ ਮੁਕੰਮਲ ਕਰ ਲਈ। ਨਗਰ ਨਿਗਮ ਨੇ ਇਸ ਸਬੰਧੀ ਕਥਿਤ ਮੁਲਜ਼ਮ ਕਾਲੇ ਸਕਰੈਪ ਡੀਲਰ ਨੂੰ ਕਈ ਵਾਰ ਨੋਟਿਸ ਜਾਰੀ ਕੀਤੇ ਸਨ। ਜਵਾਬ ਨਾ ਦੇਣ ਦੀ ਸੂਰਤ ਵਿੱਚ ਉਸ ਦੀਆਂ ਜਾਇਦਾਦਾਂ ਨੂੰ ਨਸ਼ਟ ਕਰਨ ਲਈ ਅੰਤਿਮ ਨੋਟਿਸ ਵੀ ਜਾਰੀ ਕੀਤਾ ਗਿਆ ਸੀ। ਇਸ ਮਗਰੋਂ ਪੁਲੀਸ ਪ੍ਰਸ਼ਾਸਨ ਦੀ ਮਦਦ ਨਾਲ ਨਿਗਮ ਵੱਲੋਂ ਜੇਸੀਬੀ ਅਤੇ ਬੁਲਡੋਜ਼ਰ ਦੀ ਮਦਦ ਨਾਲ ਇਨ੍ਹਾਂ ਜਾਇਦਾਦਾਂ ਨੂੰ ਢਾਹ ਦਿੱਤਾ ਗਿਆ। ਜ਼ਿਕਰਯੋਗ ਹੈ ਕਿ ਮੁਲਜ਼ਮ ਨਰੇਸ਼ ਵਰਮਾ ਉਰਫ ਕਾਲਾ ਕਬਾੜੀਆਂ ’ਤੇ ਉਸ ਦੀ ਪਤਨੀ ਨੇ ਵੀ ਗੋਲੀਬਾਰੀ ਅਤੇ ਕੁੱਟਮਾਰ ਦੇ ਦੋਸ਼ ਲਗਾਏ ਸਨ। ਮਗਰੋਂ ਪੁਲੀਸ ਨੇ ਮੁਲਜ਼ਮ ਅਤੇ ਉਸ ਦੇ ਭਰਾ ਸੋਨੂੰ ਨੂੰ ਗੋਲੀਬਾਰੀ ਦੇ ਨਾਲ-ਨਾਲ ਨਾਜਾਇਜ਼ ਫਿਰੌਤੀ ਅਤੇ ਨਾਜਾਇਜ਼ ਹਥਿਆਰ ਰੱਖਣ ਦੇ ਮਾਮਲੇ ਵਿੱਚ ਜੇਲ੍ਹ ਭੇਜ ਦਿੱਤਾ ਸੀ।
ਨਗਰ ਨਿਗਮ ਦੇ ਏਟੀਪੀ ਅਤੇ ਸਹਾਇਕ ਇੰਜਨੀਅਰ ਕੁਲਦੀਪ ਯਾਦਵ ਨੇ ਦੱਸਿਆ ਕਿ ਕਾਲਾ ਕਬਾੜੀਏ ਵੱਲੋਂ ਨਾਜਾਇਜ਼ ਤੌਰ ’ਤੇ 9 ਜਾਇਦਾਦਾਂ ਬਣਾਈਆਂ ਗਈਆਂ ਸਨ। ਉਨ੍ਹਾਂ ਦੱਸਿਆ ਕਿ ਨਗਰ ਨਿਗਮ ਦੀ ਟੀਮ ਨੇ ਜੇਸੀਬੀ ਦੀ ਮਦਦ ਨਾਲ ਰਾਮਪੁਰਾ ਦੇ ਗ੍ਰੀਨ ਪਾਰਕ, ਸੌਭਾਗਿਆ ਰਿਜ਼ੋਰਟ ਨੇੜੇ, ਗਧੋਲੀ ਕਲੋਨੀ ਅਤੇ ਜਗਾਧਰੀ, ਸੈਕਟਰ- 17 ਵਿੱਚ ਬਣਾਈਆਂ ਨਾਜਾਇਜ਼ ਜਾਇਦਾਦਾਂ ਨੂੰ ਢਾਹ ਦਿੱਤਾ।